#يد_القدر

الجزء الثاني

#يد_القدر
بقلم فردوس عبد اللطيف
الجزء الثاني
بذيج الليله الي دخلو الدواعش للموصل كانت مفاجأة للكل محد كان متوقع بهالسرعه تسقط مدينه كبرى وبيهه جيوش
لكن هذا الي صار واكيد كلكم تعرفون الاحداث
بالنسبة النا بقائنا في بيوتنا خطر وخروجنا من البيت اخطر
يعني الموت او الموت ...ولكن كثرت الاتصالات علينا والناس كولهه صعدت بسياراتهم وخرجوا للمجهول
عامر ابو أنس ...يالى كلمن ياخذ ملابسه وحاجياته المهمه والمستمسكات لا تنسوهه
خلي نلحك نطلع قبل ما يدخلون علينا ويذبحونا
حيدر ...إنتوا طلعوا اني باقي ما اطلع من الموصل
عامر ...محد يبقى تسمع زين ؟ كلنا نطلع سوية نعيش سوى ونموت سوى
حيدر ..بابا ما اكدر اتبهذل وين تاخذوني نروح بالبيوت ؟ لو بالمخيمات ؟
عامر ...وين مانروح المهم نسلم عليكم انت متصور سهله علي اعوف بيتي الي كظيت عمري اتعب حتى اسوي الكم
ولكن هذا الفرار من الموت
حيدر ...الفرار من الموت الى الموت
عامر ...انت ليش تعاندني وجاي تضيع الوقت والدقيقة محسوبه علينا ولك ذولي اول مايدخلون يذبحونه
حيدر ...اني ابقى أدافع عن بيتنا واقاومهم
عامر ...ام انس احجي مع ابنج ترى تعبني اني رايح اشوف الجوارين وين توجههم واي طريق حايسلكون
تكلمنه كولنه مع حيدر ماما واخوي انس واني واقتنع يجي معانا بشرط يرجع وره اسبوع ... احنا هم وافقنا بس المهم يقتنع يجي ويانا
اخذنه ملابس قليله وبذيج اللحظات العقل يغيب كان همنا الخروج من البيت والهرب الى المجهول امي تباوع عالبيت ودموعهه تنزل وأدكول اللهم اني أستودعك بيتي تعب العمر وكد السنين لملمنه نفسنا وطلعنا من البيت والخوف والرعب في قلوبنا ولكن مجبرون نتهجر داخل بلدنا
عامر .. ام انس خابرني اخوج من الكوت وكال تعالو يمنا وينتظرونه
ام انس ... ان شاء الله نوصل بالسلامه بس استعجل اطلع
عامر ... بس ترى السياره مابيهه بنزين يكفي
انس ...بابا خلي نملي بنزين بلكي نلكي محطة ....
اجه ابو محمد ...السلام عليكم ابو انس وين توجهكم ؟
عامر ...متوجهين للكوت يم نسيبي خال الولد ...وأنتو وين حاترحون ؟
ابو محمد ...طالعين لكربلاء هناك عدنه كرابه لحد مانستأجر بيت ونشوف هالمصيبه شكد تطول
عامر ...شكولك خلينا ع اتصال
ابو محمد ...ننطلق سوية ابو انس
عامر ...ابو محمد شوف العوائل تريد تجلب باي شي خطية الي ماعدهم سياره وماعدهم فلوس ...الله يعينهم
ابو محمد ... فعلا الناس كانت مستوره ببيوتهم الله لا يوفقهم  بهذلوهم عوائل كانت مستقره
انطلقنه بالسيارات نمشي مع سماعنه اصوات الرمي والقنابل
الوضع كان مرعب خصوصا الوقت كان ليل
عامر ....اشلون بينا ولا محطة بنزين والبنزين بقاله شوية ويخلص ...
انس ...يابه هذا المكان خطر ومنو حا يساعدنه
ام انس ...ادعوا الله بنات ولد طلبو من رب العالمين يسخرلنه احد
ابو مروان ...السلام عليكم ....ابو انس ليش واكف هنا واشبيكم
عامر ...عليكم السلام اخوي ابو مروان مثل ماتشوف حاننهزم الوضع ميطمن نروح للكوت كم يوم ونشوف الوضع ...بس البنزين خلص ووكفت السياره
ابو مروان ...تعال اخوي سيارتي مفوله بنزين خلي اسحبلك من عندي
سحبنا بنزين من سياره ابو مروان صديق ابوي مع انه سني
ولكن مهما حاولو يفرقون ابناء الوطن الواحد تبقى الاصاله
باخلاق اهلنا ويبقى العراقي اصيل والشيعي اخو السني مهما حاولو يفرقونه
تشكرابوي من ابو مروان
ابو مروان ...الله عليك ابو انس محتاج فلوس اي شي كول لا تنحرج
ابو انس ...تسلم اخوي الطيب انت انقذتنه بالبنزينات بهذا الوقت الصعب وجزاك الله خيرا
ابو مروان ...من توصلون طمنوني
ابو انس ...ان شاء الله ...مع السلامه
من اخذنه البنزين كدرنه نطلع من الموصل لكن بصعوبه لان الفوضى بكل مكان والناس متعرف وين تتوجه
بقينا بالطريق يومين يالى وصلنا للكوت شفنا البهذله الي ماكنا متوقعيهه فعلا الي يترك بيته يتبهذل لكن من نتابع الاخبار عرفنا انو طلعنا بالوقت المناسب
وصلنا للكوت تعبانين من السفر والخوف وظعنه النفسي منهاره اعصابنه تركنا حياتنا وراء ظهرنا وتوجهنا للمجهول
بقينا بالكوت اسبوعين في بيت خالي
جدي ابو ابوي كلسع يتصل بينا ويكول لازم تجون عندي بكربلاء ميصير تبقون بيت النسيب
فعلا والدي كال تحظرو حتى نروح لكربلاء لبيت جدو
بهالفتره كنت ع تواصل مع محمد ...
محمد ...حبيبتي سوسو استأجرنا بيت بكربلاء وتقريبا حا نستقر لان الظاهر الوظعيه حاتطول
سابين ...جدو اتصل بابوي وكال لازم نجي لبيته بكربلاء
محمد ...الحمد لله عالاقل تصيرون بنفس المحافظه ...سوسو مشتاقلج مشتاق لعيونج الحلوه
سابين ... اني هم مشتاقتلك حمودي بس هاي ظروفنه هيج صارت
محمد .... والمدرسة شسويتي عليها
سابين ...المدرسة راحت علي هالسنه ما اعتقد اكدر اكملها
محمد ...تتعوض حبيبتي ..لاتضوجين ...شوكت تجون لكربلاء
سابين ... باجر نجي الصبح لبيت جدو
محمد ...اوك بعدين اتصل بحيدر حتى اشوفه المهم تجون بنفس المحافظه
سابين اي ان شاء الله نجي وأشوفك
اليوم الثاني سافرنه لكربلاء يم بيت جدي ورحب بينا وكعدنه بيت جدو ...الانسان مهما يروح لأي مكان وحتى لو أعز اهل بس ماكو مثل بيته لان البيت هو المملكه فعلا ماعرفنه قيمته الا من عفنا وحتى دراستي توقفت مستقبلي كوله توقف
بدينه مرحله جديده بحياتنه بكربلاء بالبداية كانت حياتنه صعبة لان رواتب ماما وبابا ما استلموهه الا بعد فتره تعرفون كنازحين عن محافظتنه تغيرت امور كثيره بحياتنه
زهراء ....بنت خالتي حاولت تتصل بحيدر اكثر من مره ولكن حيدر يرفض حتى يكلمهه لان الثقة من تنفقد بين حبيبين بعد مترجع واجتي اكثر من مره لبيت جدي لكن حيدر قفل وميريدهه ...اخر شئ أيست من حيدر ووافقت تتزوج ابن عمتي خالد وعاشت بكربلاء
خالد ....عائلته متكونه من أمه (عمتي ) واخوانه سلوان وجبار وأخته غالية ...جميلة جدا ومخطوبة لابن عمتها أكرم
بس الي عرفته بعد فتره ان زهراء لعوب عدهه علاقات كثيره مع شباب وبالتلفون وحيدر كشفها بس ما حجه ولا فضحها حتى الي واني اقرب صديقة اله ...بس من يومهه كلبه انكسر وبعد مكدر يحب وحتى مرات اكوله حيدوري خلي اخطبلك يكول لا ما اريد اتزوج
علاقتي بمحمد مستمره من خلال الرسائل فقط وضمن حدود الشرع ....حبنا يكبر معانا وتعلقنا ببعض يزيد مع مرور الايام
بعد مرور اشهر والوضع مثل ماهو واحنا عايشين بيت جدي
اجه حيدر من يم اصدقاءه
حيدر ...بابا اريد أتطوع بالحشد
ابو انس ...ظل ابوي يصيح وامي تبجي
اني مكدرت اتكلم مع هالهوسه بس بقيت ابجي
انس ...انت تريد تروح للموت برجليك
حيدر ...انتو انانيين اذا اني ما اروح وانت ماتروح لعد منو يدافع عن ارضنا الي احتلوهه الدواعش ؟. كيف حاترجع لبيتك بابا وترجع حياتك مثل ماكانت ؟
اني ماعندي شي لا زوجه ولا طفل اخاف عليهم من بعدي
خلوني أدافع عن شرفنا وكرامتنا مامليتوا من هالبهذله الي احنا بيهه ؟
ابو انس ...ولك ربيتك بشلاع الكلب وتالي تجيك طلقة من داعشي حقير وتخسر حياتك
حيدر ... بابا الموت من اجل الارض شهاده وتعرف منزله الشهيد عند رب العالمين
ابو انس ...يعني انت ناوي عالموت ؟
انس ...انت تريد تاذينه بهذا تصرفك
سجاد ... خلو يروح شكو بيهه يصير بطل
شهد ...حظنته وتبجي ....حيدر متعلق بشهد كثير لان شهد تشبه خالتي المرحومه ...هي وحيدر نفس العمر وروح بروح بس كان عدهه فتحه بالقلب وتوفت سمينا اختي شهد ع اسم خالتي المرحومه ....
حضنهه لشهد ووكف وكال
حيدر ... اني طالع من البيت وما ارجع ...الا اذا توافقون والدمعه بعينه ...وبابا عصبي ومعقد ومياخذ رائ احد ماخذ طبع جدي وعاداته ومن طبع جدي الي يريده يسوي
فعلا حيدر ترك البيت وراح لبيت صديقة وميقبل يرجع للبيت ...
بعد اسبوع والدي استسلم لضغوط حيدر ووافق وياريته ما وافق ...التحق حيدر بالحشد والتحق بمعسكرات التدريب ع القتال ...وغاب علينا 3اشهر ما شفنا
بعد هه اجانه اجازه صاير اسمر واكرع انخبصنه كولنا بجيت حيدر يوم الي اجه صار عيد
اجه وقت تحرير الأنبار والتحق اخوي بالحشد وكل يوم يخابرنه ونسولف معاه ويحجينه ع وظعهم
فد يوم كان يتكلم حيدر مع امي
حيدر ... يوم اني اليوم احس كلبي فرحان فد مره ما اعرف السبب
امي عيونهه امتلئت دموع ...اخذت منهه الفون وكتله
سابين ..الو حيدوري حبيبي دير بالك تروح وتعوفني ..انت اخوي وحزام ظهري وبجيت
حيدر ..سوسو لا تبجين ..ادعيلي استشهد ياخوي اذا استشهدت لاتبجين
سابين ...هالمره من تجي الا ازوجك بسرعه حتى يجوك اطفال ومتعوفهم
حيدر ...يضحك ...اورط بنت العالم
سابين جوابه كان سكين بكلبي
وبنفس اليوم كنت أراسل محمد رِن تلفون بابا وطلع بره يتكلم
ورجع يلطم ويبجي
سابين ..اشبيك بابا عمو مات ( عمي اخو ابوي كان مريض ) توقعت عمي مات قبل شوية كنت اتابع وليد الخشماني واشعر لحيدر بالتلفون
ابو انس ...حيدر استشهد هو وجماعته وباجر يجيبو
وكعت عالارض مكدرت اوكف ع رجلي لطمت ملخت وجهي شعري ما اعرف بذيج اللحظه تصرفت تصرف مجانين وتذكرت كلامه ياخوي لاتبجين اذا استشهدت ...ياخوي حتى البجي يوجع ...الله لا يضوكها لاحد حركه كلب موت الاخ ...فقدت أعز انسان وصديق ..كسر كلشي حلو بحياتي عشت حياتي وماتوقعت حايجي يوم واخسره احسه يمي ياكل ويحجي ...اوووف كلبي وكف بذيج اللحظه ...ذاك اليوم اسود يوم بحياتي التمو الاهل والأقارب
لحد ما جابو التابوت ركضت علية حظنته
سابين ..ليش هيج ياخوي انت شكلت مو كلت ما اروح ؟
خنت بي ...اخ منك خنتني كوم كوم حيدوري واضرب ع صدره ...يمكن ما تصدكوني كان مضروب بصدره وكان مثل الملك ومامبين علية ميت كأنه عايش وجه منور
مسكت ايده ...كوم حيدوري الله يخليك ...رفعت راسي شفت زهراء واكفه وتبجي
ولج زهراء هذا حيدر الي غدرتي بي وكان احس حيدر مسك ايدي والله بدون مبالغه ...كأنه يمنعني من اتكلم عليها امام الناس وتذكرت كلامه من كال اني ماحجيت عليها بس هي الي تكلمت ..
وخسرت اخوي وسندي
تندمت على كل لحظه زعلته بيهه كنت اتشاقى وياه ..سامحني يا خوي اخاف فد يوم زعلتك بدون قصد
لحد اليوم كلما احتصر ازور قبره وافضفضله واشعرله
كانت وصيته الي ان ادرس واطلع معدل
للحكايه بقية
..............بقلم فردوس عبد اللطيف ..............