البارت 21
جحيمي وناري .. 5
علي .. وصلت جلنار للبيت لان تخربطت وناوي اليوم العصر اوديهه للطبيب حتلو بالغصب اريداشوف شنو علتهه ..
رجعت للكليه عندي محاضرة اخيرة لازم القيهه للطلاب ..
وصلت ويه الوقت تماما .. من سيارتي للكليه للقاعه ..
استمرت المحاضرة ساعه ونص من 1لل 2:30
دورت ع مبايلي بجيبي ماكو ولا بمكتبي موجود فعلى الاكثر ناسيه بالسيارة ..
خلصت دوامي وتوجهت لسيارتي وصجوك لكيت مبايلي هناك ..
39اتصال من آيه .. ياستار .. بسلا جلنار صار بيهه شي ..
رأسا دكيت ع جلنار محد رد رجعت دگيت ع آيه ..
الوو ..
هلو حبيبتي .. خير خو ماكو شي داكه عليه هواي ..
ليش مارديت ..
والله جهازي ناسيه بالسيارة وعندي محاضرة لل2ونص ياله خلصت ..
قلقتيني آيه احجي شصاير ..
ماما تعاركت ويه جلنار وطردتهه من البيت ..
شنووووو
اي مثل مدا اكولك ..
اتصلت عليك هواي ومرديت وطردت البنيه للشارع بطرگ العبايه توسلت بيهه تسترهه بشي ذبت عليهه عبايه وطردتهه وردت افتحلهه الباب ضربتني وحبستني بالغرفه ..
حمزة وين وابويه وين ..
ماكو احد بالبيت .. استفردت بالبنيه ..
جاي جاي ..
سديت التلفون 5
صرت اعصاب بالي يودي ويجيب وين راحت جلنار ماكو غير اهلهه تروحلهم .. 7
جنت امشي بطريقي لاهلي بعدين وعيت اني ليش رايح لاهلي قررت اغير طريقي واروح لاهل جلنار ..
وصلت الهم ..
دكيت الباب دكيت ماكو ..
تلفت اعصابي وين راحت ووين راحو اهلهه .. ميت فكرة براسي وكولهن وسوسه شيطان ..
شويه ووكفت سيارة بباب بيت اهل جلنار نزل ولد شاب يشبه الشفيه الافندي انمار ..
السلام عليكم ..
رد عليه السلام ..
وعليكم السلام ..
وكف يم الباب بس مادگهه طلع تلفونه واتصل ..
هلو .. اكولج اني بالباب طلعيلي ..
كلامه فر راسي تعوذت من الشيطان لان مرة اخوهم تصير بنت عمهم ويمكن هذا اخوهه ..
علي ..اكولك بلازحمه .. انت اخو انمار ؟
اي منو حضرتك ؟
اني زوج جلنار ..
هاا اهلا وسهلا ..
الاهل وين لعد .. صارلي ساعه ادوگ بالباب محد طلعلي ..
هاا ماادري والله بس اني جاي ع اختي امي شويه مالهه خلگ وجاي اخذهه ..
اهاا عدهه العافيه ..
بهاللحظه طلعت نرجس .. مبهذله وشايله جنطه ملابس ..
ارتبكت من شافتني ..حاجت اخوهه ..
عمار هاك هاي غراضي .. اخذ الجنطه صعدهه بالسيارة ..
ها اهلا خويه ..
هلا خيتي ..
دكيت الباب محد طلعلي ..خيرهم خوماكو شي وين راحوا ؟
هاا راحوا للمستشفى ..
شنووو .. ليش شبيهم ..
بلعت ريك .. ماعرف اني ماعرف همه تعاركوا اني معليه ..
جانت خايفه ومرتبكه وتتلعثم وهي دتحجي وياي..
كلبي انقبض من كالت اني معليه ..
جلنار وياهم ؟
اي اي هي وگعت ..
تذكرت هي اليوم تخربطت ..
عيوني صارت براسي ..
گتلهه .. وين بيا مستشفى راحوا ؟
مستشفى ......
عفتهم وصعدت سيارتي وطرت للمستشفى الكالتلي عليه ..
الساعه بحدود 3ونص دخلت المستشفى طيتهم اسم المريضه جلنار طارق كالولي بالطوارئ تلكاهه ..
رحت اركض للطوارئ ماكو جلنار ناقليهه بعنبر المرضى تحت المراقبه ..
من گالي الموظف تحت المراقبه تخبلت احس اطرافي بعد متشيلني دلاني المكان وين اسحل بنفسي سحل شنو جلنار بالطوارئ وشنو تحت المراقبه ..
بلحظه تخيلت نفسي فقدتهه ..
گالي الموظف .. قوي گلبك يابه ان شاء الله مابيهه غير العافيه ..
رحت بخطوات خوف وجزع مرعوب من الي ينتظرني ..
مرعوب اشوفهه ممدده گدامي بلاحول ولا قوة .. معقوله اني هلكد احبهه ..
مشيت گوة اجر الخطوات ..
لعنبر المرضى الي تحت المراقبه ..
من بعيد بالممر شفت ابوهه وامهه وحسام اخوهه ..
سرّعت خطواتي ناحيتهم ..
وصلت الهم ..
من شافتني امهه گامت تشهك وتبجي ..
شصار ؟
حسام ابتعد لهناك بعيد عني ..
ماظل كدامي بس عمي ..
تقربت بخوف وخطواتي متردده ..
عمي احجي شصار ؟
لزمني من نص جتوفي گالي يابه ادعيلهه ..
شبيهه هي .. وينهه ؟
احجوا شصااار ..
هي جانت تعبانه اليوم مالهه خلك واني تعاركت وياهه ع شغله تافهه حته ريوك متريگت ووگعت بالكليه ..
علا صوت امهه بالبجي ..
كالتلي .. يمه مرتك حامل وبين الحياه والموت .. نزفت هواي دم وعدهه فقر دم وحطولهه دم كوة دبرناه ويردون بعد ..
جانت كل عبارة تحجيهه ام جلنار سجاجين بگلبي ..عقلي مدا يستوعب ..
هووواااي عليه جلنار حامل .. وتنزف .. وهي اصلا عدهه فقر دم ونقلولهه دم وبعد محتاجين .. زين والطفل بعده لو ...
يعني ربي لا اعتراض ع حكمك .. بلحظه اطيته وبلحظه اخذته .. دمعت عيوني .. اجتي همس ع بالي .. ظلمتهه .. اعرف .. اناني واختاريت راحتي وظلمتهه وحوبتهه ماتعدتني .. بس بيه ياربي مو بالطفل .. اني الظالم ..
لسان حالي يخاطب عقلي .. وضميري يخاطب عقلي .. ..
وينهه هسه هي ؟
اشرلي عمي بعيونه عن مكانهه ..
دخلت للغرفه الهيه بيهه ..
ياحبيبه .. وجهه اصفر ونايمه .. كانولات بايديهه ثنينهن وصونده داخله بحلكهه ..
نايمه بس عاقده حواجبهه .. تون متأذيه ..
تقربت عليهه .. مهمني الصونده ال
تكمله بارت 21
الصونده الي بحلكهه .. رفعت راسهه لصدري وحضنتهه ..
ظليت اهمس الهه ..
اني اسف اني اسف عفتج .. بس ماجنت اعرف والله ..
حسيت بيهه فتحت عيونهه ..
وخرت ابتعدت عنهه شويه ..
عيونهه مفتوحه بتعب ..
اويل الله ..
منو سوة بيج هيج ..
والله لاشرب من دمه ..
عاتبتهه ..
وج من شوكت يتعاركون وياج وتطلعين من البيت ..
من شوكت تعلمتي تطلعين بدون اذني ..
من شوكت تصير مشكله ومتتصلين بيه ..
هزت راسهه اعرف هي مو بيدهه وممسويه كل الي گلته ..
نزلت دموعهه ..
حضنتهه ..
دموعج غاليه .. وج كسرتيني ومامديت ايدي عليج غير مرة وحده وبعد مانعادت ..
اوووف منو مد ايده عليج منو سوة بيج هيج .. كوليلي منو ..
بس الدموع تصب ..
جنتي تدرين انتي حامل ؟
هزت راسهه لا ..
غمضت عيونهه بتعب ..
دتتوجعين حبيبي ..؟
هزت راسهه اي .. متكدر تحجي ..
دخلت الممرضه .. اطتهه بالمغذي ابرة مسكنه ..
گتلهه دتتوجع كالت انطيتهه شي يريحهه شويه هسه يسكن المهه وتنام .. بس محتاجين الهه بعد دم لان بعدهي دتنزف ومنا لليل اذا ظلت هيج نخسر الطفل ..
فتحت عيوني ع وسعهن ..
يعني الطفل لسه موجود مصار اجهاض ..
لا مصار بس مهدد بالاسقاط ..
الام حالتهه خطرة نزيف وفقر دم وضعيفة بنيه اذا ظلت هيج لليل احنه راح نضطر نسقط الطفل لان سلامة الام عدنه اهم من الطفل ..
شكد عمرة ..
عمرة 8اسابيع ..
المريضه محتاجه راحه ولازم تدبرون دم الهه باسرع وقت ..
انت زوجهه ؟
اي نعم ..
هاك وقع ..
شنو هذا ؟
طلب .. حته تروح لبنك الدم تجيب منه دم الهه ..
خوب اني اتبرعلهه فصيله دمي 0 ..
اي لعد تفضل وياي ..
اي جاي وراج ..
طلعت الممرضه .. تقربت ع جلنار بستهه من جبينهه ..
كوميلي بالسلامه ..
طلعت ..
خالتي كاعده .. رحت قرفصت كدامهه كتلهه خاله شصار منو سوة بجلنار هيج ؟
كالت .. والله ياخاله بذيج الظهريه اجتنه بطرك الدشداشه والعبايه امك طاردتهه ..
غمضت عيوني بقوة احاول اكتم غضب هذا ظلم من نوع اخر .. امي نفسهه حسابهه بحث اخر بس خلي افتهم من وصلت لبيت اهلهه شصار وشنو الي وصلهه للحاله الهي بيهه ..
اي كملي خاله .. وصلت لبيتكم وشنو الي صار ؟
نرجس ..
صكيت سنوني .. هم نرجس ..
مرة حسام الحيه ماعرف شكايله لامك ع جلنار وطبيت اريد اكسر حلكهه ع جذبهه ماحسينه الا وحسام فوك راسنه وصار الي صار ..
هو غير افتهم شصار ..
سكتت ماحجت بس رجعت تبجي ..
يعني حساب ضاربهه .. سألتهه بعصبيه ..؟
اجه عمي تقرب مني ..
عوف هاي السوالف يابه وربي يكومهه بالسلامه ..
ظليت اباوعلهه هي ارتبكت تباوعلي وتباوع لعمي زوجهه ..
نب عمي .. كال .. مو حسام .. هي وكعت ع بطنهه هذا الي صار محد اتدنالهه ..
هااا محد اتدنالهه ؟؟ مو ؟؟
واثار الضرب ع وجهه ؟
وجنتكم الي لمت غراضهه وشردت لاهلهه ..
ام جلنار فتحت حلكهه عليه .. اني عقلي بده يربط المواضيع والمشاهد وكل الي شافه .. حته ابتعاد حسام عنه ..
كمت ع حيلي ..
بخطوات ثابته سريعه توجهت لحسام وهو ظل واكف باهت عبالك منتظرني .. منتظر شراح اسوي .. منتظر ردة فعلي بس ابد ماتوقعني اضربه ..
بس صار كدامي وقريب ضربته بوكس دميته ووكعته بالكاع ..
كعدت ع صدرة وضربته بعد بوكس وثنين وتلاثه ..
الى ان التموا علينه العالم وابوه ركض عليه يجرني من صدر ابنه ..
كوة سحلوني سحل من فوكاه .. بس ارتاحيت دميته ..
طلعوني الامن من المستشفى .. مو اشكال شوي بعد ارجع افوت قابل يمنعوني من زوجتي ..
ايدي كولهه دم .. ضجت عبالي دمي لان جلنار احوج للدم الي عندي ..
رحت للمغاسل غسلت طلع دم حسام بيدي مو دمي ..
ارتاحيت نوعا ما ..
رحت للاستعالامات شوفتهم الطلب والحرس واكفين ..
كالولي ممنوع بعد تفوت .. كتلهم زوجتي جوة ومحتاجه دم وهذا طلب اني اتبرعلهه بالدم .. اي شي يصير عليهه احملكم كافه المسؤوليه ..
من شافوا هيج الحجي حامي وخروا عن طريقي ودخلت ..
رحت تبرعت بالدم بطل ونص ولكيت عمي مدبر بطلين دم من بنك الدم ..
حطولهه الدم .. ودننتظر رحمة رب العالمين ..
حسام ماشفته بعد الظاهر طالع من المستشفى ..
خابرتني ايه .. سولفتلهه ع وضعيه جلنار ..
ورة شويه اتصل ابويه ..
آيه مخابرته وهو بالطريق راجع من شغله هو وحمزة وشغله محافظات ..
فدقايق وصار يمي بالمستشفى هو وحمزة ..
دخلوا شافوا جلنار وظلوا يصبرون بام جلنار وابوهه ..
اخذت ابويه ع صفحه وسولفتله كولشي صار وامي شمسويه بالبنيه واساس السالفه شنو وخاف امي تبرر تصرفاتهه وتفتح موضوع انمار هم سولفت لابويه عليه وعن نرجس اخته ..
للعصر المستشفى انترس اهلنه جايين يسألون ع جلنار .. ضرغام وهاله وهمس اجوي ..واخواني الكبار حيدر وحيدر وزوجاتهم ..
هي حبابه جلنار بهالشهرين تركت اثر حلو ويه اهلي صاروا يحبوهه عدا امي لذلك تشوفهم اجوي من سمعوا بيهه متخربطه وبالمستشفى ..
طبعا ماكلنه امي طاردتهه واخوهه ضاربهه عمي طلب واحتراما لعمي اني نفذت .. كلنه داخت ووكعت ومندري بيهه 7
تكمله بارت 21
