البارت 23
جحيمي وناري
بقلمي ملاك الصمت 14
علي .. ثاني يوم النه بالمستشفى .. جلنار وضعهه احسن .. الطفل بعده مهدد بالاسقاط بس هي بخير عدا فقر الدم الي عدهه يرادلهه مداراة بالاكل ..
اهلهه داير مدايرهه .. امهه معافتهه ابد ..
الطبيب سمح اليوم تطلع جلنار ..
مشكلة جلنار ويه امي بعدهي .. لارحت للبيت وتواجهت ويه امي ولا هي اجتي للمستشفى ..
محتار شنو اسوي .. بيتي مو كامل .. خليته بيد حمزة ولان حمزة ملتزم بالشغل ويه ابويه خارج المحافظه فالبناء يمشي ببطئ وحتلو دبرت بيت جلنار يرادلهه مداراة بعد الي صار والغدر الي انغدرته وهي بداخل بيتي مكدرت احميهه بعد ما أمن عليهه يم اي احد وسالفه انو تروح يم اهلهه شكم يوم من سابع المستحيلات ..
امهه حجت وياي بهذا الموضوع وطلبت هي تهتم بيهه لان عدهه تحفظات من يم امي ونص كلامهه كالت انو هي متريد بنتهه ترجع تصير تحت رحمة امي وترجع تأذيهه بوكتهه اني تعصبت ورديت انو هي هم محافظت ع زوجتي بداخل بيتهه والي وصلنه اله من ورة ابنهه حسام فعافتني وسكتت .. 29
عرفنه حسام رايح لبيت عمه متعارك ويه عمه ع الي سوته نرجس والكلام الي مطلعته ع اخته ومهدد يطلكهه اذا مااجتي واعتذرت من جلنار وصلحت موقف جلنار كدام مرة امي .. بس مااصدك انوحسام ممشترك بهاي اللعبه..
المهم جلنار بعد متعدي عتبة باب اهلهه هذا اخر كلام عندي ..
قررت الحل الوحيد انو ارجع جلنار لبيت اهلي واني بنفسي اهتم بيهه اخذ اجازة من دوامي وشغلي بالمكتب خلي اجيبه للبيت منا لمن تتوضح الامور ..
ما اطي اعذار لامي بس من تجي وحده مثل نرجس بهالقرابه من جلنار وبهالوضع الحساس انو تكون اخت انمار طبيعي امي تصدگ هالكلام وتگلب الدنيا ع جلنار لان هذا شرف مو لعب بس ردة فعلهه جانت مبالغ بيهه تصرفهه خطأ جان المفروض تنتظرني وتحجيلي واني اتصرف ..
وبعد الي صار ماتصور امي تتجرأ بعد ع جلنار لان عرفت تصرفهه غلط ومن فهمت ابوي القصه كولهه راح سولفلهه ورزلهه ع تصرفهه ..
اهلي كولهم بصف جلنار شي صعب تأذيهه بعد ..
منا لمن اشوف چارة لبيتي يجوز اسلمه لغير مهندس لان حمزة راح ينشغل بتحضيرات زواجه واتوقع بعد هالمشكله راح يستعجل بزواجه ولوما اهل جلنار خوش ناس اوادم جان يمكن فصخوا عقد بتهم من ابنه خاصه همه مطلبوا يطلعون البنيه بيت وحدهه يعني راح تكعود ويه نفس المرة الي طلعت بتهم بعز الظهر بدون متفتهم شنو السالفه .
طبيت لجلنار بالغرفه .. جانت يمهه هاله ..
ليش صوتك عالي .. شبيك ويه ماما ؟
ماكو شي حبيبي لتشيلين هم ..
مشايله هم بس كافي عركات ومشاكل الله يخليك تعبت ..
ممتعارك ولا اريد مشاكل عمري انتي ..
كل ماهنالك تجادلنه ..
ع شنو تجادلتو ..؟
الطبيب كتبلج ع خروج وخالتي كالت تاخذج لبيت أهلج ..
صفنت عليه ..تنهدت وسألتني ..
وانت شنو رايك ؟
اكيد لاء .. مااقبل ..
لعد وين تريدني اروح ؟
لبيت اهلي لغرفتنه ..
تنهدت اعرفهه متريد ترجع لهناك ..
انتي عندج ثقه بيه ؟
طبعا عندي ثقه بيك ..
لعد هاهيه مثل. ما اكلج سوي .. الموضوع كوله سوء تفاهم وفهمت امي. القصه كولهه وترة هي هم حقهه من تسمع هيج كلام من بنت عمج ع زوجة ابنهه شلون تريديهه تتصرف ..
هااا يعني انت قابل بالي سوته طردتني بهدومي لو ما اتوسل ع عبايه تسترني بيهه ..
لا اكيد مقابل بس كتلج سوء تفاهم ..
طبعا متطي بيهه هاي امك ..
جلللللناار احترمي ..
محترمه اني بس شوف كلامك ..
كلامي مبي شي .. بس انتي تتحسسين زياده ..عموما اخذت اجازة من الدوام وآني راح اكعودلج واداريج ..
خليني اروح لبيت هاله فترة وهمس يمهه .. خواتي يديرن بالهن عليه ..
مو كتلج اخذت اجازة من دوامي وشغل المكتب هم اجيبه للبيت واداريج لو مو بعينج اني ..
سكتت ماحجت بعد بس ضايجه وگالبه الخلقه ..
حاولت هاله تلطف الجو بيناتنه وحاولت تقنعني تاخذ جلنار يمهه شكم يوم وبررتلي موقف امهه انو نرجس انطردت لاهلهه واحتمال يطلگوهه نهائي بس اني جنت قافل ماقبلت باي حل غير انو ترجع وياي لبيت اهلي وتحت عيوني وهذا الكلام كوله صار ع مسمع من جلنار ..
عافتنه وطلعت هاله ..
كالتلي جلنار ..
خلي ببالك لساني ميطخ لسان امك معليه بيهه فهمت ؟؟
خزرتهه لجلنار حتلو امي غلطانه بحقهه مااقبل هيج تتجاوز عليهه تبقى امي ..
موجلنار التسكتلهه بعد ..
جلناااار احترمي شكم مرة صار انبهج ..
صدت وجهه عني مدلغمه ومتريد تباوع لوجهي ..
يله خليني البسج خته نطلع ..
صيحلي هاله تلبسني ..
انجبي وسمعي الكلام ..
ماريد اسمع ..
مو بكيفج ..
جبتلهه عبايتهه الاسلاميه لبستهه الهه فوك الدشداشه ولفيت الهه الشال مالتهه شلون ماجان لان ماعرفله ..
الممرضه جابت كرسي متحرك نطلعهه بي شلتهه من السرير وكعدتهه ع الكرسي المتحرك ..
ودعت اهلهه امهه وابوهه وخواتهه وطلعت ادفع بالكرسي ووصلتهه لحد باب السيارة انداريت فتحت الباب ورجعت شلتهه خليتهه داخل السيارة ..
سديت الباب ورجعت الكرسي المتحرك لموظف المستشفى ورحت رجعت للسيارة ركبت شغلتهه واتجهت لبيت اهلي ..
تكمله البارت 23
جحيمي وناري
بقلمي ملاك الصمت 5
جلنار .. دخلنه لبيت عيالي واني خايفه وحيل متضايقه .. ماريد اتواجه ويه خالتي بعد الي سوته بيه ..
من طبيت تلكاني عمي تحمدلي بالسلامه وايه حظنتني وبوستني وباركتلي ع النونو وحمزة همين ..
خالتي جانت موجودة شافتني دخلت للبيت گامت طبت لغرفتهه ..
باوعت لعلي اشرلي معليج ..
صعدت لغرفتي ..
اول مافتت تمددت ع الجربايه الواحد ميرتاح غير بس بفراشه وغرفته ..
ضايجه من علي لان جبرني ارجع لهنا ردت ابقى شكم يوم ببيت اهلي لو ببيت هاله بس مقبل ..
تريدين تنامين ؟
لا ..
تقرب مني وكعد يمي واني مطروحه ..
اخذ ايدي باسهه ..
وخرت ايدي منه ..
مزاعلتك وخر ..
قابلين عمي .. يجي الليل ونصالحج ..
محتاجه شي ؟
ليش شنو طالع ؟
اجيب عشه وارجع ..
شمشتهيه ..؟
ماعرف بكيفك..
الطبيب كال كبد لاتقصرون بالكبد .
موكولش احبه ..
بس لازم تاكلينه علمود نعالج فقر الدم ..
هسه راح تطلع ؟
اي ليش محتاجه شي ؟
اريد اسبح ..
خليهه ورة العشه ..
ماشي ..
عفيه اذا نزلت صيحلي آيه ..
كوليلي شرايده واني اجيبه الج ..
مرايده شي بس ماريد ابقه وحدي بين متجي ..
اهااا اوك ..
باسني بخدي وگام بدل مرة ثانيه وطلع يجيب عشة ..
شويه وصعدتلي آيه .. ظلينه نسولف .. اكثر السوالف الهه هي لغويه شسويلهه ..
الى ان اجه علي ..
لان خطر اسقاط ميصير انزل واصعد درج ولازم ابقه فترة نايمه ع ظهري وممنوع الرجال يتقربلي ولازم مراجعه لطبيبه اختصاص كل 3اسابيع ..
لهذا مانزلت العشه اجاني لحد غرفتي .. ايه جهزته وعلي صعده ..
علي اخذلي اجازة اسبوع وبعدهه نشوف شلون تصير وضعيتي ..
تعشينه سوة وبعد العشه ساعدني اسبح لان اكو كانوله بيدي ..
بعدهه دخلنه بفراشنه ونمنه ..
بعد اسبوع ..
خلصت اجازتي طلعت مرة وحده رحت للطبيبه گتلهه عدي دوام وامتحانات وماكدر بعد اتخلف عن دراستي خاف تروح عليه السنه ..
كالت عادي مسموحلي اداوم بس ما اتعب نفسي بالمشي ..
خالتي ابد ماشفتهه بس بيوم رجعت من الطبيبه ولان اني بغرفتي ومانزل ابد فلا شفتهه ولا صعدت لغرفتي ..
الطبيبه كالت تشوف وضعيتي بالدوام اذا ماكدرت ادبرة تسويلي ربط للطفل ولحد شهر التاسع وتفتحه علمود الولاده ..
بلشت دوام دنيا مداريتني ابد معافتني .. اروح ع كد المحاضرات لا اطلع ولا اطب ولا افتر حته من اجوع دنيا تروح تشتريلي واكثر المرات اقضي وقتي يم علي بمكتبه لوحدنه لان دنيا تستحي تجي وياي ..
فهو خطيه يوصي ع اكل وعصاير النه يجيبوا العمال للمكتب مالته ونكعود نتغده سوة ..
من بعدهه نرجع للبيت ..
صرت انزل جوة لان علي رجع يروح للمكتب العصر بس ميتأخر لل8او 8ونص يجي واضوج ابقه وحدي ...
خالتي مرتاحه منهه نتواجد سوة بغرفه وحده بس متحجي وياي ..
خطيه ايه وحدهه رجعت اساعدهه بشغل البيت طبخ ومواعين بس تنظيف واي شغلات ثكيله مالي علاقه بيهه واهم شي عد خالتي الطبخ لان هي هم موظفه رغم علاوي ابد ماقصر حته آيه ميتعبهه ويجيب اكل من برة بس الى متى لذلك اني لزمت الطبخ وخالتي مالهه علاقه بيه ..
رحت للطبيبه مرة لخ وسوتلي الربط ..
اهلي مارحتلهم من طلعت من المستشفى لحد اليوم ..
امي يوميه تتصل تتطمن عليه ومرات هي وابويه يجون ربع ساعه ويروحون وهاله هم تتصل ومرات تمر عليه شويه وتروح .. 5
للحكايه بقيه ..
اعتذر البارت قليل بس كوة كتبت ماعندي اي واهس للكتابه ولاببالي احداث واريد اركز ع احداث لقصه حمزة وهمس بس مالي خلك واريد اختم قبل رمضان ان شاء الله وماعرف شلون تدبر .. شاركوني توقعاتكم .. مبادئيا حمزة لازم يعرف بالموضوع بس تسلسل الاحداث شلون .. توقعاتكم تساعدني انسج شي مرتب من خيالي ..
