البارت 25
جحيمي وناري
ملاك الصمت 7
همس .. يمكن هاي اول عركه بيني وبين حمزة .. ماعرفت نفسي شلون جاوبته وشلون تفوهت بالكلام .. ابد ماظنيت بيوم انو ممكن اصحى من سكوتي وسباتي واثور لنفسي .. ومن اثور تصير بوجه حمزة .. عفت الدنيا كولهه وثرت بوجه حمزة ..
دخلت البيت واني جسمي كوله يرجف من كدما اعصاب ..
تلگتني هاله. ..
هاا هموسه شو متأخرة ؟
ها مو حمزة عزمني ع الغده ..
ياا هاي شبي وجهج اصفر ؟
مابيه ..
وج خاف سوالج شي احجي ..
لااا شبيج مسوالي ..
لعد شكو .. هي غير تحجي ..
تعاركنه ..
انتي ومنو ؟
اني وحمزة ..
ياا ليش ..
ميقبل ابقه عايشه هنا ..
ليش عيني ؟
يكول ضرغام رجال غريب وماطولج ع ذمتي ارجعي لبيت اهلج لو يستعجل بزواجنه .. 4
خيه حقه يغار .. وانتي شگتيله ؟
هو تعاركت وياه .. كتله مرة اخويه مأذيتني انوبه يكولي مو دزيتوهه لاهلهه ..
منين مااجيه محضرلي عذر ..
والله ماعرف شأكولج خيتي .. لعد صدوك احسن حل تستعجلون بزواجكم ..
شنو نستعجل انتي الثانيه .. اكولج هاله .. هو اني شفتهمت من حمزة ترة صارلنه اسبوعين بس من عقدنه ..
وهو شراح يسوي ؟
خيرني .. ياارجع لبيت اهلي من باجر الصبح يا يتصرف تصرف ميعجبني ..
مثل شنو يتصرف يعني ؟
والله ماعرف ..
دفوتي فوتي ارتاحي وشربيلج ميه .. الله كريم ..
ونعم بالله ..
فتت لغرفتي بدلت وسبحت وتمددت ع جربايتي ..
ظل بالي يودي ويجيب .. كل تفكيري يم كلامه انو يستعجل بزواجنه ..
شلوون واني لسه ممقنعته انو نستقل ببيت وحدنه قبل الزواج ..
غلط مني افتح وياه هيج موضوع وهو عصبي .. اوووف ربي دائما توقيتي غلط ..
اجتني رنوده بنت اختي هاله بصف رابع ابتدائي ..
خاله خاله عفيه قريني ..
تعالي شعندج ؟
علووم ..
اوك طلعيلي تحضيرج ..
ظليت اقريهه بس بالي مو يم القرايه كل شويه وتكولي لا خاله مو هيج المعلمه هيج شرحتلنه اخير شي طكت روحي منهه ..
ايا ملعونه اذا انتي تعرفين شلون تقرين تحضيرج والمعلمه شارحه الدرس شكو تكوليلي قريني ..
خاله شبيج مو اريد واحد يحفظني وانتي حبابه اذا اروح لماما تصيح عليه ..
مو بس ملعونه واستغلاليه همين ..
يله راح اشرح واثناء ما دا اشرح حاولي تحفظين ويايه حته من اخلص اخليج انتي تعيدين الموضوع ع الغيب ..
اوك ..
ظليت ادرس بيهه ووراهه درستهه انگلش ..
حاولت اقتل وقت بعيد عن التفكير بحمزة والعركه ..
صار المغرب صلينه وحضرنه العشه وتعشينه ..
متعوده حمزة من التسعه تسعه ونص يدوك عليه وللثنعش للوحده نظل نسولف وهو اكثر كلامه وياي غزل ويحاول يجرجرني بالكلام لسوالف جنسيه بس اني اتهرب منه لو اسده واسد النت واشرد انام ..
اليوم ماكو ولا اتصل ودز مسج ..
شفته ع النت نشط بس ميحاجيني ..
يعني زعلان ..
وشنو يعني اني هم زعلانه وماريد احاجيه .. زعلانه منه ..
بس اشتاقيتله ..
ظليت اتصفح واتفرج فديوات لحد ماصارت ب 12
باجر عندي دوام والضوجه تقرة الف عندي وحمزة ايست منه يتنازل ويحاجيني ..
لفيت راسي ونمت بس مختنكه من شعور الضوجه ..
ثاني يوم رحت لدوامي وهمين مراليوم بدون ميتواصل وياي حمزة ..
هاله دائما تسألني .. ها مااتصل مادزلج مسج وجوابي هو لا ..
لازم واحد بيناتنه يتنازل واني بصراحه اشتاقيتله ..
صار اليوم الثالث ..
جنت بالدوام بحدود الساعه دعش ونص الشغل قليل بهيج وقت ..
اكو نت بالمستشفى واعرفه بهيج وقت هو بالمكتب ..
طلعت رقمه ظليت صافنه عليه بعدين تجرأت دكيت ..
دك دك ..
طلعلي صوته ..
الوو ..
...
همس ..
من كال همس تمنيت اكوله مشتاقتلك ومشتاقه لصوتك ومشتاقه اسمع اسمي بنبرة صوتك بس عوبه محجيت شي ..
هلو حمزة شلونك ؟
سمعته تنهد .. وزفر الهوا ..
بخير .. انتي شلونج ؟
زينه .. ليش متسأل ولا تتصل ؟
يهمج ؟
اكييد طبعا ..
شو ممبين ..
شنو قصدك ؟
انتي وين ؟
بالمستشفى ..
ومن ترجعين ليا بيت تروحين ؟
لبيت اختي ..
زفر بقوة ..
يعني عاندتيني ومشيتي الي براسج ..
لا معاندت بس گتلك ماكدر مو عناد هو ..
تمام .. اني اعرف شلون اتصرف .. يله روحي عندي شغل ..
مالحكت اجاوب ولا احجي شي رأسا طبگه بوجهي ..
ظليت صافنه شنو هالتصرف عبالك مدا اعرف حمزة .. يعني عبالك عنده وجهين لو شخصيتين .. لو حنت مطيعه واسمع الكلام يطلعلي وجه حمزة العاشق المحب الغزل والاهتمام ومحد يلحگه ومن اعانده ينگلب عليه 180درجه ..
خوفني طبعه واخير شي خوفني تهديده .. يعني شنو اني اعرف شلون اتصرف شراح يسوي ..
ظليت افكر تالي التهيت بشغلي ..
خلصت دوامي ورجعت للبيت بدلت وسبحت ونزلت اتغده ويه هاله سولفتلهه ع الي صار مخابرتي اله وكلامه وياي ..
گالت .. شيريد يسوي يعني اتركيه خلي يهدئ وحاولي تغيرين اسلوبج وياه هذا يكره البنيه العنيده باوعتلي صفح گالتلي وانتي منين طلعلج هالعناد من تالي مو جنتي مثل الورد يكولج روحي يمين تروحين يمين يگولج شمال تروحين شمال ..
ضحكت صدوك كلامهه صايرة ارد مااسكت واعاند ..
يعني شتريديني اسوي ارجع لضي
تكمله البارت
