عذاب يتيمة 🔗 (باللهجة العراقية)

البارت الثاني

#الكاتبة :

گعدت رونق على صوت المنبه ، راحت غسلت وجهها و نزلت جوة للمطبخ سوت ريوگ خاطر تروح للمدرسة ؛ گعدت اخوها و سوت اله ريوگ ، بدلت و طلعت للمدرسة .

..

#رونق :

بدلت ملابسي و طلعت من البيت ، اليوم خميس و هم اخر يوم قبل الامتحانات النهائية ، دا امشي و ما احس غير واحد كأنو يمشي وراي ، التفتت لورة بس ماكو احد !!
گلت يجوز اتخيل ، مشيت و وصلت للمدرسة و دخلت شفت صديقتي سمية ، هي صديقتي المفضلة و من الابتدائية وياي ، شفتها ما منتبها حبيت ازعجها بتصرفاتي الطفولية 😛 .

..

#الكاتبة :

رونق راحت من ورة و دغدغت سمية ، سمية استغربت من الجرح يلي بوجه رونق لذلك سألتها عليه هيه من گلتلها شذى سمية تخبلت گامت تغلط و تسب و تدعي عليها لأن مشوها وجهها ، سمية حبت تخلي هذا اليوم حلو بالنسبة لرونق لذلك اشترت الها هدية ..
اشترت الها - عقد - بيه مرساة مال السفن و فضية .
طلعت سمية العلبة و أعطتها لرونق ، رونق تفاجأت من شافتها ، اخذتها بعد ما شكرت صديقتها على هاي الهدية الحلوة ، من فتحتها انصدمت لان هيه تحب السفن هواي و تتمنى تركب وحدة فد يوم من الايام .
لبست العقد من فرته -دارته- لورة شافت قلب بيه (S+R=❤) .
راح الوقت و فات و خلص الدوام ، رونق حضنت صديقتها و طلعت راحت للبيت ، بالطريق رونق چانت تباوع للعقد و تمشي لذلك ما انتبهت للشارع بيه سيارة تمشي سريع .
رونق انصدمت و ما گدرت تتحرك خارت قواها لان السيارة جاية ناحيتها ، ما حست غير واحد سحبها من أيدها .

..

#رونق :

بصراحة انصدمت لان السيارة جاية ناحيتي و سريعة ، اني گلت هذا يومي يلي راح اشوف بيه ماما بس ما حسيت غير واحد سحبني من ايدي .
اني حيل تأذيت لان وگعت بالگاع ، رفعت رأسي و شفت نفس هذا الولد يلي اجة البارحة ، اني صرت حمرة استحيت و فوگها من الوگعة ، اعطاني أيده .

عباس : اعطيني ايدچ و گومي !!
رونق : لا ما اريد شكرا الك .

شفته مثل ضاج أو هيچ شي ، اني گمت بس صدريتي كلها تراب صارت ، نكتت صدريتي كلها باوعت اله بدون ما يحس ، چان يباوع الي من فوگ لجوة و كأنو دايتأكد اذا انجرحت أو لا !!

عباس : اتأذيتي !؟
رونق : هاا .. اي ايدي و ركبتي انجرحن شوي .
عباس : انتي وين چنتي سارحة و ما منتبها ؟؟
رونق : اني بسـ...
عباس : هسه لو صاير بيچ شي شنو اسوي اني بهاي الحالة !!؟
رونق : شكرا الك و ما صار شي .
عباس : استغفر الله ربي ... اني عباس ابن عمها لشذى و صديق ابوچ .
رونق : اي اهلا و سهلا ... اني رونق .
عباس : امشي يالله خل اوصلچ للبيت .
رونق : لا ماكو داعي اني اروح وحدي .
عباس : لا لا امشي وياي و هسه راح اخابر ابوچ .
رونق : لا لا لا تگول لبابا لان راح يصير عصبي و اخاف يضربني !!
عباس : ماشي .. يالله امشي گدامي بسرعة.