عذاب يتيمة 🔗 (باللهجة العراقية)

البارت الثامن

#عباس :

چنت بالشغل الظهر و دگ التلفون ، اني غلست لان تعبان و عفته كملت شغل ظل المتصل يلح لذلك رحت بدون ما اشوف الاسم سويته صامت ..
من كملت شغل اخذت التلفون و رجعت للبيت بالليل ، دخل و شفت امي تبچي و تروح منا و تجي منا ..

عباس : شكووو !!؟؟
رباب : يمة مرتك ماكو !!! .. طلعت للسوگ و من رجعت ماكو ما لگيتها !!!..

اني انصدمت صدمة العمر صدگ .. رحت اركض لغرفتها و فتحت الباب ما لگيتها ، رحت لغرفة وردة و همزين موجودة ..
گعدت بالگاع يم چربابة وردة و خليت ايدي على راسها و عيوني دمعت ، اجت امي جرت راسي و خلته بحضنها و گلتلي ابچي لا تحصرها بگلبك ..
اني بچيت مو علمود شي بس ..

تذكرت حبيبتي يلي حبيتها و عافتني و راحت ، ما اعترض استغفر الله هذا قدرها و عمرها ، بس چنت احبها موت و هيه هم تحبني ..
گمت من حضن امي و باوعت الها بنظرة عصبية ..

عباس : لحد يجيب طاري للناس ان هي شاردة گولوا هي يم اهلها لان ابوها متوفي و حالتها النفسية مو زينة شوي .
رباب : صار يمة بس ..
عباس : بس شنو ؟!
رباب : اذا اجت رجعت شنو تسوي الها ؟؟
عباس : اذا رجعت .. اذا رجعت ما راح تشوف عباس ، راح تشوف واحد اسوء منه .. راح اخليها تندم على شردتها ويا ابن عمها .
رباب : ابن عمها ؟؟
عباس : اي ابن عمها ، اني متأكد شردت وياه لان واحد يحب الثاني .
رباب : بس انت شمدريك ويا ابن عمها ؟؟!
عباس : لان ابن عمها ما موجود صار يومين و بلغوا بفقدانه و اكيد هو شرد و انتظرها و هي شردت هسه وياه .
رباب : استغفر الله .. يا يمة ليش هيچ تگول ؟! ، يجوز شردتهم صارت بوقت واحد من دون قصد و الا هي شمدريها بيه ؟؟
عباس : انتي وين ؟! ، اقصد غير هي عندها تلفون اكيد واحد حچة ويا الثاني و الا شمدريها بموت ابوها ؟؟
رباب : يجوز شذى هي الخابرتها !!
عباس : لا يمة ما معقولة الحية شذى تخابرها .. عوفينا من كل هذا ، صبيلي غدة و كأنو اني اصلا ما تزوجت ..
رباب : صار يمة تدلل .

گامت امي و اني ظليت صافن بيلي صار ، بس ما معقولة تسويها لان هي حلفت ان ما تحبه بس شلون .
استغفر الله ربي و اتوب اليه ، هي على الضرب مالتي والله حتى فاطمة الله يرحمها لو مكانها هم تشرد .
بس بسيطة .. مو عباس ابن ربيبة (رباب) هيچ تذلة طفلة و تسوي حچاية بحلگ الكل ..

رونق :

چنت گاعدة على السفرة مال الاكل و دگ سوالف ، باوعت للساعة و شفتها بالسبعة بالليل انداريت على عمتي (ام كرار) .

رونق : عمة هم الولد ابنائچ دائماً هيچ يتأخرون ؟!
ام كرار : اي يمة .. بس كرار يجي من وكت .
رونق : ها الله يحفظهم ..

كملت اكل و باوعت عليهم و بالغلط زلفت عيني على كرار شفتة يباوع الي و رافع حاجبة .
اني استغربت و گمت بسرعة رحت اغسل ،ما ارتاحيت لهاي النظرة ، ما حسيت غير واحد واگف وراي .
بسرعة انداريت و شفتة كرار مدنگ و مبتسم ، اني خليت ايدي على گلبي و وخرت منطريقة للمغسلة .