حبيبه السلطان

p11

((((((سلطان ))))

خلصت الغرفه وحجزت اشياء العرس وحجزت غرفه بالفندق

وتقريبا خلصت

رحت ويه جماعتي اشتريت كم قطعه ملابس جديده و رحت للحلاق زينت ورجعت نمت .

ثاني يوم بالخمسه جان العقد مالتنه وكلها ملتمه وسوينه عزيمه جبيره هم

وصل السيد الي يعقدلنه فرحنه لغرفه ام ساره لان ساره يمها ومن وره الباب السيد عقدلنه نوب دخلنه وشفتها

لابسه فستان اسود كلش لايكلها ومنزله شعرها ومكياج كلش خفيف طالعه تجنن رفعت عيونها الي جنهن زمرد وباوعتلي بدموع خفيفه كسرت كلبي ورجعت نزلت راسها لبستها الحلقه ولبستني و بست راسها وطلعت .

ثاني يوم جان الخميس كملنه هوسه العرس والتحضيرات و اني بدلت وخلصت وخابروني اجي اخذهن من الصالون ونصور ونرجع للبيت

رحت انتظرت شويه واتصلت على ازهار كالت .. هسه نطلع لحظه

شويه وطلعت ساره جانت لابسه شيء مغطي راسها وجسمها وما مبين شيء من ملامحها

دخلت بالكرسي الوره وبصفها ازهار وبالكدام والدتي.

رحنه للمصوره فنزلت وساعدن هنه ساره حتى تنزل ودخلنه لصالة التصوير .

هناك ونزعت ساره الشيء الي جان حاجب عني جمالها

باوعتلها سبحان الي خلقها وسواها جانت كلش حلوه جنها حوريه نازله من الجنه .

الفستان مخصر عليها وناحت جسمها نحت و المكياج والتسريحه كلشي بيها جان حلو

باوعتلي فأابتسمتلها و ماردت الابتسامه انزعجت بس انطيتها الحق .

صورنه كم صوره يمكن بالخمسه وكالت كافي تعبت ما علقت بشيء لان ادري راح تبجي فرجعنه للبيت هناك وصارت الحفله والمباركات والركص والتهيت ويه الشيوخ والناس الي جايه تباركلي .

دخلت بس انه وابو ساره وجدي وابوي واخويه علي ليجوه يم النسوان كعدت شوي يم ساره حاولت احاجيها بس متجاوب كلش ضوجتتي فعفتها كلت مااكبر رأسها .

(((((((ساره)))))))

ماعرف شنو جان احساسي بوكتها حسيت روحي ميته وكلها دتتحكم بيه

شربي سلطان عصير شربته وكلي وكلته لبسي لبسته امشي مشيت كعدي كعدت

اخير شيء هلكت وظليت بس كاعده وابتسامه جذبيه من البدايه عالقه بوجهي