#النساء والريح الحمراء
بقلم...ليوثي المياحي
الله حي.. الله حي....الله حي....
يا اسيادنة خلصوني ,,,ااااااي السماح السماح؟؟؟ السماح يا اهل السماح ؟؟؟؟
دخيلكم ياسيادنه ..دخيلكم... السماح ...السماح؟؟؟؟
صوت الدفوف تردح ...وصوت الزار يدك..يدك..يدك...
وبدت اغنية بشير اوية الاغنية الركص والحركات المخربطة تكول مخابيل وحدة تتلوة بجسمهه والثانية تدبج على الكاع..حركات ما ادري شلونهه.. تكول مالت هذولة اكلين لحوم البشر .. وكلما صوت الدفوف يعلة الاغنية وصوت الكدية يعلة الحركات اتصير اقوة واعنف... والكدية هاي المرية اللي تغني ويسموهه شيخة الزار .. تغني في سبيل يحضر بشير... راح اتسئلوني منو بشير... بشير هذا جني وهوة المسؤول عن الطلبات .. يعني هوة يطلب ..ولازم تتنفذ طلباته حرفيا..اللي ديسوولهه دك زار.....
علة صوت اغنية بشير وريحة البخور والدم اللي يمسحون بيه وجه وراس النسوان اللي لابسات اخضر وابيض هيج ثياب مدري شلونهن تكول شليف ومغطين وجوهن بس العيون يبينن ..زاد صوت دك الدفوف والشيخة علت موجة صوتهه وكامت تغني ...
يا بنت امي يا أم الولد
يا امُ الولد والعفو منج
يا امُ الولد واشفي مريضج..
يامُ الولد والطبل طبلج
يا امُ الولد والذبح ذبحج
يا ام الولد وكلهه عندج
يا ام الولد والليلة ليلتج
يلوولي..يلوولي.. غيركم مايحلولي...
بهل اثناء طبعا زاد الركص والحركات العشوائية المخبلة جان وحدة من النسوان دخلت بحالة هستيرية وكامت تنفش بشعرهه وتسوي حركات مخربطة وكامت تلف ودور على نفسهه وجان توكع بالكاع.. جن النسوان ولتمن عليهه وسحلنهه من اديهه نوموهه وجتي الشيخة واخذت من الدم وكامت اتمسح بشعرهه وبوجهه ..وهية تصرخ وتعيط.. ودفر برجليهه ...بعدهه مرية ثانية هم صار بيهه نفس الشي وكعت وسحلوهه وهم دموهه.. وية استمرار دك الدفوف وكامت الشيخة والنسوان يغنن اغنية لولي يالولية والنسوان يهزن ويركصن مثل المخبلات...
الساعة تعدت الثنعش الصبح واصوات الدفوف والدك والزار مشتغلة وبعلو صوتهه..
عمي عمر جان نايم ع السرير مالته .. وبس يتكلب نوبة يخلي المخدة على راسة ونوبة يضم راسة جوة الفراش.. يتكلب يمنه ويسرة ..هاي كل يوم يصير بيه هيج.. بس اليوم الشيخة زودتهه هواية.. احنة كلياتنه صاحين انتاني شوكت تخلص حفلة الشيخة حتى نلف روسنة ونام .. جنة هواي نخاف من هاي الطقوس اللي اتسويهه الشيخة .. بالكوة يالة نمنة وجه الصبح...
عمي عمر راح المركز الشرطة بعد ما كضة الليل كله صاحي بلة ما ينام ..قدم بلاغ للشرطة بجيرانة الشيخة حميدة بالازعاج .. اهل المحلة محد قبل يروح وياه.. لان جانو خايفين اتسويلهم سحر فجانو يبلعون ريجهم وهمة ساكتين .. الشرطة جتي على الشيخة حميدة وكالولهه رايدينج بمركز الشرطة لان السيد عمر مقدم عليج بلاغ بالازعاج..وممارسة طقوس الزار ..
حميدة كالت للشرطي بس اني جاي امارس شغلي اللي عايشة من وراه ؟؟ واللي ما عاجبة خل يشيل منا اني ما جابرة احد يسكن يمي ..
الشرطي كاللهه أي بلاغ يتقدم ثاني مرة راح نضطر نجيبلج امر اخلاء من البيت اللي انتي مستاجرتة افتهمتي لو لا؟؟؟؟
باليوم الثاني حميدة سوت حفلة مالت زار وبقت للساعه تلاثة الصبح يمكن سوتهه شغلة عناد.. وما اهتمت لبلاغ عمي عمر ..الناس اللي بالمحلة والجيران ضاجو هواي منهه.. اجوي على عمي واجتمعو وراحو لمركز الشرطة وقدمو بلاغ ثاني على الشيخة حميدة ..
الشرطة اجتي وجايبة وياهه بلاغ باخلاء البيت اللي تسكنة الشيخة حميدة ..من طلعوهه الشرطة من البيت كامت اصيح وتعيط بنص الشارع والجيران والناس ملتمة..كالتلهم اصبرولي انتو اللي طلعتوني من بيتي ..وبقت اصيح وتعيط يااهل المحلة يا باطلين يلي ما بكلوبكم رحمة تطردون مرة ما الهه احد من بيتهه وذبوهه بنص الشارع ..وينك ياشيخي المسلم تعال خلصني من هل وحوش تعال ياسيدنه وخلصني ؟؟؟
الشرطي كاللهه يلة امشي شوفيلج مكان ثاني روحي اسكنية وسوي اللي ترديه بس بعيد عن راحة الناس ..الشيخة عاندت وما رضت تمشي الشرطي كاللهه انتي مخبلة شنو يلا امشي.. لا اخليهم يسحلونج سحل..
حميدة من قهرهه كامت اتصيح ابصوت عالي ..اسمعو انتو يا اهل المحلة اني طالعة من يمكم وما كاعدة وياكم بعد بس أي بنية من بنات المحلة مراح تزوج اله اخليهن كلهن يعنسن وعلة جثتي اذا وحدة منهن شافت الزواج من أي رجال..اله اوكف حالهن واكعدهن ببيوتهن واخليهن بايرات يااقذر محلة عرفتهه بالدنية اصبرولي بس حتى تعرفون حميدة شراح تسوي بيكم...تفوووووووووو عليكم...
طلعت حميدة من المحلة والحجي مالتهه بقة يدك باذهان اهل الحي كلهم .. اكو ناس اخذوه من صدك وكام يخاف من غضب الشيخة واكو ناس اخذوه على انه كلام شعوذة ودجل ..واللي كاتبة الله يصير ..
مشة الحال بالمحلة والناس مرتاحة تنام ليلهه بدون ازعاج والصباحية تطلع لشغلهه ..
مر سنتين على هل حال وبهل سنتين ماكو ابنية تزوجت او انخطبت واللي يمشي على بنية شغلتة ماتكمل.. الناس بدو يضوجون وكامو يفكرون ويصدكون بالحجي اللي كالته الشيخة حميدة..
**الشيخة حميدة كدية يعني شيخة زار ورثة الشغلة من اجدادهه وحبوباتهه لان كلهم جانو يسوون طقوس الزار ويامنون بيه حميدة جانت البنت الوحيدة لامهه وابوهه واثنيناتهم متوفين وبقت وحيدة وية خالتهه الحجية فاطمة .. وحميدة تكول عن قناعة ان الزار يعالج الامراض النفسية ..وجانت رافضة حقيقة انو اللي اتقوم بيه من اعمال هو دعوة حضور الجن والعياذ بالله وكل الطقوس اللي جانت اتقوم بيهه هي طقوس عبدت الجن ويكونون خاضعين لاوامرهم .. واذا ما نفذوهه الهم الجن ياذيهم او يخبلهم .. الشيخة حميدة عدهه بخور خاص وكلام طلاسم ما مفهوم واغاني وشغلات معينة يسووهه الهم حتى الخدام اوالاسياد كل واحد حسب اللي يحلالة تسميته اللي همة الجن والعياذ بالله حتى يرضون عليهم...
حميدة من طردوهه اهل المحلة ..راحت سكنت يم خالتهه فاطمة باطراف المحلة.. فاطمة جانت هم تمارس دك الزار بس اتفقو اثنيناتهم يشتغلون سوة ..وضلو يشتغلون بهل كار .. جانت الخبرة والحيل الي يقشمرون بيهه النسوان وخاصة من يغمة عليهن.. جانن يحبن هاي المهنة واللي جانت اجيبلهن ربح وفلوس هواي..
مرة فاطمة كالت لحميدة انتي شسويتي لناس المحلة مالتكم وهيـج الناس تكرهج لان اجاني خبر انو من عفتيهم وطلعتي من المحلة ماكو ولا وحدة من بناتهم تزوجت ..
كالتلهه ..خالة لا تذكريني بيهم ما اسمة حميدة اذا ما خليت بناتهم اتعفن من الكعدة بلا زواج..
شيوخ المحلة اجتمعوا وبقو يتناقشون بالموضوع وبين مخالفين وقابلين ومؤيدين ان شيخة الزار هي السبب باللي ديصير ابناتهم وبمحلتهم.. بالاخير اتفقو يرحون يشوفون شيخ بلكي يعرف اللي ديصير ويخلصهم من هاي اللعنة ..
راحو للشيخ عيسى ..وحجولة على كلشي .. كاللهم شوفو هاي المرة مسويتلكم سحر قوي وصعب .. كالولة وشلون نكدر انبطل هل سحر شيخنة كاللهم اذا تردون اتبطلون السحر ..محتاج تعاونوني اريد منكم اجيبولي بخور اسمة الشذاب من يم العطار وتجيبون كرنفل هواي واريد منكم اربع رياجيل قواي وسباع وميخافون حتى اكلفهم بشغلات ثانية..
رياجيل المحلة ضلو واحد يباوع بوجه اللاخ وكل واحد يرشح الثاني للمهمة العصيبة بالنهاية طلعو اربع رياجيل من الشباب ..الشيخ شعل البخور وحضر شغلات الحجاب وهمة راحو جابو بخور الشذاب والكرنفل واجو للشيخ ثاني يوم .. الشيخ كام يكول كلام ما مفهوم ويكتب بالورق طلاسم وبعدين لفهن بخركة مالت قماش ..ورة ما خلص كاللهم ....وللحكاية بقية
