النساء والريح الحمراء
بقلم...ليوثي المياحي
خالتي سوسن..كالت..اي والله صحيح..تذكرت من حميدة طردوهه من المحلة..توعدت كالت اله اخلي البنات يبورن ويعنسن ببيوتهن..اي والله..اني شلون فاتني هل موضوع..شلون فات علية..
امي كالتلهه..ميخالف ما صار شي..امشي روحي لحميدة..خليهه تفك العارض مال بنتج...
خالتي سوسن كالت لامي..انتي رحتيلهه..مو..؟؟
امي كالتلهه..لا..لا..اني ما رحتلهه..بس هنودة بنتي..راحت عليهه وفكت العارض مالتهه..
خالتي كالتلهه..عيني بنتج سباعية ..مو مثل بنتي..الخوافة الغبية..
امي تحجي بسرهه وكالت الله واكبر عليج..بساع نكيتي على بنتي...
خالتي سوسن مشت بس هية تعرف انو رجلهه..مراح يرضة ..على روحتهه للشيخة حميدة..بس كالت اروح ..اروح ..لان خايفة على بنتهه جنان..من الكعدة بلا زواج..
من وصلت وشافتهه حميدة ..كيفت..وكالت بسرهه..واخيرا..اجة دورك ياااا ياحجي عمر..وعوجت حلكهه ..اذا ما ندمتك..على اللي سويته بيه..ما اكون اني حميدة..
خالتي سوسن..كالت لحميدة..خيتي حميدة اني جايتج واريد اصالحج واريد اشيل الزعل اللي بيناتنه..ونصفي الكلوب..جيتج اريد اتفكين العارض لان بنتي كبرت..ولسة نصيبهه ما اجة ..اني اعرف الحجي زمان اتبلة عليج وتجاوز..بس ماعليج امسحيهه بوجهي..واعتبري جنان..بنتج..ترضين لبنتج تكعد وتعنس من غير زواج...
حميدة كالتلهه..لا..لا..خيتي..لا تحجين هيج..الفات مات.. واحنة من هاي الليلة ..خوات وحبايب..
خالتي سوسن كالتلهه..هوة هذا عشمي بيج..حبيبتي..والله اني كلت اليلى ..ام هنوودة..ان حميدة هاي مرة طيبة..وما ترجعني.. وتفشلني!!!
كالتلهه اي اكيد..ما افشلج..انتي تدللين..بس اذا تردين عارض بنتج ينفك..لازم نروح للشيخ الحمزاوي ..لان ..صيتة جبير..وكلهه اسبوع بس وتلكين بنتج..مزوجة..وتفرحين بيهه وتشيلين عيالهه..
خالتي كالتلهه..اي اروح وياج..بس ما اريدج تكولين سوسن ام جنان..راحت وياي للشيخ اللي اسمه الحمزاوي ..لان رجلي حجي عمر اذا عرف يطلكني ومايخليني دقيقة ابيته..لان هوة ما يؤمن بهاي شغلة الشيوخ والزار..
حميدة كالتلهه لا تخافين..خيتي سرج ابير!!!
خالتي سوسن راحت للشيخ الحمزاوي ..والخوف كاتلهه..بس قوة كلبهه لخاطر بنتهه..حميدة كبل متوصل وصلتله خبر بيد وحدة من العاملات..كل اللي صار بينهه وبين خالتي سوسن..او وصته يطلب منهه طلبات هواي..من وصلو للشيخ الحمزاوي ..كام يطلب من خالتي طلبات هواي وغالية حتى يفك عارض بنتهه...اني هم جان يطلب مني طلبات هواي وغالية..بس اني جنت ما اهتم..لان خالد رجلي يدزلي فلوس والحمد لله متمكنه...بس خالتي سوسن ما تكدر تطلب من رجلهه خاف يشك بيهه..كامت تاخذ من ولدهه الكبار..حتى اتكفي لمطاليب الشيخ الحمزاوي ..
وبفد مرة خالتي سوسن كاعدة بالبيت..الباب اندكت ...راحت تفتح الباب..لكتهم ناس كرابة رجلهه ..كالولهه رايدين حجي عمر..دخلتهم بالاستقبال.. ورحبت بيهم..وراحت صاحتلهم ..الحجي..سلم عليهم.. وبعد السلام والتحيات والاشواق..طلبو ايد جنان الابنهم...خالتي سوسن فرحت وطارت من الفرح..وكامت تهلهل..وراحت تركض على بنتهه جنان حتة تبشرهه ..وتصيح الف مبروووك الف مبروووك يبنتي..ان شاء الله تتهني يمة يوم المنى من اشوفج مستته ابيت رجلج..
جنان جانت نايمة بسابع نومه..وما صحت برغم الصياح والهلاهل مالات امهه..جانت حلمانة انو هية مربوطة بشجرة..بالحبل وماتكدر اتفكة..وبنفس الوكت تريد تصيح بس الصوت ما يطلع من حلكهه..شايفة ابوهه واكف بعيد وهية تصيح عليه حتى يخلصهه ويفك الحبل..بس ابوهه مايسمعهه..باوعت على الجهه الثانية شافت امهه.. واكفة تباوع عليهه..وصافنة ما تتحرك..ولا تجي اتساعدهه رغم صياحهه وعياطهه..باوعت كدامهه شافت رجال جبير عندة لحية..ولابس دشداشة مركعه..ومشككه..شايل بايدة قمجي..ويباوع عليهه..وهوة مكيف ويضحك ويمة واكفة حميدة بابتسامتهه المكارة..وهية اتصيح بعلو صوتهه على ابوهه بس مايسمعهه..ترد اتباوع على امهه تريد تجي تركض عليهه بس رجليهه تراوح بمكانهه وماتكدر تتحرك..
جنان صحت من النوم..وهية تصرخ وتعيط..ياااااااااااابه..ساعدني ...يااااابة لا تخليني وحدي..يااابة راح اموت..!!!امهه وابوهه اجوي ركض..عليهه..امهه كعدت يمهه..وكالتلهه اسم الله بنيتي..بسم الله شبيج بنيتي..جنان كالتلهه كابوس يمه كابوس..عمي عمر كاللهه انتي صليتي صلاتج..جنان كالتله..لا والله النومه اخذتني ومصليت..عمي عمر كاللهه وهوة عصبي..شفتي من هيج الكوابيس ..والاحلام المزعجة تجيج..دكومي استغفري ربج..وصلي صلاتج..كالتله والله يا يابه اني جسمي مكسر احسة واليوم كلة اريد انام..ما ادري شبيه دوووم نعسانه..
كاللهه..شنو هل حجي بنتي..كالتله والله ما اعرف يابة وحتى الصلاة احسهه ثكيلة علية..وماكادرة اصليهه..واول ما افتح القرآن حتى اقرة جزء منه..احس بنعاس هواي وعيوني يقفلن..
كاللهه هذا كلام اعوج..وتبرير اقبح منه..انتي اللي جنتي صلاتج ما تفوتينهه والقرآن ما ينزل من ايدج..واذا ما قريتي حتى آية..ماترتاحين..
كالتله..اي والله يابة ..ما اعرف شبيه..
كاللهه..اتحصني واقري المعوذات..يومين ونشوف..اذا بقيتي نفس الشي ..انشوف حل..
خالتي سوسن..كالت ..اني اكول هذا من التعب والارهاق..بس جنان تعالي شوفي البشارة اللي جبتهه الج..
جنان ..كالت خير امي شني البشارة..
كالتلهه تعرفين مروان..ابن عمج..سعد خليل..
كالتلهه..سعد خليل منو..هذا..
عمي عمر كاللهه..سعد خليل احمد هذا ابن عمي الح..
جنان كالت اي اتذكرته...شبيه..خالتي سوسن..كالتلهه ..جوي خطبوج لمروان ابنهم..
جنان كالت..خطبني اني !!!
امهه كالت..اي خطبوج انتي..شبيج شنو ممصدكة..كالتلهه ..لا بس هوة وين شافني حتى يجي يخطبني..
عمي عمر كاللهه..شافج بعرس نرجس بنت عمتج..وعجبتيه..وهسة هوة مسافر برة الديرة ..واجة يريد يزوج ويرجع يسافر..
خالتي كالتلهه..وانتي شعليج وين شافج..المهم يريد يزوجج وهايهية...
عمي عمر كاللهه..هاي شبيج يمرة دير بالج اتغصبين البنية على شخص هية مرايدته..طبة مرض يروح يجي غيرة...
خالتي سوسن كالت..يمة يروح شنو ..هوة هذا يتفوت..بسهولة اشو ما شاء الله..عليه..خوش ولد ومهذب..ومحترم..وعندة فلوس وعقد شغل برة ...
جنان كالتلهه..يمة ترة الفلوس مو كلشي ..اني ما اريدة علمود فلوسة..اريدج تعرفين..
ابوهه كاللهه..الله يكملج بعقلج..بنتي..سمعتي يامرة..لا ضلين اتنكين ابراسهه خليهه براحتهه..بنتي جنان استخيري ..وبعدين انطينه جوابج..
جنان كالتله ..اي يابة كلامك صح بس اني ما اعرفة حتى استخير بيه..كالي ..ماشي اني راح اخليه يجي..للبيت واريدج تكعدين وياه ..وتتعرفين عليه وبعدهه استخيري..
كالتله زين يابة ..امهه خالتي سوسن كيفت هواي..واعتبرت..الاستخارة دلع بنات ..نشرت الخبر بالمحلة ..انو بنتهه جنان خطبوهه..راحت على حميدة وشكرتهه هواي..انو فكت العارض من على بنتهه بس حميدة استغربت لان هية متفقة وية شيخ الحمزاوي..ان البنية لاتنخطب ولا تتزوج ويوكف نصيبهه..لحد ما تتمرض وتموت ..بس ما تعرف ان ارادة الله فوك كل شي..
حميدة راحت للشيخ الحمزاوي وسالته..كالتله شلون جنان مخطوبة..كاللهه ..منو اللي خاطبهه..كالتله ابن عمها..بس مو الح..يصير ابن عم ابوها..واسمه مروان..ويريد يزوجهه ويسافر..
الشيخ الحمزاوي كدر يعرف بطريقة من الطرق مالته..كلشي على مروان..وكام يشتغل عليه..
اني كمت اغار ..والنار شبت بروحي..شلون جنان البايرة الحاقدة راح تتزوج وتسافر وية رجلهه..انوب...اوووف..لبست عبايتي ورحت لحميدة وكلتلهه لازم نخلي الشيخ..الحمزاوي يخربط كل الامور ويفلش العرس..حميدة طمنتني..ان الشيخ الحمزاوي..راح يفركش هذا الزواج..ومراح يخليه يتم..اطمنت وكيفت بداخلي ورجعت للبيت واني احس نشوة الانتصار..رحت على بسمة وحجيت الهه..بسمة كالت..زين اني ليهسة ونصيبي واكف لا زواج ولا شغل ولا اي شي صار..كتلهه اصبري ولا تستعجلين على رزقج ..يصير خير..
فات اسبوع.ومروان اجه حتى يتشاوف هوة وجنان.
مروان جان كلش حلو معاني وجهه مقسمة..ومهذب ..ومبين عليه متدين زيادة من اللحية اللي امربيهه..واللي ايشوفة يكول من الجماعه .....؟؟؟
مروان اجة وكعد بغرفة الخطار..عمي عمر صاح على جنان حتى تجي وتكعد وياه..جانت جنان لابسة عباية حلوة..وغالية..جان اخوهه دازهه من برة ..ومجانت مخلية مكياج قوي ..كلشي مخليته خفيف كلش..دخلت لغرفة الخطار وسلمت على مروان..جان يباوع بالكاع وما رفع عينه..ورد السلام..وما رفع راسة الا بعد ما كعدت..اني رفعت راسي وهوة هم رفع راسه بنفس اللحظة....وللحكاية بقية
