النساء والريح الحمراء
بقلم...ليوثي المياحي
مروان راح سافر طلع لسوريا..بس ضميره ما مرتاح..لان عاف جنان وهية بهاي الحاله التعبانة..وهوة يعرف شكد هية محتاجته بهاي الضروف ..حتى يخلصهه من وسواسهه..والشك اللي عافهه بيه..فقرر يرجع..ويحاول يساعدهه وبلكي تكدر اتسامحة..
مروان من اجة يريد يشوف جنان ويتعرف عليهه..بذاك اليوم..كعد كباللهه..ورفع راسة وباوع عليهه..حس بكهرباء نتلته..نتله قوية هزت جسمه..وحس برعشة حست بيهه جنان ..اللي فزت وكالتله خييييير شبييييك..مروان باوع على وجهه جان يشوف وجه قبيح..كلش...قبيح شكد متتصوروه..وصعبة اي انسان يبقة مبحلك بيه..راد يكللهه شنو هذا وجهج..بس الكلام طار من راسة وكام يخربط بالحجي ويحجي شيش بيش..بدون ارادته..يعني واحد ديحجي بمكانه..وما يكدر يتحكم بالحجي..من حس على روحة..كالتله..انته شدتحجي..هوة جسمة جان كله يرجف..كاللهه ممكن دقيقة اروح للحمام..كالتلهه اتفضل
مروان دخل للحمام وجسمه عركان وكام يكول..وية روحة..يا الله هاي شنو..هاي مو جنان اللي اني شفتهه بالعرس..لا..لا..مستحيل..تكون هية..معقولة ديضحكون علي..وجايبين غيرهه..لا لا ممعقول..لازم اكو شي مو طبيعي بالموضوع..اي اكيد اكو شي مو طبيعي..استغفر الله..استغفر الله..اتوضأ وطلع من الحمام..واجه كعد كبال جنان..وما باوع عليهه.. خاف من منضرهه غطة وجهه باديه..وكام يقرة اية الكرسي والمعوذات واواخر سورة البقرة..وتفل باديه..وكام يمسح بجسمه كله..وجنان كاعدة وتباوع عليه..وهية مستغربة منه..وراهه رفع اديه من على عيونه باوع على جنان شاف وجهه الطبيعي ..بس عيونهه بيهن لمعه عجيبه ..لمعه مو طبيعية..بقة مبحلك بعيون جنان..لحد ما ارتبكت..جنان وكالتله..خيييير انتتته ششششبيك..ليش هيج اتباوع علي..
مروان صافن وهوة يكول لا حول ولا قوة الا بالله..لا حول ولا قوة الا بالله..عرف مروان انو جنان مسويلهه عمل قوي وسحر سفلي..كاللهه يا بنت الناس..صيحيلي ابوج..
جنان زعلت وحست بالاهانه..لانو ما عبرهه..ومتعرف هوة ليش هيج تصرف..حتى ما لحكت تحجي وياه ولو كلمة وحدة..مشت وراحت صاحت ابوهه..
عمي عمر دخل وكاله خير ابني..ان شاء الله كول..مروان وهوة متفاجئ..خير ان شاء الله عمي..بس تذكرت شغله مهمه..اجيكم مرة ثانية ..
عمي كاله خير ان شاء الله.. بس اكعد اشربلك شي..كبل متروح..
مروان كام على حيلة وباستعجال كاله مرة ثانية ان شاء الله..
مروان طلع من بيت عمي عمر..وهوة خايف .. ومشدوه..
سافر راح لسورية وهوة بزحمة الشغل ضلت سالفة جنان عالكة بذهنه ...من كمل شغله اتعنه و راح لصاحبة يوسف..ويوسف هذا شيخ مال رقية..ويتعامل بالقرآن..وبس..ويرقي الناس..بالرغم من ان عمرة زغير..بس هوة متدين وطيب ويتعامل بطبيعته دون تصنع وما يتكبر بسيط كلش..واقرب صديق المروان..
راحلة لكاه عندة جلسة مالت رقية شرعية..انتضرة لحد ما يفرغ..حتى يحجيله على جنان...فرغ الشيخ ودخلة مروان كاله شيخنة..شافة الشيخ يوسف ورحب بيه وكاله اهلا وسهلا مروان شلونك..اشوف وجهك ينطي الوان ههه
مروان كاله والله شيخ صارت وياي شغلة غريبه عجيبه..واريد آخذ رأيك بيهه..
كاله تعال اكعد واحجيلي..مروان كعد يم الشيخ وكاله تتذكر البنية اللي كلتلك..شفتهه بالعرس مال كرابتنه ..وعجبتني..واريد اخطبهه..كالي اي اتذكر كل الزين حتى ضلينه نسأل فلانه وعلانه على اسمهه وبنتمن..شبيهه مشيت عليهه..مروان كاله اي مشيت..وحجه ليوسف كل السالفه يوسف..كال لا حول ولا قوة الا بالله..انت تعرف هذا سحر سفلي..والبنية هاي اذا ما تعالجت ترة تموت..
مروان ..كاله..يا الله اني جسمي ليهسة كله يرجف..بس ما بيدي شي حتى اسويه الهه..
الشيخ يوسف كاله شلون ما تكدر تسوي شي..احجي لا هلهه وهمة يجيبون شيخ رقية..ويعالجوهه..حرام عليك تبقة ساكت..وانته تعرف مرضهه..
مروان كاله والله ما جان عندي وكت..لان اجازتي خلصت وبس اتاخر شوية يطردوني ويعينون واحد مكاني..وتروح علية الوظيفة..كاله..بس انته هيج راح تشيل ذنبهه..اذا تريد نصيحتي احجي لاهلهه وكللهم على نوع مرضهه وهمة بعد يتصرفون..
مروان ..كاله تريد الصراحه شيخ..اني خايف اكللهم نوب هذولة اللي مسويلهه سحر ينكلبون عليه.ههههههه..الشيخ يوسف كاله لا تخاف مايكدرون يسوون شي هذولة اضعف مما تتخيل..مروان ..كاله..لا..لا..اني ما عايزني مشاكل..كالة..بكيفك بعد الله يسهلهه عليك..ان شاء الله..
كاله مروان..ان شاء الله..ياله سلام..ردله الشيخ يوسف..وعليكم السلام ورحمه الله..
مروان رجع من سوريا..واهلة حجوله شصار بجنان..كلبه كام يوجعه هواي وكال اني لو ما عايفهه من ذاك اليوم جان لحكت عليهه..وما وصلت لهاي الحاله اللي عليهه صارت اليوم..وقرر يروح يزورهه ابيتهم رغم انو هوة خجلان منهه..بس قرر يروح بالرغم من كلشي ...
اني اجرت بيت ..واثثته ورممته سويته احسن من مال حميدة..رحت اشتريت غربان محنطة..وغزلان..وصخول ..ولعابات ..واخذت غرفة من البيت وخليتلهه ضوة احمر يشتعل ويطفة..وسديت كل الشبابيك..هااا واشتريت هاي الطاسة مالت البخور..وانواع من البخور..وكلايد.. وخرز..وما نسيت الابر..وشتريت جرداغ اسود وترسته دناديش..البسة وكت الشغل بس..وجبت جماعة يردون يشتغلون وياي ودربتهم ع الركص والغنة..والتمثيل اذا اضطر الامر...بديت شغلي وكمت ادك الزار للنسوان بالبيت..وشغلي مشة واموري صارت تمام التمام...
حميدة ..عرفت انو اني فتحت بيت وكمت ادك بيه الزار وصارت عليه رجل اكثر منهه كتلتهه الغيرة وكامت اتحاربني بكل وسيله..وبيوم اجتي وحركتلي البيت..بدون ما احد يشوفهه او اتخلي اثر بانه هية الحركته..رحت واشتكيت بمركز الشرطة ..جوي وحققو بالموظوع..بس ما كدرو يثبتون شي لا على حميدة ولا على غيرهه..وانقفلت القضية وتسجلت ضد مجهول..بس اني جنت متاكدة كل الزين..ان اللي سواهه وحرك البيت هيه حميدة..لا مو بس متاكدة وابصم بالعشرة ان حميدة وراهه...وكلت لازم انتقم منهه..وبيوم طلعت بالليل ورحت على حميدة..للبيت مالتهه ..سالت عليهه طلعت ماموجودة بس خالتي فاطمه بالبيت..وخالتي فاطمة كبرت..وبطلت من شغل دك الزار..حتى مابيهه تكوم على حيلهه..نايمة بالفراش...اني لكيتهه فرصة ..جنت جايبه وياي بطل نفط مخليته جوة العباية..فتحت الباب على كيفي وطلعت بطل النفط ورشيته على الفراش..خالتي فاطمة..حست اكو واحد بالبيت ..حسبالهه حميدة..صاحت مرة ومرتين حميدة حميدة..بس اني انطيتهه الاذن الطرشه..ومارديت عليهه ورة مارشيت البيت بالنفط عود شخاط شخطته..ورميته على الفراش..راسا اخذت النار بالفراش طلعت على السريع..حتى محد يشوفني ..مشيت مسافة عن البيت والنار شبت بالبيت واحترك هوة وغراضة وخالتي فاطمة..وياه
حميدة..من اجتي..وشافت البيت كامت اتعيط وتصرخ وتصيح على فاطمة..بس بعديش بعد ما البيت صار رماد..حميدة عرفت انو اني اللي حركت البيت..لان ماكو واحد يكدر يسوي هيج غيري..كامت تبجي على خالتهه فاطمة..حركت كلبهه ..مسحت دموعهه وعيونهه كامت تجدح شرار..الشرطة اجتي للبيت بعد ما الجيران بلغو على الحريق..الشرطة استدعت حميدة وحققت وياهه.. كالتلهم خالتهه فاطمة رايدة تشعل الطباخ..وماخذة النار بالبيت وماكادرة تخلص روحهه..ولا جابت طاريي بالتحقيق..
مروان..راح لبيت جنان..واخذ وياه ابوه..من دخلو للبيت عمي عمر جان وجهه ثكيل وجان زعلان من مروان..لان ذب الصوج بيه من عاف جنان وطلع..من دون مبرر..استقبلهم بس بدون ما يهتم بيهم..لان جان وراه الف شغلة وشغلة..جان وراه هم ما يلم..مثل ميكلون..وجان يريد يسفر جنان..يطلعهه برة يعالجهه..بس مروان ..كاله..عمي احجيلك ذاك اليوم ليش طلعت ع السريع..حجاله كلشي شافه وكالهه جنت مخبوص وما اعرف اشصار بيه..وما ردت اجذب عليك..بس ضميري مخلاني انام عفت شغلي واجيت مخصوص علمود شغلة جنان..عمي عمر سمع كلام مروان..وحس مثل السجاجين وتشكك بصدرة..وشال هم جبل ما يكدر يشيله..وضل يصفك ايد بايد ويكول لا حول ولا قوة الا بالله..استغفر الله العظيم وجان يرفع ايدة وكال..اللهم اني اشكو اليك همي وغمي وهواني ..وكام يبجي مثل الجهال..الزغار ..
عمي سعد ابو مروان..اجة كعد يمه وكام يربت..على ظهرة..وكالة اصبر حجي..لا تبجي..انته رجال مؤمن..ان شاء الله يزيح منهه البلاء بقدرته.. هوة وحدة ..باذنه تعالى ..ولا حول ولا قوة الابالله ..
عمي عمر كاله والنعم بالله..ربي يسهلهه..ان شاء الله..يارب..وشكر عمي سعد وابنه مروان..وكاللهم اعذروني تعبتكم وياي وسامحونه اخاف زعلنه منكم..وانته ابني مروان اني مسامحك..اي واحد بمكانك وشاف اللي شافة..راح يسوي مثلك واكثر بعد..مروان كالة العفو عمي..اني ليهسة ما سويت شي..حتى تشكرني..عمي اني عندي صاحبي..شيخ مال رقية شرعية..راح اجيبه حتى يقرة عليهه..وان شاء الله..تصير زينة ويبطل السحر...عمي عمر كاله..ابني لا اتعب نفسك..اني راح احجي وية اخوانهه..وهمة راح يتصرفون..عمي سعد كاله عيب هل كلام حجي..انته اخوية ..وبنتك بنتي واحنة ما نعوفهه بهل محنة ان شاء الله ما نقصر وياهه..
عمي عمر كاله..ان شاء الله ..الله ينطيكم الصحة و العافية ..بس ابني انته متاكد انه شيخ رقية..اني ما اريد اوكع بشيخ دجال ومشعوذ..والعياذ بالله..مروان كاله..لا..لا..من هاي الناحية اطمن..لان هوة يحارب الجن بالقرآن وما عندة..شغلات الدجالين والمشعوذين..
عمي عمر كاله..اذا هيج لعد على بركة الله..نبدا على طول جلسات الرقية..بس اني اللي مستغربله..ان بنتي ما عدهه اعداء ولا تكره احد حتى يسوولهه سحر..
عمي سعد..كاله مو بالضروري يكون قاصدينهه هية..يجوز قاصدينك انته او امهه او واحد من خوانهه..هذا الوكت..صار كلش صعب ياخوية والله يسترنة منه..
كاله..اي والله بالفعل..الله يلطف بعبادة..يارب..
اتلاثتهم كالو امين يارب العالمين...وللحكاية بقية
