#النساء والريح الحمراء
بقلم..ليوثي المياحي
حميدة كالتنه اريدجن تشتغلن وياي بالزار ..يمي هنا وتجوني بالليل بعد المغرب بشوية ..هااا شتكولن..
اني كلتلهه..يووووومه ...شنوووو؟؟؟
بسمة كالتلهه لا..لا..لا ما نكدر نجي باي وكت ..وشنكول لاهلنه بالمحلة وبالبيت ..
جنان من غير ما تنطق اي كلمة ..كامت وطلعت من البيت ..
حميدة كالتنه ..هايهية انتو بكيفكم.. فكرن بالموضوع وردلي خبر ..اذا جنتن رايدات حالجن يتغير ..ما عليجن بس اتسون اللي كلتلجن عليه..واذا رايدات اتبورن وتعنسن..هم انتن حرات بنفسجن...مشت خطوتين ليورة وخلتهن صافنات وحدة بوجه الخ ...بسمة كالتلي..هااا هنودة شراح نسوي هسة ..كتلهه اسمعي بسمة..ياروح مابعدج روح ..اني بالنسبة الي راح اشتغل وياهه هيج فترة لحد ما اموري تتعدل واعوفهه..
بسمة كالتلي هنودة انتي تخبلتي ..واهلنة شنكوللهم؟؟؟
كتلهه اتصرفي الكيلج عذر وياهم كوليلهم اي شي..لعد عاجبتج حالنه هاي.. كالتلي بس هنودة اني تدريني جبانه واخاف من هاي الشغلات مالت السحر والجن...كتلهه لا تخافين اني وياج ...جان نصيح حميدة ..وكنالهه انو احنه موافقين نشتغل وياهه..بس راح نشتغل تلث تيام بالاسبوع .. مو الاسبوع كله..مقابل انو تفك العارض اللي مخليته علينه..وطلعو من بيت حميدة لكو جنان ..واكفة برة
وعاقجة وجهه..كتلهه شبيج جنان هية عرضت علينه عرض واحنه من حقنه نرفض او نقبل ..كالتلي .. بس هية مو من حقهه توكف حالنه.. او تجبرنه نشتغل وياهه..ردت عليهه بسمة كالتلهه والله ياجنان ..اني اتفق وياج بكل هل حجي.. بس شبدينه نسويه انتي شايفه حالنه وين صار..جنان كالتلهه يعني شنو وافقتو تشتغلون وياهه..كتلهه جنان عندج حل ثاني ...كالتلي انتو تعرفون الزار شنو يعني..يعني استدعاء للجن بطقوس واحتمال يتلبسكم الجني..بسمة كالتلهه ..شلون جني وطقوس.. اووووي..هنودة... امشي ..امشي اني اخاف امشي عيني ما اريد ..ابقة كاعدة بالبيت ولا اخلي جني يتلبسني...كتلهه بكيفجن اكعدن بايرات هيج ولا واحد يكلبجن..شوفوا اني وخالد حددنه موعد العرس قبل ما حميدة هاي اتشيل من المحلة ..وهاي تلث سنين ونص عدل وما كدرنه انعرس ..جنان كالت بس هذا كفر ..هنودة ليش انتي ماتعرفين..تردين تكسبين دنيتج..وتخسرين اخرتج..ارضي باللي الله كاتبة ..وكل وحدة تاخذ قسمتهه..كتلهه عيني كل لشة تتعلك من كراعهه ..تردون اتشوفون طريقكم شوفوه اني بالنسبة الية راح اشوف طريقي يم حميدة..بس ديرو بالكم وحدة تفضحني يم هلي وبالمحلة...مفهوم..
بسمة كالت انطيني فرصة اكلب الموظوع براسي..واردلج خبر
جنان..كالت..استغففففر الله العظيم...ومشو راحو لبيوتهم..ورة يومين.. كلت الامي ..يمة اني عندي درس ما افتهم بيه..اريد اسجل ع دروس خصوصية..كالتلي ليش بنتي انتي دومج شاطرة..ومعتمدة على نفسج..كتلهه اي يمة بس ما دا استوعب الدروس وحرامات اسقط من ورة درس..وما راح اروح يومية..الدروس بين يوم ويوم..كالتلي..وشوكت بيش الساعه..وبيا مكان..كتلهه ورة المغرب اني ردت هذا الوكت..علمود دوامي الصباحي..اكو مدرسة يم الجامع الجبير..بيهه مسوين دروس خصوصية وهواي طلاب شاطرين مسجلين بيهه..كالتلي بس يبنتي اذا ترحين ورة المغرب .. بيش الساعة ترجعين..كتلهه هيج يعني ساعة اهدعش..كالتلي بنتي والناس شيكولون علينه من يشوفونج راجعه بهل وكت..كتلهه يمة كلهه ساعة زمن بس ورة العشى..بشوية اني اكون خلصت وجيت للبيت..عفية يمة هاي فرصة حرامات افوتهه والدورة رخيصة همين..امي كالتلي..زين بنتي بس بعد العشى لازم انتي بالبيت..ما اريد تاخير..كتلهه اي يمة ان شاء الله ...ورحت بستهه وكتلهه اشكرج يا غالية.. لبست عبايتي ورحت على بسمة كلتلهه ..ها ولج شقررتي..كالتلي والله اني خايفة من هل سالفة..كتلهه عليش خايفة..يمعودة لا يضل ابالج كلام جنان.. وانتي بعد بكيفج..اني ماشية..كمت لحيلي حتى اروح على حميدة..بسمة كالت..اوكفي دقيقة شبيج طايرة..باعي اني راح اروح هاي الليله وياج واشوف اذا ارتاحيت للشغلة.. راح استمر وياج..كتلهه اي زين تمام..يلا البسي عباتج وخلنه انروح..
وصلنة لحد بيت حميدة لكينة الناس مجمعين..ولابسين لبس غريب..بسمة جانت خايفة كلش..ومجلبة بايدي..بكل قوتهه..من شافتنه حميدة ..كالت تعالن..هاي الليلة راح انطيجن فكرة ..على الشغل مالتنه..وبعد باجر راح ندك زار الج هنودة..حتى العارض ينفك..وبعدهه ندك الزار لبسمة..ماشي..كتلهه اي زين..دك الزار وبدو بالحفلة.. واني وبسمة كعدنه نتفرج.. على النسوان الي بدو يغنون ويركصون ويصرخون ويعيطون..وحركاتهم جانت ابد ما منسقة..اني وبسمة بقينه فاكين حلوكنه..وصراحة الخوف دخلني..بس ما ردت ابين انو اني خايفة..جانو جايبين صخل وذبحوه وكامن يشيلن بالدم مالته ويتلطخن بيه ويغمسن اديهن بالدم ويطبعن جفوفهن بالحايط..بسمة بصفي لزكت وهية ترجف..طبعا الغرفة جانت ضلمة وبيهه ضوة يشتعل ويطفة..من يشتعل انشوف كلشي ومن يطفى انكوم نرجف وكل شوية نكول اجانه الجني...جان مرة توكع ..يم رجلين بسمة..بسمة رفعت رجلينهه على الكرسي وكامت اتصرخ وتعيط وية المرة..اااااي هنودة اااي..وتصيح بعلو صوتهه المرة ماتت ..المرة ماتت..كتلهه ولج اسكتي فضحتينه هاي اغمة عليهه بس ...جني النسوان وجروهه ..وشالوهه وخلوهه على السرير..ورة شوية صحت ولا كانو صاير بيهه شي..بس عيونهه حمر ..
خلص اليوم اللي جان مليان..خوف ورعب بالنسبة الية..بسمة مانامت كل الليل..خايفة وكل شوية تهذري..كل متذكر المرة..الوكعت جوة رجليهه وشلون عيونهه حمر ومطلعة لسانهه..
ورة يومين..رحت على بسمة ..كلتلهه..هاااا بسمة اليلة ترحين وياي لو لا..كالتلي..يمة ..لا..لا..ما اكدر اروح ..عيني بعد..روحي انتي اذا تردين...كتلهه هااا تبريتي مني ..تخليني اروح وحدي..كالتلي وانتي شلون تردين ترحين..ولج هذولة ناس يخوفون..اني من ذيج الروحة لليوم ما انام الليل..كتلهه زين بس هل ليلة روحي وياي لان يردون يدكولي زار ..اني اريد العارض ينفك اريد اتزوج خالد عفية تعاي وياي..واريد اختي تنجح..اريدج اتساعديني فدوة..كالتلي انتي شدا تحجين اكلج صار يومين منايمة ..كتلهه اووووه يلة اني اروح ما اريد منيتج..صار ساعة اتوسل بيج..كالتلي ..لا زعلين مني هنودة. راح اجي وياج..بس هاي اخر مرة..ولا تطلبين مني بعد اروح وياج..كتلهه حبيبتي انتي..الله يخليج الية ..بسمة راحت غصبن عليهه لبست العباية ومشت وياي..وصلنه لبيت حميدة..وبسمة ليهسة الخوفة مالت المرة الفاتت..بكلبهه..واكثر من الاولى..حميدة اول مشافتنه..كالت يا هلة ومرحبة بعروستنه هنودة الليلة..انتي عروسة الزار الليلة..كتلهه شلون يعني..كالتلي باعي احنة اللي اندكلهه الزار انسميهه عروسة الزار..المهم اجهزي ..ماضل وكت..الناس جايين ..هاج البسي هاي الدشداشة..وتعاي وراي..الدشداشة جانت جبيرة هواي مهبهبة علية..من لبستهه حسيت كلبي رجف ..وصابتني خوفة..بس من تذكرت خطيبي خالد..والتلث سنين ونص واحنه ماكادرين نتزوج..طردت الخوف من كلبي..ولبست الدشداشة والشال اللي لفيته على راسي..بسمة ميتة من الخوف..وحميدة..جابت وصلة قماش لونهه احمر ..ومسحت وجهي بيه وبخرتهه ابخور ريحته عجيبة ..الناس التمو بالبيت..وبدو يدكون الزار..دك..دك..دك..واغنية بشير..كامت تتغنى بحلوك الحضور..سوو دايرة وبنصهه خلوني..وكامو يغنون..كبو البخور..وسوو الاصول..وكولو دستور..بشير جاي..بشير لومي..يا بشير لومي..سووو الجبنه لبشير لومي..بله..بله..ياشيخ..دستووووووووور......وبعد بيهه الغنية بس ما افتهمت كلامهه..شوية شوية كمت ادوخ الدنية كامت تفتر بيه وية الفرات اللي جنت افترهه على روحي..كمت ما احس على روحي دخلت بعالم ثاني..راسي حسيته صار اشثكلة وما اكدر ارفعه..ولساني هم صار ثكيل..بس ضليت اركص وية الناس بدون اي وعي مني..وكل ما الدك يزيد ويعلة..اني اكوم اركص اقوة لحد ما دخلت بحالة هستيرية وكمت اصرخ واعيط ...لحد ما وكعت بالكاع....وللحكاية بقية
