النساء والريح الحمراء
بقلم...ليوثي المياحي
كالت..شفتي مو كلتلج..امشي وراي وراح تربحين..ذهب..وبعد.. وبعد.عوارض هواي راح اوخرهه من طريقج..كتلهه خالتو حميدة انتي اطيب خالة شفتهه..انتي عسل..الله يخليج ويحفظج الية..حميدة باوعت على بسمة وكالتلهه..هاااا وانتي يبنية متردين افك العارض مالج..سمعت ماكو خطيب بقة وياج..يومين..من يشوفج ينهزم مع انو انتي حلوة وطيوبة..
بسمة كالتلهه..وهي اتمتمت بالحجي..اااني...لا..لا..مو هيج بس اني ما اريد اسوي هذا الزار لان اني اخاف كلش ..ياخالتي حميدة..
كالتلهه منيش اتخافين..هاي مو صاحبتج هنودة سوته..شو كلشي مصار بيهه..بالعكس حالهه انعدل...واريد بعد الزار اوديجن للشيخ الحمزاوي ..عاد يمة..حالكم راح ينعدل ويطك..وبعد ما ينعوج اباااااااد...
كتلهه..عيوني خالة الحكيني بيه..اني عندي هواي شغلات..اريد اسويهن..
حميدة كالتلي اصبري..علي ..لان هسة هوة مسافر..من يرجع انروحلة..سوة..وانتي بسمة..راجعي نفسج ..حبيبتي..اذا رايدة حالج ينعدل..تعاي حتى ادكلج زار...واذا متردين انتي حرة..
كالتلي..هنودة اريدج الليلة تساعديني..لان عندي زبونه ونريد اندكلهه زار..
كتلهه..عيوني الج خالتي..ميخالف اجي..وطلعنة من بيت حميدة..بالطريق كلت البسمة..يهبلة..خليهه اتدكلج زار..انتي ما خسرانه شي..بسمة كالتلي..شتحجين انتي هنودة..اني بس شفت منظر النسوان وهنة يترنحن..ومنضر الدم..الليل كلة مانمت..والحجي مالتج والعياط..ومن راسج صار ثكيل..ورجلينج ما شالنج..واغمى عليج..يمه هاي لو اني مكانح يغمة علية وبعد ما اصحة ابد..
اني ضحكت هههههه بكيفج عيني ابقي كاعدة..مثل جنان..صاحبتج..
مشت الايام والحال باقي ..اني جنت على طول يم خالتي حميدة..جنان اجتني اكثر من مرة تنصحني وتبعدني من هل طريق وتكلي هذا شغل حرام..تعاركت وياهه وكتله انتي وحدة حاقدة ..لان شفتيني فرحانة..تردين تخربين علي..جنان رادت اتفهمني بانه خايفة علية..بس اني ما سمعتهه وطردتهه..وكلتلهه..بعد لا تجيني للبيت ولا تمشين وياي..
بسمة ..شوية شوية..كامت تقتنع..وخصوصا بعد ماشافتني..انفك العارض عني..والعرس مالتي..وسط دهشة كل اهل المحلة..لان من يوم طلعت حميدة من المحلة..ماكو عرس تم على خير بس عرسي ..
واخيرا عرست ومشة عرسي على خير...خالد ورة ماتزوجنه سافر..وكام يشتغل وصار عندة فلوس هواي..وكل ميجمع مبلغ..يرسلة الية..جنت فرحانه هواي..هاااا واختي الزغيرة رند نجحت بامتحاناتهه وبتفوق..هماتين..
رحت وية خالتي حميدة للشيخ الحمزاوي..لان عندي جم شغلة يمة ماتكدر عليهن حميدة..دخلنة لكيناه كاعد بغرفة ضواهه خفيف..ومليانه دخان مال بخور..جانت ريحه الشيخ غريبه مخبوطة من كل شي ..بس الطاغي عليهه ريحة زنجه..مال صخول..وكل شوية تتغير هاي الريحة..من شافني الشيخ كيف..وبينت على وجهه ابتسامة شياطين.. حميدة كالتله جبتلك زبونة رجلهه مسافر ..برة البلد...
كاللهه الحمزاوي ..اي هيج الشغل..خليهه يمي اني اريدهه الليلة..اريد ادرسهه ع الخفيف..
اني تقربت عليهم..الشيخ ضل مركز بعيونه علية..وكصني من فوك ليجوة..الي تكول اخذلي سكنر...كالي ياهلا بيج هلة بهند بنت الحجية ليلى..ومرت خالد الحسن..
اني استغربت شلون عرف اسمي واسم زوجي وامي..كالي لا تستغربين..احنة ماكو شي مخفي علينه..كتله بركاتك شيخنه..
كالي..تعاي اكعدي يبنيتي..وكوليلي طلباتج شنو..بس كبل ما تطلبين..اذا ما تكدرين على طلبات الخدام..من الاساس لاطلبين وتعبين روحج..
كتلة ..لا..شيخ..اني الخدام شيطلبون مني اني انفذة بالحرف..
كام يشعل بالبخور..ويكول كلام ما مفهوم ..والغرفة عجت بالبخور..وكالي يلة اطلبي..
كتلة ..يا شيخ..اني اريد رجلي يصير خاتم باصبعي..اريده يسمع كلامي..مو بس هوة حتى اهلة همين؟؟؟
الشيخ كالي جيبي..ديج اسود...واريد اسم عمتج بالكامل..واسم امهه..
اني انطيت كل المعلومات اللي رادهن مني..ورحت للسوك جبتلة ديج عرب اسود..وجم شغلة وياهن رادهن مني ما اكدر اكولهن.. استحي..!!! هههه
الشيخ الحمزاوي شغلني يمة لحسابة..واني فرحانة كلش.. حسبالك رفعوني ..رتبة..كمت اروح للشيخ الحمزاوي مباشرة من دون ما اروح على حميدة..كمت اطب واطلع من يمة بكيفي..من دون ما اكطع روحاتي لخالتي حميدة..وشغل الزار اللي ادمنت عليه وياهه..اهل المحلة..شّكو بية..لان كمت اطلع هواي من البيت ..من غير شغل..بس محد عرف اني اشتغل وية حميدة والشيخ الدرديري..الناس تسأل بسمة وجنان علية يكولولهم هاي هند وين تروح يومية..بس بسمة وجنان ما انطو بيه وما كالو لاي احد.. على شغلي..البنات بالمحلة حالهم نفسة ما تغير..ماكو ولا وحدة كدرت تتزوج..وتخبلووو من سمعو اختي الزغيرة رند..تزوجت..وكامو يشكون بالزايد..وكل ما امشي بدرابين المحلة اسمع النسوان تتهامس ..بيناتهن ..حسد وغيرة...
رند اختي تزوجت تاجر..وسافرت وياه..اني فرحتلهه هواي..
ههههه..بنات المحلة الغيرة اكلتهن ..وجني علية يسالني شنو سويت وانكلب حالي هيج..وفجاة تزوجت وتزوجت اختي من دون بنات المحلة كلهن..
اني رفعت خشمي عليهم وما كتلهم على اللي سويته..كتلهم الدنيا حضوض..وهذا حضي ...
جنان..كمت ما احجي وياهه ابد..حتى من نتلاكة..اباوع عليهه وامشي..حتى سلام ما اسلم عليهه..لان ادري بيهه تغار مني...
بسمة قررت ادك زار يم حميدة برغم خوفهه..مرة جنت كاعدة يم حميدة..وجنت احجيلهه شلون بنات المحلة ..غايرين مني..
كالتلي باعي هنودة..بنات المحلة اريدج اجيبيهن الية وحدة ورة الخ..كتلهه ليش شسوين بيهم..كالت اريدهم يجون يشتغلون وياي..حتى راس مالنه يكبر..ونربح من وراهن هواي فلوس..
كتلهه اي صدك خوش شغلة..ماشي راح اجيبهن..بس هاي جنان الحاقدة ابد ما اجيبهه..حميدة كالتلي..تقصدين جنان بنت الحاج عمر..؟؟؟
كتلهه اي هية ..كالتلي لا بالعكس هاي اهم وحدة بالمحلة..لان اني مراهنة عليهه..زين..كتله وليش هية يعني بذات..كالت بس انتي جيبيهه الية ومعليج...
كتلهه..ماشي..
كمت اسحب بنات المحلة وحدة ورة وحدة..واوديهن لحميدة..وكامن يشتغلن وية الشيخ الحمزاوي ..وكل شويه الناس بالمحلة يسمعون هلاهل وحدة تزوجت.. بسمه قررت هية هم تسوي مثلهم..وكامت تروح وتجي على حميدة..برغم خوفهه..لان كل مرة تحلم احلام تخوف..وراهه اتعودت.. وصارت اتضيعهه تلكاهه يم حميدة.. اني حاولت هواي وية جنان بس جانت ترفض وتستغفر الله ..امهه لجنان ..كامت تخاف على بنتهه لان اكثر صديقاتهه واللي بعمرهه تزوجن وهية باقية..وكل ما يتقدملهه عريس اما ترفض هية او العريس ينهزم.. لحد ما تعقدت ..وكامت ما تطلع من البيت.. ام جنان خالتي سوسن..كعدت وية رجلهه عمي سيد عمر..
كالتله انته عاجبك حال بنتك .. وهية كاعدة بايرة ومكابلتنه ..
ردهه عمي عمر كاللهه يمرة احترمي نفسج اني بنيتي ما بايرة.. كالتله ترة هية هم بنيتي واللي يصيبك صابني ..بس لازم نشوف حل خما نخليهه كاعدة ونضل انباوع عليهه وحاطين ادينه على خدنة ..شوفهه شلون صايرة سود وجي مثل الوردة الذبلانه ....عمي كاللهه يعني شترديني اسوي.. امشي بالشارع ويا رجال اشوفة اكلة تعال ازوج بنتي ...كالتلهه لا..لا..مو هيج قصدي .. بس خل نوديهه للسيد بلكي يفك العارض مالتهه البنية قربت تدخل بالتلاثين.. ولحد الان الحظ معاكس وياهه.. عمي عمر زعل من حجي مرته ..وكاللهه انتي تخبلتي..
ترديني باخر عمري اروح للسادة ..وللشيوخ ..والله موجود.. هذا شلون حجي..طلعي هاي الافكار من راسح.. وبنتج هاي اللي قاسمة الله الهه راح يجيهه.. طلعي هاي التخاريف مالتج ..من راسج
كالتله يعني اني جاهلة وما افتهم شي لان اريد مصلحة بنتي ..
كاللهه..اي اللي يمشي ورة هاي..السوالف هذا اكبر متخلف..
ترضين ماترضين !!! مشة وعافهه وحدهه...
خالتي سوسن كالت وي روحهه
جاهلة...جاهلة..بس اني بنتي ما اخليهه تبور ..لو على كص ركبتي..
جان تلبس عباتهه وتطلع على طول ..مشت واجتي على امي..
كالتلهه ..شلونج ام هنودة ..ان شاء الله زينة..
كالتلهه الحمد لله بخير وانتي شلونج ..اني الحمد لله زينة بس بنتي مو زينة..
امي كالت خير شبيهه جنان..كالتلهه ..يعني ما شايفة الحالة اللي صارت عليهه جنان..البنات اللي بعمرهه كلهن تزوجن وصار عدهن جهال.. وبس هية باقية..
كاعدة مكابلتني ..اتمنى تزوج وافرح بيهه واشوف جهالهه واشيلهم..هاي امنيتي من الدنية...
كالتلهه ..امشي شوفيلج..شيخ شاطر حتى يفك العارض السوتة حميدة عليهه..
خالتي سوسن فزت..وكالتلهه.. وحميدة شعدهه وية بنتي حتى تخلي عليهه عارض...الله لا ينطيهه..
كالتلهه ..هية مامسويته مخصوص لبنتج..هية سوته لبنات المحلة كلهن...واللي ديزوجن ديروحن لحميدة ..تفكلهن العارض..وديزوجن ويمشي حالهن...وللحكاية بقية....
