#النساء والريح الحمراء
#ليوثي المياحي..
~10 والاخير~
جنان نامت بالصالة..اجة اخوهه شالهه ونومهه بفراشهه بغرفته..الجن طلع من عدهه..والحمد لله..بس المسكينه بقت بس هيكل..وبقاية من الروح..تعبانه..وحيلهه مهدود..فجوجهه طالعة ليبرة..عيونهه غايصات بنكرة..صارت شبه هيكل عضمي واصل للحلقة الاخيرة..طلع من جسمهه..بعد ما عبث بيه وشوفهه مرارة التعب والخوف والالم..والارهاق...والتفكير...
امهه..راحت جابت جكليت وطشته بالمحلة..وهية تهلهل..فرحت هواي بسلامة بنتهه..
الشيخ احمد والشيخ يوسف ومروان وعمي عمر واخوهه عصام...كعدو بغرفة الخطار..وجابولهم شربت وكيك..وضلو يسولفون بسالفة جنان واللي صار بيهه..وسالفه خالتي سوسن وشلون امنت بهاي الشغلات مالت الدجل والشعوذة...وشلون الواحد يحصن نفسة منهه...
الشيخ يوسف..كال العمي عمر...انته منو اللي طردته وذبيته بالشارع حتى يكرهك ويحقد عليك كل هل حقد..كاله..هاي وحدة اسمهه حميدة..جانت جارتنه من زمان ..كبل اربع سنين..
مروان كاله..وليش طردتهه عمو..كالة هاي المرة..جانت ادك الزار والعياذ بالله..لحد وكت متاخر بالليل..نوبات بالثنتين..ونوبات تبقة لوجه الصبح..وانوب كلة اصياح وعياط وصراخ..وناس طابة وناس طالعة..ومسويتنه ازعاج مو شلون ماجان..بالمحلة..اني اشتكيت عليهه بمركز الشرطة..وانطوهه بلاغ بان بعد مدك الزار..هية ما اهتمت للبلاغ وبقت بشغلهه..وازعاجهه..النه..جمعت رياجيل المحلة..ورحنة جبنالهه..الشرطة..طلعوهه من البيت وطردوهه..ومن ذاك اليوم..اتحلفت بينه..وانو ماكو ولا بنية راح تتزوج من المحلة..وحالنا يوكف...وسبحان الله احنه ما اهتمينالهه وما اخذنة كلامهه من صدك..وهية يمكن عدهه سحار يتعامل بالسحر السفلي..وكدرت بالسحر والشعوذة تربط حال الناس اوكفت قسمة البنات..
الشيخ احمد..كال لا حول ولا قوة الا بالله..يعني هسة بنات المحلة كلهم ما تزوجو..
كاله..لا تزوجو بس بعد ما قشمرت عليهم وجرجرتهم وحدة ورة الخ..لهذا الشيخ ابو السحر ..اللي اسمة الحمزاوي..وحتى مرتي سوسن هم اتقشمرت وراحت عليهه..
الشيخ يوسف ..كاله هذا شلون حجي ..صدك..
كاله اي صدك..سوسن حجتلي كلشي على الشيخة حميدة والحمزاوي..صاح عمي عمر على مرته وكاللهه احجي ..كلشي من يوم رحتي للشيخة حميدة والحمزاوي لحد ما طردتج...حجتلهم كل السالفة...
الشيخ احمد..لا حول ولا قوة الا بالله ..اسمعو..ياجماعة..حسب حجيكم معناتهه محلتكم كلهه متلبسة بجني..وماكو واحد سالم منهه..يعني لازم نساعدهم..ونخلصهم من شر هاي السحارة..الشيخ يوسف كال..اي والله كلامك ذهب..باجر بأذن الله نفتر عليهم واحد واحد ونرقيهم ونقرالهم..ايات السحر..واللي بيه يبين عليه..لان الشيخ الحمزاوي..حسب ما سمعت من اكبر السحارين السفليين وشيوخ الزار وعندة هواي من الخدم والجن..والشرطة كاعدة ادور عليه من زمان..
عمي عمر..الله يبارك بيكم..يارب ويوفقكم ويخليكم..وينطيكم على كد نيتكم..الطيبة وليداتي..الشيخ يوسف..اللهم امين..يارب ..احنة اصلا..انريد نساعد الناس ونخدمهم..
مروان..والله انتو الله جابكم النه..بالوكت المناسب..من باجر راح نبدي جلسات الرقية..للناس المحتاجة رقية بالمحلة..الشيخ احمد كال..ان شاء الله..عصام..بس اريد اسألك سؤال شيخ احمد..كاله تفضل..كالة السجين اللي جانت بيد جنان..جانت شتريد اتسوي بيهه..كاله جنان..مو بكيفهه..جانت مسيطرة عليهه قوة الجن..فالسجينة ما جانت هية لازمتهه..لا..لا..الجن هوة اللي جان لازمهه..ولو عايفينهه..جان اذت نفسهه..وحتى جان ممكن اتاذينه احنة هم..ولو الجن ما طالع..جان كتلهه..وما عافهه الا وهية ماشية لكبرهه..بس الحمد لله طلع...
عمي عمر..لا حول ولا قوة الا بالله..
الشيخ احمد والشيخ يوسف ترخصو من عمي وطلعو..من البيت..عمي صاح مرته..ورزلهه ..وغلط عليهه..وراد يطلكهه ..بس الله ستر ومدري شلون لزم روحة وما طلكهه..باخر لحظة..
جنان كعدت وشوية شوية كامت ترجع الهه صحتهه..وكالت الامهه..اريدج تحجيلي اشصار اني اخر مرة اتذكر..من مروان اجة وطلع ع السريع..وجنا نتناقش..اني وانتي وابوية..بهل موضوع..
خالتي سوسن كالتلهه..يمة اللي صار بيج..مو هين..بس الحمد لله الله ستر ولطف..وكعدت تحجي لبنتهه كل اللي صار..
جنان كالتلهه..ليش هيج يا امي..اني اصلا كالولي من البداية..ورفضت ..وماقبلت اوصخ روحي بهاي شغلات الشعوذة والدجل..وما كدرولي..بس انتي عرفو شلون يستغلونج..كالتلهه اي صحيح بنتي..بس هايهية بعد الفات مات..ومن هل ليلة ..ليلى وبنتهه هنودة..لا نعرفهم ولا يعرفونه..ولا انه شغل بيهم..الشيخ يوسف والشيخ احمد جوي ثاني يوم..للمحلة..وافترو على بيوتهه..بيت..بيت..وياهم مروان وعصام وعمي عمر وشكم واحد من المحلة..ضلو يرقون باهل المحلة..واي بيت يلكون اهلة تعبانين..من السحر..ويعيطون ويصارخون..يبقون يقرون بيه لاكثر من يوم..بقو على هاي الحاله..جم يوم..وبلاخير جمعوهم..بساحة وسط المحلة..خلو النسوان بصفحة..والرياجيل بصفحة..وجابو وياهم بعد شيوخ وشيخات مال رقية..حتى يساعدوهم..جابو ميكرفون وكامو يقرون ايات السحر بالمكرفون..والناس تعيط وتصارخ ويضربون دقلات..واللي يترغمل بالتراب..والنسوان تترافس..وتعيط..وتصارخ..وحالة المحلة صارت حاله ..وكلهه خايفة وتتراكض..والقراية بالمكرفون ما بطلت ابد...
الشيخ الحمزاوي..وصلولة خبر باللي ديصير..وعرف انو شيوخ جاي ترقي الناس بالمحلة..راسا..دز على حميدة..واجتي تركض عليه..
الشيخ الحمزاوي..وهوة بقلق..وحيرة..كاللهه سمعتي شديصير بالمحلة..كالتله..يبوووو الليلة راح انفضح..شراح يخلصني من اهل المحلة...كاللهه..زين هسة الحل شنو...كالتله..ماكو حل غير نفلت بجلدنه..كبل ميودوه للدباغ..يله روح لملم غراضك..قبل ما الشرطة تجي..كاللهه هايهية امشي..انتي هم استعدي..اني ساعة بالزايد امر عليج..حتى ننهزم..سوة..نروح لغير ديرة..كالتله..ماشي..خمس دقايق..وتلكاني يمك..
حميدة ركضت..لملمت غراضهه..المهمة..واجتي تركض..على الشيخ الحمزاوي..لكته محضر جنطة جبيرة..ومبطل العمال والعاملات..واصدقاءة ومعارفة كايللهم اختلو هل كم يوم..ولا طلعون لان الشرطة تاخذكم....لملم غراضة وشالهن على جتفة ونهزم هوة وحميدة..
الشيوخ..بقو يقرون ع الناس ويرقوهم..وهل ناس تبجي وتتصارخ..واكثرهم من النسوان.. واثناء ما جان الشيخ احمد والشيخ يوسف يقرة.. الناس كلهه هدت..بقت كم وحدة..مجقلبة ما مستعدلة..استمرو بالقراية..لحد ما كلهم هدو..الشيوخ عرفو ان هايهية..الجن طلع..منهم كلهم..وكامو يكبرون..بالمكرفون..الله واكبر...الله واكبر..والحمد لله الذي هوة قادر على كل شئ..والحمد لله رب العالمين..كالو للناس الحمد لله على السلامة..يا جماعة..
الناس فرحو..والنسوان كامن يهلهلن..ويصفجن ويركصن..ههههه..
الشيخ احمد عاط بيهن..ما اريد وحدة تهلهل وتتمركص..اذا جان صوت المرة عورة شحال التمركص..اختشن على نفسجن..ههههه..
كعدهن بالكاع..الرياجيل كدام والنسوان ليورة..وجان ينطيهم محاضرة..وشوفهم مضار السحر وفهمهم ان الزار هو عبارة عن استدعاء للجن..واصلا هوة حرام..وهواي حجالهم..ما اذكر بالضبط..ههههه(شكد قصفت اليوم) شكرو الشيوخ..وكرموهم وفرحو بسلامتهم..وعرفو..انهم جانو مغشوشين..
بسمة..جانت تبجي مع انو هية ما طلعت وية الناس..الشيخ يوسف شافهه وهي تبجي..اتمشة عليهه وسألهه..حجتله على كل السالفة..وشلون جانت مصاحبة هنوودة..واللي سوته بيهه وبجنان..كاللهه..لاحول ولا قوة الا بالله..كاللهه امشي ودينه لبيت هند وامهه ليلى خل انشوفهم لان ما جايين للجلسة..الجماعية..
عمي عمر كال هذولة جيرانه..ومن دكينه الباب عليهم مارضو يفتحون الباب..
الشيخ احمد كال مو بكيفهم ما يقبلون..ياله شيخ يوسف خل نروحلهم..
مشو..جوي لبيتنه..ضلو يدكون بالباب..ومحد يرد..امي من كثر ما دكو الباب ضاجت..واجتي عصبيه ومتوترة فتحت الباب..وهية تصيح..هاي منو كسرتو الباب..هوة هيج اللي ايدك..متكولون الناس نايمة...
عمي عمر..كاللهه السلام عليكم ام هنوودة..ردتله اهلا وسهلاحجي عمر..كاللهه نكدر ندخل نحجي وياج..كالتله..لا ما اكدر ادخلكم لان البيت مابيه رجال..ومرة ثانية لاتجون ولا دكون بيتي..مفهوووم..وجان تقفل الباب بوجهم بكل قوة..
مروان كال هاي شني هل مرة..معقولة هاي جيرانه..الشيخ احمد ضحك..ههههه وكاللهم ..هاي مو هية سدت الباب هاي اللي ساكن بداخلهه طردنه وسد الباب بوحهنة...
شيخ يوسف..كال احنه العلينه سويناه..عافو البيت..ورجعو..
مروان..وعصام..راحو لمركز الشرطة وبلغو على حميدة..وعلى الشيخ الحمزاوي..والشرطة طلعت داهمت..بيت حميدة وبيت الشيخ الحمزاوي..بس ما لكو احد..شافو واحد يم بيتهم كاللهم اني شفتهم..انهزمو.. بس ما اعرف وين راحو..الشرطة بلغت كل المفارز على اوصاف حميدة والحمزاوي ..وتفتيش كل السيارات اللي تمر بالسيطرات..
ورة فترة اجاهم نداء من احدى السيطرات..انو تم القبض على المشتبه بهم..وجابوهم ودعو المشتكين للتعرف عليهم..وبالفعل تم التعرف عليهم..وتم محاكمتهم..حميدة انحكمت ثمن سنوات سجن..والحمزاوي حكموه بالاعدام..لان من ورة السحر مالته ناس هواي ماتت..وتاذت..ولان جان يستغل البنات ويقشمرهن ويغتصب شرفهن..ورة ما يشربهن..شي يخليهن ما واعيات ع روحهن..
اني كبل ما اسافر..لخالد..رحت واعتذرت من جنان..وقبلت اعتذاري..بس خالتي سوسن..ما قبلت..اعتذاري..وكالتلي..لا تتقربين من عدنه ولا ابد وديري بالج تتقربين منهه مرة الخ..كتلهه خاله اصلا اني مسافرة..رايحة الرجلي والله اعلم نشاوف بعد لو لا..بس اريدكم تسامحوني كبل ما اسافر..
جنان كالت..الله يسهلج طريقج..ان شاء الله..بس كبل متمشين..لرجلج..لازم ترحين للشيخ يوسف..لو شيخ احمد..حتى يرقونج من السحر..بهل لحضة اندكت الباب..وجان يطلع الشيخ يوسف..دخل وكعد..جوة يم عمي عمر..لان جاي يريد يطلب بسمه حتى يتزوجهه..وكاللهم..انتو جيرانهه واريدكم تساعدوني..فرحو هواي..وجنان كالتله..مراح تلكة احسن من بسمه مرة. طيبه وحبابة ومتدينة..وتعرف ربنا..بس كبل كل هاي شيخ اريد منك خدمة...
كاللهه.اتفضلي على راسي وعيوني..
جنان صاحتني..وكالتله..هاي صاحبتي هنووودة..بنت خالتي ليلى اللي حجيتلك عليهه..اريدك تسويلهه رقيه شرعية..هية وامهه..حتى اذا عدهم..شي يطلع منهم وهيه ندمت..وتريد تسافر لرجلهه برة..بس احنة نريدهه تروحلة وهية نظيفة..انعالجهه وندزهه..
كتله اي عفية شيخ..عليك الله..والله اني الليل كلة ما انام..بس اهذري ..واذا دكيت الزار..اصخن واتمرض..
الشيخ يوسف كاللهم..ان شاء الله من باجر ابدا جلسات الرقية ..شكرنة الشيخ..وعلى طول اني وجنان رحنة على بسمة وحجينالهه انو الشيخ يوسف رادهه للزواج..فرحت وكامت اتكمز ..وتصيح واخيرا انفك العارض..هههههه كالت تدرن يبنات انو احسن شغلة انو الوحدة تتزوج شيخ..حتى اذا صاحبت وحدة مثل هنووودة..الكة اللي يكدر يعالجني..بساع..هههههه ضحكن على ضحكهه ..وتصافن بيناتهن...
مرت سنه.....
بسمة..ويوسف تزوجو..وخلفو ولد..ومروان وجنان هم تزوجو..واني سافرت واستقريت يم رجلي..ودزيت جبت امي حتى تعيش ويانه..
حميدة من القهر والحسرة تخبلت بالسجن..من مافاد بيهه العلاج اخذوهه ودوهه لمستشفى المجانين..الحي مالتنه رجع مثل الاول..هادي ومابيه مشاكل..وسالفت الزار وحميدة الناس بالمحلة كامو يتناقلوهه من جيل لجيل..وجانو يدرسون اولادهم..انو مو كل شيخ شيخ..مثل الحمزاوي..الساحر..الشيخ هوة اليتعامل بالقرآن..واللي يتعامل بالدجل والشعوذة ..هذا ساحر ويقشمر الناس..
الزار هذا هوة من الطقوس الوثنية القديمة..وله علاقة..بالشيطان والجن..
روايتنه جانت عن حي كامل وقع ضحية الدجل والشعوذة..كيف الشيطان والعياذ بالله كدر يغويهم كلهم ..كلنا نذكر من طلع ابليس من الجنه..اتوعدانو يغوينا..كلنه..ويجرنة..الى درب الضلال..يعني خصص انو يغوي العباد الضعاف..الايمان...
واللي ايمانه قوي ..مايكدر عليهم..رغم الامتيازات اللي ربنا انطاهه للشيطان..القدرة على الاختفاء..والتنقل بلمح البصر..الا انو كيده ضعيف..لو كدرنة نتحصن..منه وقرينا اية الكرسي..والمعوذات..مراح يجي يمنه..ولو بس كلنة..بسم الله الرحمن الرحيم..مراح يكدر يأذينة..ولو قرينة سورة زغيرة راح يحترك..(سبحان الله) الى هنا تنتهي روايتي اني هنووودة بنت ليلى..اؤجو ان تكونو قد استمتعتم بالقراءة.. واستفدتم مما كتبه قلمي المتواضع..اشكر حسن متابعتكم..وصبركم الجميل...واشكر الاخت التي قصت علي الرواية وصبرها على تساؤلاتي المملة ههههه اخوكم..الكاتب..ليوثي المياحي
