النساء والريح الحمراء
بقلم ..ليوثي المياحي
بسمة جانت كلش خايفة..بس من شافتني واللي صار بيه اجتي تركض علية..وحضنتني..وهية تعيط على حميدة وتكللهه اشسويتي بيهه.. هنودة شصار بيهه..ردت حميدة عليهه وكالتلهه لا تخافين..مابيهه شي ..شوية وراح اتكوم مثل الحصان..ورة شوية صحيت..لكيت المكان هادئ ومابيه اي اصوات او ضجة..بس دخان من كثر البخور وجهي وشعري ملطخ بالدم..ادية الدم يابس عليهن..راسي جان بعدة ثكيل..كتلهه بسمة ..بصوت تعبان..شنو الي صار ..اني ليش اغمة عليه..كالتلي..هسة مو وكت اسئلة..كومي غيري هدومج..وغسلي وجهج ..ترة احنه اتاخرنة على البيت وهسة اهلنة كالبين الدنية علينه..كمت واني اطوطح..غيرت هدومي..وراسي من الوجع يريد ينفجر..طلعت من بيت حميدة والطريق كلة واني اترنح واطوطح..ااااااه يا راسي اخ واجعني هواي..بسمة كالتلي ..هنودة شحسيتي..كتلهه حسيت براسي. ثكيل ورجليني..كوة اسحل بيهن..وركبي ما شايلاتني..جانت عندي رغبة قوية بس اريد اركص ..وية الغنية وبقيت مركزة وية الاصوات..اللي اخترقت اذاناتي..فما حسيت بروحي..بسمة كالت..لا حول ولا قوة الا بالله..هنودة شنو هل طريق اللي احنة ماشين بيه..مبين من اولة خطر..واحسن شي انبطل..ونبتعد..كتلهه ونبقة بايرات لازواج ولا شي..بسمة احنة هايهية..قطارنة صفر راح يفوت..!!! تعرفين اذا فات يعني شنو..كالتلي بس الله اللي كاتبة النه..راح يصير..كتلهه بس العوارض والسحر..وهاي الشغلات..مذكورة بالقرآن..كالتلي..المهم هنودة..اني بعد ما اكدر اجي وياج..بعد لان هاي حميدة راح اتجرنة لمشاكل احنة ابغنة عنهه....
اني بالليل كمت اهذري واني نايمة..واحجي حجي مخربط ..واصرخ فجأة..امي اجتي تركض..وهية خايفة علية..وتكول شبيج يمة بسم الله..اسم الله عليج..كعدت واني عركانه..وحالتي صعبة ..ارتبكت من شفت يمي امي خفت لا تحس..بشي..كتلهه لا لا ماكو شي ماما هذا حلم يخوف..كالتلي زين بنيتي..اقري المعوذات والاذكار ونامي..كتلهه زين امي..
اختي..لمياء..كل ما تمتحن ماتنجح خبلتنه..بالرغم من شطارتهه..وكل امتحان اجاوب على كل الاسئلة..بس من تجي النتيجة تطلع راسبة..وعندي اخوية..متزوج وكاعد بالكويت من زمان..وابوية اتوفه الله يرحمة..اخوية دائما يرسل فلوس النة والحك ينكال الفلوس اللي يرسلهن اخوية مكفياتنة وزيادة..وهوة ما مقصر ويانه ابد..
اني بقيت طول اليوم افكر باللي صار بيه..وفجاة واسمع صوت الزار يدك باذني..احط اصابيعي باذاني..بس نفس الشي..هم الصوت يرجعلي..يا ربي اني شبيه..منظر النسوان مالات الزار ما يريد يروح من بالي..ليش صوت دك الزار ميريد يوخر من اذاناتي ..وهاي الريحة الكريهه..المخبوطة ما بين العرك والصنان..وريحة الدم والبخور ..مدمغة بخشمي...هاي شنو شصار بيه ..هالليلة شنو ...كلبتني من راسي لرجلي..اووووف هاي شسويت بحالي اني..بهل اثناء ..اندكت الباب.. فتحت الباب طلعت صديقتي جنان..هية جيرانه ..وجنان بنية كلش حلوة..ومرتبة..وعاقلة..ودائما جانت ما تستعجل بقراراتهه..وجانت مؤمنه هواي ملتزمة بصلاتهه وكل امور دينهه..من حميدة كالتنه تشتغلون وياي بالزار..هية رفضت..وما قبلت ترجع مرة ثانية..بالرغم من محاولتي اني وبسمة حتى انقنعهه ترجع ويانه..جنان كطعت تفكيري.. وكالتلي..الووووو يمعودة وهية تاشر بجفهه كدام عيوني..هنووودة ...يمعودة...هاي وين صافنة..صار ساعة اصيح عليج..كتلهه علية اني..كالتلي اي عليج لعد قابل على ابوية..شبيج ماتسمعين..
كتلهه والله ماسمعتج..خير جنان شبيج...
كالتلي ..انتي الي شبيج..امج هل ايام تجي يمنه وتشكي منج..خير شكو شصاير..
كتلهه لا..لا..ماكو شي..امي اتكبر الامور..كالتلي لا هنودة امج ما تكبر الامور ..انتي حالتج ما عاجبتني شكو احجيلي اني صديقتج..احجي ولا تخافين محد راح يعرف ..اني اعرف هواي شغلات ضامتهن..احجي ..وعد مني مراح احد يعرف احجي خليني اساعدج..اني من جنان حجت وياي هيج عيوني كامن يخرن بالدموع وطكيتهه ابجية..ونوب وية البجية اشهك..وحجيت لجنان كل اللي صار بيه..وية حميدة...جان كالتلي هذا كلة صار اليلة..يبوووو هاي شسويتي بحالج هنودة..انتي وكعتي بمصيبة بس الله يطلعج منهه على خير..كتلهه يمعودة مصيبة شنو..لا تزيدين علية همي..كالتلي..اني مو كتلكم انتي وبسمة بالمرة الفاتت وكلتلكم....كبل ما تكمل كلامهه..بسمة اجتي دخلت..وكاطعتهه..سمعت سيرتي..خير يبنات شصاير..شبيكم..جنان كالتلهه تعاي انتي الثانية..بدل ما تنصحيهه..وتعلميهه انو اللي جاي اتسويه غلط..تمشين وياهه..وتخلينهه ادك الزار وية هاي السحارة اللي اسمهه حميدة..
بسمة كالت والله هية عاندت ومقبلت ترجع..ورادت تروح وحدهه..خما اعوفهه تروح..كتلهن..هاي شبيجن..انتن شايفات الحالة اللي صرنة بيهه..يعني عاجبكم اني ليهسة ما كادرة اتزوج..خالد..كل ما عرسنة يقترب..اتصير مصيبة..لو ابوه يموت..لو خاله..لو عمة يسوي حادث..ويموت..لو اهل الشغل يطردوه من شغلة..لحد ما اهلة كامو يفكرون انو اني بومة..وجيتي عليهم فكر..يعني عاجبكم..هيج..لو اختي الزغيرة..كل متمتحن وما تنجح..برغم انها شاطرة وبكل امتحان اجاوب.. وانتو تعرفون هذا الشي كل الزين..
جنان كالت..هنودة..لا يصيبنا الا ما كتب الله لنا..خليج مؤمنه مثل ما كال سيدنة الرسول صلى الله عليه وسلم ..وان اجتمعت الامة على ان يضروك بشئ لن يضروك بشئ الا شئ قد كتبه الله لك..اللي جاي اتسوينه هذا كفر..وانتي كل عقلج هاي حميدة تكدر تغيرلج شغلة من اللي الله كاتبة الج..اذا مقتنعه..يعني انتي جاي تقشمرين على روحج..
كتلهه بس جنان السحر مذكور بالقران..يعني يسوولنة السحر ويأذونة ونكعد نباوع ..بعيونة..وبس..
بسمة كالت..والله اني ما اكدر..افتي بهاي المواضيع..لان كلامجن اثنيناتجن صحيح ومنطقي..بس انتي جنان..تذكرين حميدة من اهل المحلة طلعوهه شكالت..تذكرين لو لا..جنان كالت اي اتذكر كل الزين..بس مو هية اللي تقرر..مصيرنا..ولا تعلم الغيب..يمكن مشت اعمالهه على ناس..ومشت صحيح وياهه..بس مهما يكون هية مو اكبر من ربنه ولا اقوة منه..الله واكبر عليهه..بهاي اللحظة اندكت الباب مال البيت .. امي طلعت ..لكتلة ساعي البريد..ونطاهه رساله مكتوب عليهه عنوان البيت..مالتنه.. هنودة..كتلة هلووو حبيبي خالد شلونك..كلي الحمد لله اني بخير..اكلج هنودة..كتله هاااا
كالي اريدج اجهزين نفسج للعرس ..خلال هاي التلث اسابيع الجاية..لان اجتني منحة وراح اسافر لسورية ..اريد اكمل العرس واسافر ان شاء الله..
اني ما صدكت نفسي كلبي كام يركص..من الفرحة ومكيفة..كتلة انته تحجي صدك..كالي اي يا روح خالد..الحمد لله فرجت..هنودتي..هايهية راح نسوي العرس..واسافر ومن ارجع راح اكدر ابني بيتنه..ونكعد بيه..طول العمر..
كتلة الله..هذا احلى خبر سمعتة الحمد لله ياله اقفل الخط اني لازم اجهز نفسي..الوكت كلش قليل..خالد ضحك..ههههه..ماشي..يالة في مان الله ..
قفلت الخط وكمت اعيط واصرخ واهلهل..واكمز ..فرحانة بسمة وجنان بقو فاكين حلكم..كالولي شبيج هنووودة شكو...
كتلهم همزين العارض انفك من علية..مو كلتلكم بركاتج يشيخة حميدة..بسمة وجنان بقو صافنين ابوجهي..ومبحلكين عيونهم على عرضهه..
واني مكيفة..وفرحانة اجني باركن الي..بسمة الموظوع دخل براسهه..وجنان..ابد مقتنعت ولا تريد تقتنع..كتلهن ها صدكتن..حضرن رواحجن حتى اخذجن لحميدة...بسمة كالت اي نروووح..وجنان بقت بقت ساكته شوية ..وفتحت الباب وطلعت..واحنة ماشين بالطريق لبيت حميدة..كلت لبسمة شفتي جنان..الحاقدة ..تريدني ابور مثلهه..وابقة معفنة محد يكلبني..بسمة ردتني كالتلي..لا هنودة والله جنان حبابة وانتي تعرفينهه..كتلهه لعد ليش متريدني افك العارض مالتي..وجانت اتقنعنة ما نروح لحميدة..وان الي جاي انسويه..حرام..بلة فسريلي انتي شنو معناتهه..كالت بسمة..لا هنودة ترة اسراء تخاف عليج..بس هية عدهه قناعة بانو هذا العمل حرام..وهية ما فرضت عينه شي..هية حرة بنفسهه..كتلهه على كولتج هية حرة...وصلنة يم حميدة..وكتلهه بالخبر..وحميدة...وللحكاية بقية....
