النساء والريح الحمراء
بقلم...ليوثي المياحي
حميدة حست بحركة بكلبهه..وقهر..وحسرة..على خالتهه فاطمة..واللي صار بيهه..كالت اكيد خالتي فاطمة استنجدت بيه واني ماكو...اوووف شلون حالتج خالتي والنار شبت بجسمج..اكيد تألمتي هواي..جانت تحجي وتشهك...جابت عمال ونضفت البيت ..من الرماد والصخام..ورجعت رممته..من بياض وصبغ.. ومكدرت اتأثثة مثل قبل لان فلوسهه من دك الزار جانت ضامتهن ابقجة وخالتهن بالكنتور..ومثل متدرون الكنتور هوة وغراضه اكلته النار..راحت على الشيخ..الحمزاوي..وكالتله..شيخ تذكر هاي البنية هنوودة..بنت ليلى..
كال...اي اذكرهه هاي احسن زبونة جبتيهه الية من بين كل الزباين..
كالتله..دممممرررهه
الشيخ حمزاوي ضحك ههههه اموت عليج وانتي زعلانه..جان اثنينهم يضحكون فد ضحكه.هههههه...والضحكة جانت شريرة..بيهه الف قصد..
جنت اعرف ومتاكدة..انو حميدة مراح تسكت ..واكيد راح تريد تنتقم مني..فكرت شلون اخلص منهه ومن شرهه..رحت لدائرة البريد ودكيت تلفون لخالد ..كتله..حبيبي خالد..اني مشتاقة الك هوايه..وبعد ما اكدر على بعدك..اريد اجيك..واعيش يمك..
كالي ..خير شبيج هنووودة شو صوتج معاجبني..شعجب هسة..صارلي سنه اتحايل عليج حتى تجين وتعيشين يمي وماتقبلين...ليش هسة..ترة اني اجازتي صارت قريبه..واني راح انزل اجيكم..كتلة ما ادري بس اني مشتاقتلك هواي وما اكدر اصبر لما تجي اجازتك..وكمت ابجي وهوة يسمعني..كالي كافي لاتبجين..الله يهديج..لاتبجين..زين خلصي الاجراءات مال الجواز..واني راح ارتب الزيارة..كلتله حبيبي خالد اني ما اريد زيارة..اني اريد اجي اكعد وياك دووم..لان مليت وانته مو يمي..
هههههه ضحك وكالي حبيبتي تدخلين اول مرة زيارة..وبعدين نشوف طريقة اخليج تكعدين وياي..كتله اي ميخالف..
كمت من ثاني يوم استنسخت مستمسكاتي..ورحت اخذت صور يم المصور..ورحت الدائرة الجنسية ...لكيت واحد عرف..كتلة اريد اطلع جواز بس مستعجلة..وشكد يكلف فلوس ادفع..قبل واخذ مني مستمسكاتي..واخذ فلوس..وكال اني اكملهن الج...ورة اسبوع طلع جوازي..جنت مستعجلة كلش لان ادري حميدة جاي ترتبلي بلوة حتى اذبني بيهه..
مروان سافر لسوريا واول موصل راح للشيخ يوسف..وحجاله..على كلشي يخص جنان وشرحلة حالتهه وكاله..انو لا زم يجي لبيت عمي عمر..حتى يرقي جنان..كاله ماشي بس ارتب وضعي..حتى نسافر على طول ونروح لجنان..كاله اني اي شي يساعد اي انسان اني اكيف اسويه..
المهم رتب وضعه وسافرو اجوي على بيت عمي عمر..دكو الباب وطلعلهم عمي عمر..سلمو عليه..مروان عرف الشيخ يوسف لعمي عمر..وعلى طول راحو لغرفة جنان..اول مشافهه شيخ يوسف..استغفر ربه وكام يحتسب..وكال هاي بنتكم مسويلهه عمل قوي هواي..كاللهم جيبولي سطل بيه مي نضيف..كعد مقابيل السطل وكام يقرة عليه..ايات خاصة بالسحر..وبصوته..اللي جان بيه حنيه..واضح وكلش حلو..وبدون استعجال جان صوته وقرايته بيهه نوع من الطمأنينه..هوة يقرة وكل شوية يتفل بالسطل..ورة ما خلص ..كاللهم جيبولي..زيت الزيتون..راح عمي عمر وجابلة بطل زيت الزيتون..وهم كام يقرة عليه الايات مالات السحر..وخلاهم بصفة..وكاللهم اريد البنية وامهه بس وانتو كلكم اطلعون برة..اوكفو بالباب..
صاحو على امهه واجت كعدت يمهم..مروان وعمي عمر واخوتهه طلعو برة الغرفة..وضلو يتانون يم الباب..الشيخ يوسف كام يقرة بصوت كلش عالي..ايات السحر ..
بسم الله الرحمن الرحيم
وَاتَّبَعُوا مَا تَتْلُو الشَّيَاطِينُ عَلَى مُلْكِ سُلَيْمَانَ وَمَا كَفَرَ سُلَيْمَانُ وَلَكِنَّ الشَّيَاطِينَ كَفَرُوا يُعَلِّمُونَ النَّاسَ السِّحْرَ وَمَا أُنْزِلَ عَلَى الْمَلَكَيْنِ بِبَابِلَ هَارُوتَ وَمَارُوتَ وَمَا يُعَلِّمَانِ مِنْ أَحَدٍ حَتَّى يَقُولَا إِنَّمَا نَحْنُ فِتْنَةٌ فَلَا تَكْفُرْ فَيَتَعَلَّمُونَ مِنْهُمَا مَا يُفَرِّقُونَ بِهِ بَيْنَ الْمَرْءِ وَزَوْجِهِ وَمَا هُمْ بِضَارِّينَ بِهِ مِنْ أَحَدٍ إِلَّا بِإِذْنِ اللَّهِ وَيَتَعَلَّمُونَ مَا يَضُرُّهُمْ وَلَا يَنْفَعُهُمْ وَلَقَدْ عَلِمُوا. لَمَنِ اشْتَرَاهُ مَا لَهُ فِي الْآخِرَةِ مِنْ خَلَاقٍ وَلَبِئْسَ مَا شَرَوْا بِهِ أَنْفُسَهُمْ لَوْ كَانُوا يَعْلَمُونَ.
