النساء والريح الحمراء
بقلم ...ليوثي المياحي
باوع على جنان ..حس بشي غريب مشة بجسمه..مثل صعقة كهرباء..فز من مكانه..وهوة يردد..بسم الله الرحمن الرحيم..
جنان هم فزت..وكالتله..خير شبيك..كاللهه ..لا ماكو شي بس حسيت مثل نتلة الكهرباء بحسمي مشت..كالتله..اخاف ما مرتاح بكعدتك..مروان كام يتمتم..وية روحة وكام يحجي حجي ممفهوم مخربط..وكام يحجي شيش بيش..جنان استغربت..من كلامة..كالتله مروان شبيك ..احنة وين جاي نحجي وانته وين..اشجاب الجلاق ع الدولمة..هههه
مروان استحه من روحة وكاللهه ..بس دقيقة اروح للحمام وارجع...كالتله تفضل..
مروان كام ودخل الحمام..فتح البوري وغسل وجهه..استغفر ربه وتوضه..وطلع من الحمام ..وراح كعد كبال جنان..وهوة مغطي وجهه باديه الاثنين..ويقرة اية الكرسي..والمعوذات والاواخر من سورة البقرة..وراهه تفل بايديه ومسح كل جسمة ..باوع على جنان..اللي جانت كاعدة كباله وهية صافنة على اللي ديسويه ..جانت تشك بيه ..خبالات او شي من هل قبيل..مروان باوع عليهه..وفتح عيونه بكل قوته..جنان ارتبكت..وكالتله..خييير..انننت ششششبييك..ليش تباوع علية هيج..مروان كال. لا حول ولا قوة الا بالله وهوة يضرب جف بجف..لا حول ولا قوة الا بالله..باوعي يا بنت الناس ..روحي صيحيلي ابوج..جنان زعلت منه وراحت صاحت ابوهه..عمي عمر ..اجة على مروان وكعد بسدة تبسبسو بيناتهم .. مروان كام وركض على الباب فتحة وركب سيارته..وفلت..خالتي سوسن هية وجنان ضلن مستغربات..شبيه هل رجال..يمكن مخبل..شبيه..اول ما اجة جان كلش هادي شبيه اليكول انكرص..خالتي وجنان راحن على عمي سألنه..كاللهن والله ما اعرف شبي.. ولا حجة كلمة..بس كال عود امرلكم مرة ثانية..وطلع يركض..ما اعرف شصار بيه..خاف انتي جنان سويتيله شي سمعتيه كلام..كالتله..ابد والله يابة..اني اصلا ما حجيت ولا كلمة..
خالتي سوسن ضلت تبجي وتندب بحضهه وحض بنتهه..يبوو شلون حض حضج جنان..اجت الحزينة تفرح مالكتلهه مطرح..يل ما تهنيتي يوم واحد ..مبين راح تكعدين يمي العمر كلة ومحد يكلبج يالبومه..عمي عمر صاح بيهه..ولج جم مرة كلتلج اسدين حلكج..كبل ما اجي اقفلة الج..بنتج ما بايرة..هاي زينة البنات..خل يولي باجر يجيهه اللي احسن منه بميت قاط..
جنان كالت..اي شسويلة اني هم ما ذابة عليه روحي..قابل اللي خلقة ما خلق غيره..يمه هذا قضاء وقدر..واللي قاسمة الله الي لازم اشوووو....وكبل متكمل كلامهه لزمتهه دوخة وكعت بالكاع..عمي عمر وخالتي سوسن..خافو عليهه..خالتي كامت تعيط وتصرخ..الحكوني ياناس.. بتي..بتي..راح تموت..راح تروح من ايدي..الناس والجوارين التمو عليهم وشالوهه ودوهه للمستشفى..نوموهه ..وراحت بغيبووبه..يومين..وهل يومين..بس اتهذري ..بكلام ما مفهوم..والحلم اللي حلمته..المرة الفايته..ابد ميفارك مخيلتهه..وكل شوية تفز..وتكوم تصرخ وتصيح..ويغمى عليهه مرة الخ..عمي عمر..جاب القرآن وكعد يم راسهه..وكام يقرالهه..وبدة بسورة البقرة..بس صوت ابوهه باذانهه جان عبالك صوت جواكيج..وتدك براسهه..وضلت تصرخ وتبجي وتعيط..الدكاترة كالولهم..عدهه ضعف..لان ما تاكل زين..ودمهه قليل..لازم تنام مستشفى لحد ما تصير زينة وتطلع..
بسمة كالتلي..اكلج هنودة شنو ابالج صاير ابجنان..يجوز عمل سوته حميدة..كتلهه اكيد حميدة لعد منو قابل..بسمة كالتلي..زين شنو مصلحة حميدة..كتلهه ..بسمة انتي هبلة..انتي مو تذكرين عمي عمر..هو اللي طرد حميدة من المحلة..بسمة كالت اي صحيح بس المحلة كلهه شاركت ..مو بس هوة..بعدين جنان شنو ذنبهه..حرام اللي يصير بيهه..كتلهه بسمة تردين الصراحة..اني اشمتت..بيهه..حتى ما تكعد تسويلنه روحهه..الشريف الرضي..بسمة كالتلهه..عيب عليج هنودة هل حجي..جنان عمرهه ما غلطت على واحد..ودائما تحب الخير..لكل الناس..الله يشفيها..ويشيل منهه المرض ان شاء الله..وانتي هنودة ربنة يجفينه شرج..اني ضحكت..باستهزاء وبترس حلكي..ههه شتحجين..انتي هية بعدهه شايفة شي..بسمة كالتلي..ولج ابعدي منهه واذا تحاولين اتاذينهه اني راح اوكف بوجهج..سمعتي..كتلهه شنو ..ما بقت بس بسمة الخوافة توكف بوجهي..دفتحي حلكج..وشوفي شراح يصير بيج..اذا ما صرتي مثلهه..بسمة باوعت علية وكالتلي باعي اني هاي الطرق الوسخة مالتج..كلهه اعرفهه..واذا تقربتي من جنان..مرة الخ..الا اوصل كل سوالفج لرجلج خالد..سمعتي لو لا..عل اقل اني ما عندي شي اخسرة..بس بسببج كمت ادك زار..وية هاي الكافرة حميدة..وتركت صلاتي من وراهه..يعني مابقة شي عندي واخاف عليه..بس انتي خافي على بيتج ورجلج..وهاي خليهه ترجية باذنج..اذا اذيتي جنان..مراح اتشوفين مني خير..
اني صراحة خفت كلت هاي مخبلة تروح تسويهه وتكول لخالد ساعتهه وين وين اروح...سكتت وما رديت عليهه..بس وية روحي كتلهه اصبريلي اذا ما ادبتج ما اكون اني هنووودة ..
جنان...نايمة بالمستشفى وتعبانه هواي وكل يوم حالتهه د تصير اسوء من اليوم الكبلة..امهه عيونهه نشفت من الدمع..كاعدة كبال بنتهه وحالهه ميفرح لا عدو ولا صديق..وفجأة تذكرت..حميدة..طلعت من المستشفى راحت كبل على بيت حميدة..دكت الباب..جان حميدة فتحته..خالتي سوسن اول مشافت حميدة..كامت اتصيح وتعيط..وتغلط عليهه..يامرة ياحقيرة..شمسويتلج بنتي..حتى هيج اتسوين بيهه..حرام عليج..بنتي شنو ذنبهه..
حميدة عصبت وضربتهه راشدي ع خدهه..وكعتهه بالكاع..وكالتلهه..والله انتي الحقيرة..تذكرين من رجلج طردني من المحلة..وجابلي الشرطة..ورماني بالشارع..مثل الجلبه..ماجان كلتيلة هذا اللي اتسويه غلط..ليش سكتي..وهسة جاية ترمين بلاج علية..وبعدين انتي اللي اجيتيني مو اني..اجيتج..خليج..مذكرة زين..خالتي سوسن..كامت من الكاع ونفضت روحهه واتقربت على حميدة اوكعت على رجلينهه..وتترجاهه..وتتوسل بيهه..تكوللهه عليج الله حميدة..عوفيهه لبنتي خطيه اشافت من دنيتهه..عاقبيني اني ابمكانهه..اروحلج فدوة..حميدة كالتلهه اني ماعندي شي وياج ولا انتي ماذيتني..حتى ااذيج..بس اني طلابتي وية الحاج عمر ..اذا ما اجاني الهنا وترجاني..ما افك العارض من على بنتج..يلا اطلعي من بيتي ..او وصلي الحجي مالتي للحجي..لا تنسين...
خالتي سوسن طلعت من يم حميدة..وهية تجرجر برجليهه..وندمانة على اللي سوته ابتهه..وكالت ياريت لو بقت كاعدة بايرة يمي ولا يصير بيهه شي..اوووف يا ربي..ساعدني ما عندي غيرك اشتكيلة..
وهية راجعه..لكوهه نسوان..من نساوين المحلة..وسألوهه..عن اخبار جنان..حجت الهم اللي صار بيهه وسبحان الله كلهن جانن مغشوشات ومخدوعات..مثل خالتي سوسن..من راحو ومشو على حميدة..منهن اللي بنتهه تزوجت ورة فترة تطلكت..واللي بنتهه تمرضت وما لاكيلهه علاج..واللي عدهه ولد وباقي عاطل كاعد بدون شغل ..وكل وحدة كامت تحجي همهه..وعرفو ان حميدة جانت اتقشمر عليهم وتاخذ فلوسهم ..بدون ما تسويلهم شغلة..اتاكدو ان شغل حميدة عبارة عن دجل وشعوذة وضحك على الناس..فقررو ينتقمون منهه.. وياخذون حقهم تلث مثلث منهه..
اني رحت مشيت على حميدة..واني ضايجة وشايلة من بسمة..كمت احجيلهه واشتكيلهه..من بسمة..وشلون..كامت اتهدد بيه..حميدة..كالتلي هوة انتي..شوفتيهه اشصار بجنان من وراج..كتلهه..هاي شلج بيهه..خاله اني شعلية..الكل يعرف انتي ورة اللي ديصير بجنان..لان كبل ابوهه عمي عمر طردج من المحلة..
حميدة كالتلهه..اني شعليه..لاذبينهه براسي..اني طلعت من المحلة ولا اكو شي بيني وبين الحاج عمر..وباعي انتي هم لا اعرفج..ولا تعرفيني زين..ولو سمحتي..مرة الخ..لا تجيني هنا بعد..
اني اتعجبت من حجيهه وكلتلهه..شنو ..شنو باله عيدي الحجي ماسمعت زين.. كالتلي والله هاي مشكلتج..مو مشكلتي ما سمعتيني..انتي جاية تردين اذبين بلاج علية..وبعدين انتي اللي جنتي حاقدة على جنان وتموتين منهه..مو اني..وانتي اللي خليتي الشيخ الحمزاوي..يسويلهه عمل..لو نسيتي..
كتلهه..ههههههي ..اي بعد وبعد ..احجي طلعي شكو حجي بكلبج..احجي..باعي لا تخليني افضحج وانشر غسيلج ع الحبل.. وشلون تاخذين البنات وتوديهن لشيخج الحمزاوي..وتخليه يغتصبهم مقابل اللي همة يردوه..يعني اكلجياهه بالقلم العريض ..كوادة..واذا ناسية اذكرج..
كالتلي..اذا عندج دليل..واحد ضدي ..طلعيه..واذا ما عندج شوفيني عرض جتافج..يلا اطلعي برة..برة..ولا تشوفيني خلقتج الزفرة بعد؟؟؟
اني ضجت منهه حيل وصرت اعصاب..وكتلهه باعي ولج ام السحورة..مو اني اللي انكال لحم وانذب عضم..باجر..راح ااسس مجموعة زار احسن منج ومن مجموعتج..وشوفي شلون راح اسحب معاميلج وحدة وحدة..واريد اشوف شراح اتسوين وكتهه..
حميدة ضحكت.ضحكة..باستهزاء..وكالتلي..ههههههاااااي..اي امشي..روحي جربي حضج..بلكي اطك وياج ..وطشين....دفعتني طلعتني برة وسدت الباب كل قوتهه وراي..
زعلت وشبعت قهر..وخصوصا ما اكدر اسويلهه شي ..لان الشيخ الحمزاوي اكيد راح يوكف وياهه..ويدعمهه..بس حسيت اني خسرت كل الناس وما بقة بس رجلي خالد وما اريد اخسرة.....
جنان طلعوهه من المستشفى..ودوهه للبيت..بس صارت عبارة عن شبح..ونايم..ع السرير..لا تتحرك ولا تحجي..بس النفس يصعد وينزل..ومن تنام تجيهه احلام تخوف وتحس بروحهه مخنوكة ..لحد ما كامت اتخاف من النوم نفسة..وتبقة سهرانه..الليل كله..حتى من قلة النوم ..صارت داير مداير عيونهه اسود..وحالتهه.. صارت صعبة..خالتي سوسن..ضلت تلوم بحضهه..وحظ بتهه..وكاعدة بصفهه..وما تكدر اتسويلهه شي..
امي راحت عليهه..وكالتلهه ليش مدكلهه زار حتى تصير زينة..عمي عمر ما قبل يدك زار وكال هذا العمل حرام..وكال بنتي الله كادر..يشفيها مثل ما ابتلاهه بالمرض..
بسمة حظها جان مصخم..كل ما تقدم على وضيفة..تروح للمقابلة ويرفضوهه ..بس ما قبلت بعد تروح على حميدة لان راحت عليهه اكثر من مرة..وما كدرت تسويلي شي..واستغفرت ربهه لان راحت وراجعت يمهه..من البداية..ورضت باللي كاتبه الله الهه..وللحكاية بقية
