الشيخ كاللهم ..اخذو هذا الحجاب وادفنوه بصف الباب اللي جانت ساكنه بيه حميدة بالجهه اليسرة من الباب.. ركزو زين ولا تغلطون بالجهه اليسرة من الباب ..زين..
ورة مدفنوه تعالو ارجعولي حتى افهمكم شسوون وراهه..
الشباب كالولة صار شيخنه..اخذو الحجاب وراحو بعد ما ودعو الشيخ..
حميدة بهل وكت جانت نايمة.. جان تفز كمزت من فراشهه وهية تصيح وتصرخ..خالتي فاطمه..خالتي فاطمه..فكووووه.. فكووووووه ..خلص راحت هيبتي بالمحلة... خالتهه فاطمة كالتلهه هوة شنو اللي فكوه فهميني ..شنو الصاير..؟؟؟
حميدة ..العمل ياخالتي..فكو العمل ..المجرمين هذولة فكو العمل.. بس ما اخليهم يتهنوووون.. اله اروح واجددلهم العمل..اني الهم ..ما اخليهم يعني ما اخليهم ..يعيشون براحه...
خالتهه فاطمة كالتلهه حميدة يابنتي عوفيهم بحالهم وخلينه احنه بشغلنا شنه غرض بيهم ..
حميدة كالتلهه ..لا والله ما اعوفهم اله اخليهم يجون ليمي وهمة مذلولين.. ما ارتاح ..
طكت العباية وخلتهه على راسهه وطلعت وردت الباب وراهه ..راحت لشيخ اسمة الحمزاوي ..هذا الشيخ كلة يتعامل بالسحر السفلي ..كاعد ابيت قديم مبني من اللبن والطين..وخابط وياه طابوك احمر فرشي قديم ..ومسوي غرفه خاصة باعمال السحر وهاي الغرفه دومهه ظلمة ومخلي بيهه راس مال معز وهدهد مجفف وجلد مال ذيب واشكال من اللعابات المدماية واللي اتخوف..جان ها الشيخ عندة نسوان يخدمنه بس مانعرف شغالات عندة لو نسوانه ومزوجهن ..لان جانن اكثر من وحدة.. هوة جان رجال جبير بالعمر هيج يطلع عمرة بالستين سنه.. ومن شغل السحر عندة عمارات ومحلات واملاك..كله من هل شغل ..حتى الشيخ الحمزاوي محد يعرفه بالشكل لان دائما مغطي وجهه وميشوفة لحد..بس عندة اشخاص معينين يفتح وجهه الهم..وشي اكيد حميدة من ضمنهم ..
حميدة درعت الباب ودخلت كبل .. على الشيخ الحمزاوي وكعت على ايدة..وباستهه كالتله .. يا شيخ ساعدني ..اني ابعرضك..ياشيخ..
كاللهه ..انتي ما طول ما تسوي اللي كلتلج عليه .. تستاهلين اللي يصير بيج..
حميدة كالتله.. والله مايحتاج حلفان اني اسوي كل اللي اتكولي عليه ..وبالحرف الواحد..كاللهه اني مو كلتلج اجيبلي زبونات جدد ..اشو ماكو ولا وحدة دزيتي..
كالتلهه ..اصبر شوية يا شيخ جايبتلك زبونات كلش مليانات وثكيلات..بس انته سوي اللي كلتلك عليه ..واول شغلة اريدك تجددلي العمل ..واريدة اقوة من ذاك العمل الاولاني..
الشيخ الحمزاوي ..كاللهه هذولة اهل المحلة راحو لشيخ كلش قوي.. بس مهما يكون مو اقوة مني..باعي اني راح اجدد العمل مرة ثانية..بس اريد منج اجيبيلي ..ديج..حتى اذبحة لان محتاج دم ضروري..دم..
حميدة ..كالتلهه اصبر هسة اروح واجيبه الك..طلعت حميدة وراحت لسوك الدجاج اشترت ديج..وجابته ع السريع..دخلت على الشيخ والديج بايدهه يقاقي..
كالتله هذا الديج شيخ..اخذه من ايدهه وعلى طول ..اخذة وذبحة ..بدون ما يخليه على القبلة او يكبر عليه ..الدم كام يطفر منه..جاب شطيطة وبللهه بالدم ..واخذ كلاص وترسة دم واخذ ريشة من ذيل الديج وكص وصلة من جلد الديج.. وكام يغمس الريشة بالدم ويكتب عبارات واحرف وارقام طلاسم مامفهومة ..واخذ لعابة هيج شكلهه مخربط ..محلوة..وجاب دنابيس هواي وكام يدردم بحجي ممفهوم مبهم ويجك العابة بالدنبوس ويخليه ما يطلعه ..وياخذ دنبوس ثاني و هم يطعن اللعابة بيه وية الكلام الممفهوم مالته..واخذ قلم وكام يشخبط على اللعابة وبخط ناعم هواي كتب ..بسم الله الرحمن الرحيم بس بالمكلوب..وكتب جواه بسم السالوس الاقدس الامين ..وكلب اللعابة وكتب عليهه سورة الاخلاص ..الاية الاولى بس.. وهم كتبهه بالمكلوب..وكتب وياهه طلاسم بحيث ملة جسم اللعابة كتابات..وجاب الشطيطة اللي ملا هه دم ولفهه على اللعابة..وجان يجيب موس مال عمليات حاد هواي .. وكطع راس اللعابة..وكام يشكك بيهه..كال لحميدة شيلي هاي الشغلات وروحي امشي بالمكبرة ..وادفنيهه يم اي كبر..واذا اكو بنية تزوجت بالمحلة تعاي اتفلي بوجهي..مراح يتوفق اي واحد بيهم...
حميدة كالتله بس يا شيخ واذا راحو وفكو السحر اني ذاك الوكت شسوي ...ناري ماتبرد اذا ما شفتهم مشردين ومذلولين..
الشيخ نتر بوجهه وكاللهه شنو انتي ما عندج ثقة بيه..كالتله بخوف لا..لا..لا يا شيخ اعفو عني لساني زل ليش اكو واحد مثلك..انته مجرب واني عندي كل الثقة بيك..سامحني ياشيخ..
الحمزاوي كاللهه ..ماشي روحي سوي الي كلتلج عليه ..وراح انتضر زباينج ..لا طولين علية ..زين
كالتله ..حاضر يا شيخ واخذت اللعابة والشغلات الثانية وطلعت ..راحت على خالتهه فاطمه ..وحجتلهه على كل اللي صار بينهه وبين الشيخ الحمزاوي..وكالتلهه اريدج تجين وياي نروح للمكبرة ندفن هذني الشغلات ونجي ..
خالتهه فاطمه كالتلهه انتي مخبله..اكو وحدة تدفن السحر بعز النهار.. ما ينفع خل تصير الدنية ليل ..وناخذ ويانه فد ولد حتى يحفر الكبر.. اني وانتي وين نكدر عل حفر..
حميدة عوصت عينهه والعين الثانية كامت تجدح شرار ..وكالت والله اذا ما ذليتكم وعنست بنات المحلة ناري ما تهدة اصبرولي يا كواويد..
الليل اجة وفاطمه وحميدة مشو وهمة يتلفتون يسرة ويمنه اللي يكول بايك بوكة بنصاص الليالي ..وياهم واحد من هذولة اللي يشتغلون وياهن ..وصلو للمكبرة وع السريع دفنو اللعابة هية وشغلاتهه ..ورجعو وهنة مكيفات ..
مرت سنتين والحال بالمحلة صار من سئ الاسوء ماكو اي زواج . وحتى اذا صار واحد من الشباب تقدم لخطبة بنية ..ماتكمل الشغلة.. والطلاك كثر والمشاكل زادت بين الناس..تكول لعنة ونزلت على اهل المحلة..
اهل المحلة اتاكدو ان حميدة هية السبب بكل اللي ديصير بيهم ..رجعو راحو للشيخ مرة ثانية ..ما لكوه ناس تكول مسافر وناس اتكول انهزم..
من الشباب راحو دفنو الحجاب اللي سوالهمياه الشيخ بصف باب حميدة القديم وبالجهة اليسرة منه مثل ما كاللهم الشيخ ..كام نطاهم وصلة قماش لونهه ابيض وكاللهم نكعوهه بسطل مال مي وروحو افترو على اهل الحي وخلوهم يشربون منهه كلهم حتى حالهم يستعدل ويبطل سحر حميدة..الشباب سوو مثل مكاللهم الشيخ وافترو على اهل المحلة كلهم شربو مي الا حاج عمر رفض وكال هذا عمل دجل وشعوذة واني ما امن بيه ..بس الناس كلهم شربو المي مثل مكال الشيخ ..
بس حميدة راحت وجددت العمل بواحد بعد اقوة من الاول .. والحال بقة مثل ما هوة عليه.. وانوب صار اسوء ..الشيخ بيته احترك..بس هوة طلع سالم.. وهج من مكانه بعد ما اجته تهديدات..ومضايقات..
اهل المحلة اجتمعو مرة ثانية ورادو يشوفون حل لحالهم هاي ..اكو ناس قررت اتشيل من المحلة .. وناس كالت لا منشيل لان هوة هذا اللي رايدته حميدة.. ومثل ما طلعناهه من المحلة تريد اطلعنه..ولازم ما نطيهه الفرصة وتنال اللي ابالهه ..هاي بيوتنه ومراح نطلع منهه ابد...
فاتت سنة والحال مثل ما هوة .. اني وصديقاتي قررنه نروح لحميدة ونحجي وياهه حتى اتشيل من عدنه العنة وتفك العارض اللي مسويته النه ..لان العمر كام يمشي وخاف يفوتنه القطار.. قررنة نروح بدون ما احد يعرف ..
طلعنه مشينه على مكانهه ..من وصلنالهه ..وشافتنه كيفت وفرحت هواي بس ما بين عليهه ..سلمت علينه عادي ...وكالتنه كل الهلا بيجن حبيبات.. منو هنودة وبسمة وجنان...ياهلة بيجن اتفضلن اتفضلن..
كتلهه ..خاله حميدة لا تكون جيتنه ازعجتج.. كالتلي ..شلون معقولة .. باعي انتو اتشرفوني باي وكت.. انتن حبيبات كلبي ..وبيناتنه عشرة..والعشرة ما تهون الا على اولاد الحرام..اتفضلن ابيش اخدمجن...
جنان كالتلهه خالة اجيناج بالبوكة ورايدين عطفج ومساعدتج..احنة حالنة وكف والعمر يمشي جيناج انريد اتفكين العارض اللي صابنه..
بسمة كالتلهه اي والله خالتو حميدة ..اني امي وابوية مشاكل على طول والحال بيناتهم وصل للطلاك.. بالله ...بعد هالعمر والعشرة الطويلة يردون يطلكون..
اني كتلهه خالتي حميدة صارلي تلث اسنين ما اكدر ازوج ..ولا اشتغل ولا اسوي اي شغلة ..واختي الزغيرة كلما تمتحن تسقط مع انها شاطرة هواي وخطية تقرة ليل ونهار..
حميدة كيفت من اللي سمعته من عدنه.. وكالت النه..بس يا بناتي اني شنو اللي بايدي واكدر اسويه الجن..
بسمه كالتلهه احنة نعرف كل الزين ..يا خالة انو اهالينة غلطو وياج ..بس احنه شنو ذنبنه ..ارضي علينه وسامحينه الله يرضة عليج..
حميدة صفنت شوية وكالت اي اني اللي سويت العارض واذا تردن اتفكنه.. اسمعن كلامي.. واللي اكوله الجن اتنفذنه بالحرف الواحد.. كلياتنه صحنه بصوت واحد اي خالة صار.....وللحكاية بقية
