قصة محمد ومها
البارت الاول.....
اني اسمي( مها) عمري 20 سنة وعندي أخت اسمها (نهى) عمرها 18 سنة آني بنية بيضة طويلة شعري اسود صح عيوني صغار وسود بس حلوة وأختي عكسي قصيرة وسمرة وعيونها كبار. عايشه ويه بيبيتي وجدي وعمي وعمتي وأبويه ومرت أبويه وبنت عمتي... جانت بيبتي صارمة وقوية وحيل ضاغطة علينا فوك الخيال ضغطها علينا بحيث للكراج مال البيت منطلع مكعدتنا بين اربع حياطين.
كعدوني من المدرسة من صف خامس ابتدائي واختي صف ثالث ابتدائي...أبويه عصبي نار وعمي بعد نارين وعمتي وبنت عمتي حالها من حالنا لان عمتي مطلكة , تزوجت سنة واطلكت وصار عدها بنية واسمها "سعاد" اصغر من عندي تقريبا بخمس سنوات بس احنا وياها خوات ..سرنا واحد , حجايتنا وحدة, بس الفرق شنو؟ هي خلوها تكمل مدرستها ومدلليها حيل واني واختي ما النا حجاية بالبيت بحيث من نطلع بيبتي تغطينا بعبايتها وتصعدنا السيارة ومن ننزل تمشينا كدامها وتفوتنا للبيت الثاني يعني بيت اقارب, يعني بحياتنا ماطلعنا سوك وشفناه , عدنا بس نشتغل بالبيت نكنس و نمسح.. والله اني مو هلكد بالشغل تنبل مال نوم بس اختي نهى اكثر تشتغل .
(نهى)
اني بنية عندي حلك ياكل ميحجي اشتغل وساكتة يودوني يجيبوني مااحجي بس جنت انقهر هواي لان اني واختي مو حالنا مثل حال الباقين امهم وابوهم فوك راسهم , امي راحت تزوجت وخلفت خمس بنات وابوية تزوج وخلف ولد اثنين لان من ابوية طلق امي اني جنت بالكماط ارضع واختي عمرها سنتين وبيت جدي اهل ابوية ربونا , همه صحيح ربونا بس سووا حالة نفسية بينا . سب وغلط يوميا علية وعلى اختي وهيجي من امجن الي عافتجن وهيجي من عدجن , واذا نفوت للغرفة حتى منسمع الغلط والسب يتخبلون يكولون ها تتجاهلونا ... فلازم غصبن علينا لازم نسمع ونسكت
(مها)
فأحنا كاعدين وساكتين وراضين بس ضغطهم علينا هواي... وتمشي الايام.. .فد يوم طلعنا وية بيبتي واني جنت لابسة وكاشخة وطالعة اخبل واختي هم .فبيبيتي كالعادة دا تغطينا بعبايتها لان هي تلبس عباية مال راس , بهاي الاثناء طلع علينا جلب تكرمون وبيبتي بعبايتها تضربه واحنا نعيط اني واختي وبنت عمتي وعمتي ونفتر داير ميدور السيارة وبيبتي وكعت بالطين هي وعبايها الي عقدتنا بيها بس شكد شالعة كلبنا هي.. بس خفنا عليها وظلينا نصيج وج بيبي ونضرب بالحصو عالجلب وهو ماكو هاجم... علينا وجان يركض علية وركضت , كبال بيتنا عمارة وبيها درج دصعد الدرج وجان اوكع.. بهااللحظة جان يجي واحد ولد طويل اسمر عيونة كبار وعبالك لاعب حديد اجا ركض وضرب الجلب تكرمون بالحجار وبرجلة ملخه وجان يفلت الجلب وجان يجي علية ...كالي خومو تعورتي؟ واني داابجي واختي تبجي جنا نصيح , ظل يضحك كال لعد لو هاجم اسد عليكم ...جان يجي لزمني من ايدي وكومني اني فد خفت , جان تتخبل بيبتي نست الجلب والطين وعبايتها وجان تصيح تعالي لج امشي فوتي للبيت جان تفوتنا للبيت واحنا كانهو جنا بحرب المهم فالولد من شفته ياريت ماشفته جان ماصار كل الي صار بية.....
....
أنت تقرأ
عشق الشقاوة
Romansaهذه القصة لبنية حبها واحد الدنيا كلها متريده وخاصة اهلها وهو هم مستحيل يحب بس هي كدرت تاخذ كلبه وعقله.وذل روحه لخاطرها وهي ظلت حايرة بين ظلم الاهل وبين حبه.
