التفاح المر
علي البدر
البارت الثالث....
....
....
الساعه بالوحده بليل رجع زهير لبيته يطوطح وسكران وساعه يطيح وساعه يكوم وقبل لايدك باب بيته طلعوله اثنين ضربوه عله راسه وكسروا اديه ورجليه وضربوه دفرات ومن كثرة الضرب والدك ضل يصيح انتو منو شتردون ليش هيج وياي ....
ماهتموا لكلامه واستمروا يدكون عليه وصاح بوجهه واحد منهم ...اياك وبالك تتكرب من سارة او تحاجي اخوها ريسان وتخطبها....
...
...عافوه يصب دم ومكسر ورجعوا وبالطريق صاحبه كاله....
ياحسن انت ليش حجيت وجبت اسم سارة يمعود هيج خربتها..
كاله اسمعني ياهاشم .....
من حركتي ماكدرت اصبر واريد اعلمهم اذا سارة رخيصه عد ريسان....فعندي غاليه...
يمعود يا بو الغيره ياحسن لو بس ساكت اقلها ماراح ننكشف....
...
...
ها ست ريام شلونج..
الحمد لله دكتور ..
يالله نريدج ترجعين للمحكمه مكانج خالي وانتي اسم معروف بعالم القضاء ...ريام فريد ...اكو واحد ميعرفج ....
وهسه لازم تحجيلي وتكوليلي شنو اصعب موقف صادفج بالمحاكم....
سكتت ريام وره شويه كالتله مستحيل يكون هناك شي اصعب من موت زوجي كدام عيوني....
تحسر الدكتور وكلها اني كتلج بالمحاكم ...هههههه ضحك شوية للترفيه...
كالت ريام ...يوم من الايام اجتني قضية قتل والمتهم بريء لكن كان تحت تاثير اقراص الهستالين ولكن اثبتت براءته وهاي القضية هيه اللي رفعت اسمي....
ساله الدكتور....مشتاقه لبدلة المحاماة...
سكتت وعرف انها تتمنه ترجع باسرع وقت...
وانطاها الجرعه ونامت وطلب مراقبتها ومراقبة تصرفاتها....
عمي ابو ريام ....
ريام جاي تتجاوب ووضعها بده يتحسن واشوف لو باسرع وقت تلزم قضية تدافع عنها...
..
...
دكتور لازم نخليها تتحسن اكثر ....
قاطعه الدكتور...وكاله ....ريام حاليا بدت تتجاوز الصدمه ولازم تعيش حياتها وترجع باسرع وقت واني راح اتابعها ..
...
...
ها زهير سلامات شنو هاي ماصدكت الخبر...كالولي متعارك ومضروب
لك ريسان وين متعارك....اكو واحد يتعارك بالوحده بليل بس اسال سؤال ممكن...
اسال زهير شكو
كلي ريسان منو حبيب اختك...
انصعق ريسان ووجهه دخن ....شنو شجاي تحجي انت اختي ماعدها اي حبيب....
ريسان اللي ضربوني هددوني وكالوا اذا تتقرب من سارة مره ثانية نكتلك واكيد مو اقاربكم لان انت كل اقاربك تخاف منك....
زهير صدكني راح اجرها الك من شعرها واخليها تجي بين رجليك ...
ريسان اذا ماتزوجت سارة انت راح تدخل للسجن اوك وانت تعرف التفاصيل....
بده ريسان يتلخبط بالحجي وكاله يمعود ياسجن استر علينه جان ريسان يسولف ويبلعم لان اكو سر يعرفه عنه زهير ويخاف يفضحه ...
صدك اليوم اخليها تجيك للطبيب....
....
...
دخل ريسان للبيت وصرخ باعله صوت بحيث حته حيطان البيت ارتجت...
ساااااااااارة ساااااااارة ....ساااااارة...
اجت ساره وكفت كدامه وشافت الشر كله بين عيونه وقبل لاتحجي ضربها راشدي شرم اذنها وطير الترجيه وخلاها تصب دم ....
عندج حبيب يابنت الكلب عندج حبيب يابنت الزمال ....تدزينه يتعرض زهير ويضربه مو ....اليوم اذا مارحتي لزهير وسلمتي عليه والله اترس حلكج فشك بت المطي ...تالي عمرج بطول الزبانه تلعبين هيج....
طلع ريسان وضلت سارة تبجي وخايفه وترجف واتصلت بحسن...
كالها ...
الو حبيبتي...
ردت عليه بعصبيه وغضب...
انعل ابو الساعه العرفتني بيك اني كتلك تروح تضرب زهير ....ليش هيج بسببك اني انضربت وريسان عرف عندي حبيب واذا عرفك راح يجي يطلع روحك من خشمك ...
اسمعيني سارة .
ماريد اسمعك ولا راح اسمعك وانت ماحافظت عليه ...وبسببك راح اصير لحمه بحلك زهير....اليوم راح اروحلة وراح اتزوجه اقلها اتخلص من كابوس ريسان ...
سدت التلفون وطلعت شريحتها وكسرتها وكسرت جهازها وبدت تخطط حته تنتقم من رييان وترجع حقها من عيونه.....
...
...
بالمستشفي ريسان وسارة توجهوا للغرفه اللي بيها زهير وجان ريسان يسولف وي سارة وينصحها تكون رقيقه وي زهير واول مرة تشوف ريسان هيج عطوف وتفاجات من اسلوبه
.....
.....
هلا زهير الحمد لله على السلامه ...
هلا ريسان الله يسلمك...
جانت سارة تباوع لزهير وماتصدك ان هذا البغل راح يمسها ويتزوجها وحسن اللي ضحى علمودها وحبها طول عمره خسرته .....سلمت عليه وتحمدتله عالسلامه وكالها...
لو مو هذا الحادث جان باجر تزوجنه...
رد عليه ريسان كاله اول ماتطلع من المستشفي لبسها عبايتها واخذها...
....
...
ابو حيدر مساع شفت بيكم نزلت كراتين بمحل ريسان وكلها جدد يعني مو مال تصليح....
اسمعني جاسم مكينة انت اذا تحط راسك وي راس هذا البغل ريسان يفلشه الك ...
احنه مو كد هذي الناس وهذا انسان ساقط وسافل واذا تضل تتعرضه دوم وتجادله ماعده مانع يحطله طلقه براسك ويتخلص منك...
ابو حيدر هذا لازم يتربه...ولازم يعرف انو هذا المكان باب رزق محترم مو باب عربده وسكر وكلساع جايبله عاهرة وجاي
عيني مكينة عوفه اله يوم ربك يحمسه حمس....
لا بو حيدر مانتظر لذاك اليوم .... انه راح اتصرف وياه
...
...
قبل لا يطلع زهير من المستشفى اجته الممرضه وكالتله...
عيني هذي رسالة الك اجت وياها هذي الهدية وانطته كرتونه زغيرة...
فتح الرسالة وقراها ولكه مكتوب بيها....
(الظاهر انت ماتتوب بس هم ميخالف راح اصبر عليك....اذا فكرت تتقرب او تتزوج سارة فهذا اخر تفكير بحياتك...واعذرني عالهدية المتواضعه)
فتح الهدية ولكه رصاصة وعرف انو هذا تهديد اله ولازم يفكر قبل لايتزوج....
فقرر يتصل عله ريسان.....
الو ريسان ذولة دازيلي تهديد ورصاصه ويكولون لو تموت لو تترك سارة ....
كاله ريسان انه احلها الك عزيز..
....
....
اخذ ريسان سجينه وراح لغرفة سارة ولكاها نايمه وحطها عله ركبتها وكعدها ...
سارة ... سارة ...
كعدت ساره وصرخت ...
كالها اني ريسان شبيج ....هاي سجينه ماتعور اذا حجيتيلي الصدك بس اذا جذبتي راح تطير لوزتج....
نشف ريكها ويبس بلعومها وماكدرت تحجي....
كالها ماريد شي منج سوسو بس منو الشخص اللي جاي يهدد بزهير واليوم مهدده بالقتل....
عرفت ساره انو حسن بدل مايكحلها بده يعمي بيها وهي هسه اذا ماعترفت لريسان ماعده مانع يذبح ....
كالتله .....
اسمه حسن النداف....
كالها ...
خل اسمع عدل منو....
بلعت ريكها واخذت نفس بسيط وكالت
....حسن النداف ابن حجي سعدي النداف ....
له تابع لطفا
