التفاح المر
علي البدر
البارت السابع
...
...
هلا سارة شلونج شخبارج...
هلا خالة انه موزينه واجيتج شاردة من ضيم اخوي ريسان ....
ولج انتي شاردة وجايتني....
لا خاله انه وامي سوينه خطه وكالت اصعدي لخالتج للكوت ومن توصلين خابريني...
شبيه هذا ريسان تخبل شيريد منج...
خاله يريد يزوجني غصب لصاحبة ابو العرك وبس يدك عليه ويبسط بيه ....
زين سويتي خاله وانه راح ابقيج يمي لحد ماالله يفرجها ولا تخافين بنيتي....
خالة انه اكو واحد مثقف ومحترم وخريج يحبني ورايد يخطبني ويتزوجني بس ريسان مايرضه لو شنو الصار...
ولا يهمج سارة وانه راح احاجي امج اطمنها واخليها تهده ....
...
...
ولك مكينة سمعت حيدر شيكول ....
لا بو حيدر شكالك ....بعدين شوكت اجاك...
رد عليه ابو حيدر...
اجاني ابني الصبح وانت جنت نايم وكالي احمد لكوه ميت واكيد همه كتلوه حته يموتون السر وياه...
اي ابو حيدر هسه خل حيدر يعترف بالحجي الكاله احمد وتنتهي القضيه...
مكينة اي كلمة تطلع من حيدر ابني رلح يتهمونه هو كاتله ....انه كتله يسد الموضوع وميحجي بيه ....
بس طلبت من عنده يكلف محامي عله حسابنه ونتابع قضية حميد رافع المتهم بموت حاتم الصخل ...
...
...
هنا مكينه ضحك وكال لبوحيدر....
لو ماشينه بحجيي من اول يوم جان هسه احنه معدومين انت صدك ذكي ابو حيدر ....
....
...
السلام عليكم ابو حميد ...
هله عمي حياك الله...
اسف عمي اجيتك بلا موعد واسف راح اخذ من وقتك بس الموضوع يخص ابنك حميد....
لاتحجيلي عنه هذا القاتل حميد مو ابني انه ماربيت شخص يستهتر بارواح الناس....
رد عليه حيدر ...
ادري عمي هذا الحجي مو من كل كلبك لان مهما يكون هو ابنك ويبقه ابنك وخصوصا اذا عرفت انو هوه بريء وضلموه بالقتل....
صاح الحجي....
حميد بريء ...ابني بريء....شلون عرفت...
رد عليه حيدر وكاله لازم نتصرف بهدوء وراح نخلي محامي واني اتابع الموضوع لان اذا طلع ابنك من السجن راح يطلع ابوي وتنكشف هواي امور ويرجع الحق لاصحابه....
ابني حيدر اني رجال جبير وماعرف شي عن القضيه بس راح اكون وياك وشتريد انه حاضر...
لا عمي خادم ربك بس اليوم اسال عن افضل محامي لان هاي القضية تحتاج خبرة وذكاء. ..
...
...
ملازم علاء ....
نعم سيدي ...
محتاجك باجتماع طارىء.
كان ضابط المركز المقدم ريحان مجيد عصبي جدا وطلب من كل ضباط التحقيق ...اجتماع طاريء ....
وعله راسهم الملازم علاء ....مسؤول قسم التحقيقات الخاصه بتجارة المخدرات
....
...
بده المقدم ريحان الاجتماع وجان معصب وفاتل شواربه ...وكالهم....
المخدرات انتشرت بالمنطقه وكل شاب تحجي وياه مكبسل والكهاوي والنوادي صارت تتعاطاها بالمجان وحضراتكم متدرون شنو يصير ...
ممكن يا استاذ علاء تنطيني موقف بما انو انت المسؤول عن هيج ملفات....
سيدي...
احنه رصدنه بالآونه الاخيرة تحركات مشبوهه لتجار المخدرات واحنه جاي نتابعهم وكل شي نحصل عليه راح نتخذ موقف حازم....
ملازم علاء انتم مسؤولين عن اي جرعة مخدرات يتناولها شاب او تتاجر بيها مافيات....
اريد منكم الهمه بهالموضوع وتراقبون كل شي وتدسون عيونكم السرية بالكهاوي والنوادي ...اريد هذا الموضوع ينتهي باسرع وقت....
كام كل ضباط التحقيق وطكوا تحية للعقيد ريحان وكالوله...
امرك سيدي...
.....
....
....
تكررت لقاءات ريام والدكتور منذر الشماع وصارت تحس بالامان بقربه وبدت تنعجب بشخصيته ...والدكتور منذر من الناس اللي يمتلكون نفس رحيمه وقلب طيب واسلوب انيق....
هاي شطالعه اليوم ريام ماشاء الله قمر...
من ذوقك دكتور واكيد كل الفضل الك من بعد رب العالمين...
بشريني شنو الشغل هالايام شلونه ...
والله كسبت قضية النزاعات الملكية ورجعت الحق لاصحابة ....
عفيه والله سباعية ريام....
ضحكت ههههههه....
وجايتني قضية اكبر من هاي خابروني امس عن شخص اسمه حميد رافع مسجون بقضية قتل حاتم رزاق ويلقبونه حاتم الصخل والشخص اللي اتصل بيه كال انو عرف امور تخص القضية وهو يشوف انو القاتل مو حميد وانما شخص ثاني....
رد الدكتور ..
هاي قضية معقدة تحتاج تفكير ودقه ...
اي والله يادكتور امور مثل هيج تكون صعبه بس شيوي هاي حقوق ابرياء لازم يكون البريء خارج السجن...
...
...
يمه ....هاي انتي وينج...
ها يمه ريسان كول...
جان ريسان يطوطح وشارب عرك هواي وعيونه حمر ...
شافته امه وكالتله طيح الله حظك ولك ماتتوب من هذا السم الهاري ....
رد عليه فديتها ماماتي اني....هاي بتج العاهره مارجعت...
ولك اكو واحد يكول عله عرضه هيج انت صدك بلا نوماس وبلا حمية وحته غيرة ماعندك....
ولي روح لغرفتك انطمر عساك نمت وماكعدت ....
نزع دشداشته وشمرها بالهول ودخل نام . .
راحت امه دورت بجيوبه ولكيت جيس صغير بيه مثل الطحين وعرفت هاذي حشيشه وابنها تجاوز مرحلة السكر وصار مدمن.
....
....
بدت المحامية ريام فريد تتابع ملف موت حاتم الصخل والتقت بالمتهم الاول بالقضية حميد نزار وشررحلها هواي امور.....
اسمعني حميد ...
كولي ست...
اني ادري انك بريء ومظلوم بس هذا مايكفي اذا ماكو دليل...القانون يسير خلف الادلة.
اسمعيني تكدرون تعرفون هواي اشياء توصلكم للحقيقه ولازم تطلبون تفتيش محلات ريسان لان كل السر بيها....
يوم عرف حاتم الصخل سرداب المخدرات والحشيشه بده يهدد ريسان بنص البضاعه لو يخبر الشرطه ...
سالته المحاميه....
زين منين عرفت هالشي...
قبل لايموت حاتم بيوم سولفلي وجان كاسب الموضوع وواعدوه بمية وخمسين مليون دينار ينطوهياه بس غدروا بيه وعرفوا انه صاحبه واتهموني بقتله....
زين ليش ماحجيت هالشي بالمحكمه....
اجاني ريسان لحد هنا وكالي اذا انسجن واحد من عدنه صدك اذبح اولادك واحد وره الثاني....
ست انه اموت الف مره ولا يتاذه واحد من ولدي ورضيت ابقه بالسجن طول حياتي....
هنا كالتله المحامية ريام....
ليش هسه حجيتلي ....
رد عليها....
انتي تمثلين قانون واكيد راح تساعديني وماراح تهدديني باولادي ابدا....
....
...
الليالي الكالحة السواد لاتنجلي ضلمتها الا بموت الشر لينيرها البظر الذي تنتظره كل الارواح لان النور يبعث الطمأنينة والسكينة للكل ...
....
...
سيادة العقيد...
نعم علاء...
تم رصد تحركات الشحنات المخدرة وهي بحوزة شخص يسمونه ابو عردة بس لحد الان مامعروف الشخص اللي يساعده واحنه راح نتواصل مع العيون السرية...
بهالاثناء دخل احد ضباط التحقيق طك تحية ...وكال...
سيادة العقيد ...حدثت قبل ساعه جريمة قتل ولكينه جثة مدججه ومكطعه بنص الشارع لشخص يدعى ...زهير كنعان ابو عردة ...
له تابع لطفا
