🌸الجزاء من جنس العمل
يوسف الخلعة سرت في اوصالو لي درجة حسا انو ما قادر يقيف.
جرا عليها بسرعه وهو بيقول بنبره طفولية : تواتل ؟
لاحظ للدم البيجي متدفق وبيرش في الارض من مرفقيها....
شالها بي صعوبة شديد وطلع من الشقه م كان عارف حيعمل شنو ولا اقرب مستشفى ليهو اصلا وين.... دمها القاني ملا هدومو.
الخوف سيطر عليه لمن شاف وشها البدا يشحب.
نزل بيها تحت وركبها العربية.
واتحرك بي سرعه... م عارف كيف قدر يوصل المستشفى وينزلها بعد الخلعه الخشت فيهو.
دخل بيها الطوارئ وبقا بيكورك : ساعدوني.
جات عليهو دكتورة بسرعه وطلبت منو ينزلها... ختاها ف السرير واتراجع لي ورا وهو بيشوف زملاء الدكتورة الباقيين وهم بيجو عليها ف محاولة منهم لي اسعافها.
طلع تلفونو وضرب لي سيف وجسمو كلو بيرجف.
رد عليه سيف بصوت نعسان... والنعسة طارت لمن سمع صوت اخوه الصغير المضطرب : سيف الحقنا عليك الله
سيف قعد في السرير : في شنو مالك ؟
_ تعال لي في مستشفى....... بي سرعه
_ يا يوسف انت كويس ؟
_ ياخ انت بس تعال ياخ... عليك الله سريع.
سيف ختا التلفون ف جيبو ونزل بي سرعه.... لاقتو وجدان : سيف ؟ مالك ف شنو وماشي وين ؟
_ يوسف ضرب لي مخلوع وقال اجيه بي سرعه في مستشفى......
_ ان شاء الله خير
نزل وخلاها... ركب عربيتو وبي سرعه على المستشفى.
اول م سيف نزل وجدان تلفونها ضرب... فتحتو وهي بتقول بنبره شيطانيه : اها ان شاء الله الموضوع تم... واهم شي يكونو صوروها عشان ننشر الفيديو
_ ي.... يا استاذة وجدان الموضوع م تم بالطريقة الانتي عايزها.
_ نعم ؟ كيف يعني
_ البت دي م طبيعيه.... الاولاد اول م قربو منها شالت كزلك وقطعت شرايينها بي كل بساطه.... وهم خافو على نفسهم وجرو.
_ شنو ؟ يعني انتحرت ؟
_ اي.... و....
_ و شنو انطق
_ الاولاد وهم جاريين في ولد شافهم
_ ولد ؟ ولد شنو كمان
_ يا استاذة.... احنا كدا ف خطر... لو البت دي لقوها و واتفتح بلاغ وقدرو يوصلو للاولاد والولد دا اتعرف عليهم احنا حنكون دخلنا ف مشكله كبيره
أنت تقرأ
القروية والوحش
Teen Fiction📝 بقلم: لينا عامر روايات أخرى للكاتبة: - نور العين - انثى في عرين الاسد - ثانوية المراهقين - شيزوفرينيا - القروية والوحش - الثالثة صباحا
