دعاء مستجاب

1

اعتذر منكم عالتأخير بس مو مني من النت رغم اصلا مريضة جدا بس اعرف بيكم منتظرين من فترة ..

#دعاء_مستجاب_
ل: #روز_الفياض_
قصة حقيقية لاحدى متابعات البيج
ج١
(اللهم اني اشكو اليك ضعفي وقلة حيلتي وهواني على الناس ..اللهم اني اسألك العفو والعافية والمعافاة في الدنيا والآخرة .. واسألك ان ترزقني نعمة يعجز عنها شكري ولاتبتليني بلاءا يعجز عنه صبري .. اللهم اجعلني راضية قانعة بماقسمته لي ... اللهم اني اسألك حسن الخاتمة ...)

انتهيت من صلاتي ودعائي وجلست اتأمل مامضى من حياتي معتنقة آمالا ليست بعيدة ولاصعبة على الله ..
آمالا وامنيات معدودة وبسيطة فلست طامعة بأكثر من صحة وعافية وستر .. الا يقولون بأن الزواج ستر ..

كما يقولون ايضا ..
ان هناك علاقة عكسية بين الحظ والجميلات ..
ومن هنا تبدأ حكايتي ..
.....................................

شلت سجادة صلاتي المميزة عندي بلونها الوردي ورحت كعدت كبال الشباك اراقب الناس اللي تمشي بالشوارع ..
اكره هالوقت من اليوم ..
المغرب ..
احس يضيك صدري ..
بهالوقت بالذات من اكون كاعده وحدي ماكو شي يشغل تفكيري غير الماضي .. وكل الاشياء اللي مرت بحياتي ..
اتذكر المشاكل والتعب والقهر والظلم .. ويمشي بيه العمر لحدما يوصلني للمستقبل وابدي ارسم نهايات بخيالي مرة تفرحني وتخليني ابتسم واضحك وحدي ومرة تخنكني وتخلي دموعي تنزل.. دموعي اللي مهما حاولت اقاومها تبقى تهزمني مثل كل مره ...

افراح ...
هذا الاسم اللي اختاروه الي امي وابوي ..
المصيبة دائما اسمع الناس تكول:
لكل من اسمه نصيب ..
زين اني نصيبي وين؟..
هالاسم اللي احسه نحس لان المفروض يسموني مآسي مو افراح ..
يمكن لو مسميني مآسي يتعدل حظي ..
استغفر الله ..
هاي نتيجة التفكير الزايد ..
الحمدلله الذي لايحمد على مكروه سواه ..
ارجع وياكم لقصتي اني افراح او مآسي كيفكم انتو احكموا بالنهاية اي اسم جان المفروض يسموني ..
ولو بعد ميفيد لان اني على ابواب ال ٢٨ سنة من عمري ..
طفلة بعمر سنتين جنت من اخذتني خالتي وزوجها وربوني ..
بعدما اهملتني او يمكن كرهتني امي اللي جابتني ..
خالتي وزوجها بذاك الوقت جانوا ماعدهم اطفال الله مرزقهم ..
لتستغربون ..
هاذي هي بداية مأساتي امي ..
استشهد والدي من جانت امي حامل بيه ..
وبعدما جابتني كرهتني لان حست انه اني شؤوم ونحس بس حملت بيه استشهد ابوي يمكن حقها تفكر هيج ويمكن لا ..
مااكرهها ولااحبها ..بس مااعتبرتها بيوم امي .. لان محسيت هي امي .. ولا هي حسستني بهيج شي ..
بالنسبة الي امي هي خالتي اللي حبتني وربتني على اساس اني بتها مو بت اختها .. وابوي هو زوجها اللي رباني وحبني مثلما اي اب يحب بته ويمكن اكثر ..
طفلة بعمر سنين وماعندي اسم محد سماني ولااختارلي اسم لان الكل جان ينظري بنظرة غضب وحقد لان اني بنظرهم نحس.. شؤوم .. وماعليهم عتب ..
اذا هي امي اللي جابتني هيج نظرتها شاتوقع من البقية ؟
من اباوع لصوري واني طفلة اشوف طفلة بريئة جميلة بملامح غربية سموها افراح بعد سنتين من عمرها ..
طفلة مهمله ...
يتيمه الاب .. ويمكن الام .. لحد عمر سنتين ..
لحدما اتبنوني امي وابوي ( خالتي وزوجها) ..