دعاء مستجاب

7

#دعاء_مستجاب_
ل: #روز_الفياض_
ج٧
مرت الايام والاشهر واني وضعي مثل ماهو بدون تطور اتحسن اسبوع واتمرض اسبوع وهكذا ..
اخذني ابوي لهوايه دول للعلاج لكن مجابت نتيجه ..

الشي اللي جان ملهيني ومنسيني وباعد تفكيري عن المرض هو الفيس ..
صار عندي ادمان عليه ..
صهيب صار جزء من يومي ..
دائما جنت افتح الخاص الكاه كاتبلي جزء من يومه ومعاناته بشغله ..
او كاتب اسطر يشرح بيها حزنه والملل والروتين اللي عايش بي ..
بالبداية جنت متردده اقرا واسكت مااجاوبه ولا اكتبله واشتكيله ..
لكن وصلت لمرحله حسيت صرت اعرفه ..
لان يحجي بأمور تخص حتى عائلته واهله واصدقائه حسيت بنوع من الالفه ..
صرت اعرف كم اخت عنده واسمائهم ومن تجي وحده زعلانه شلون يشيل همها ..
اعرف شكد يحب امه وشايل همها لان مريضه وتعبانه ..
صرت اعرف بي شايل مسؤولية عائلة بركبته ..
اكبر واحد باخوانه ..
ويشتغل بمكان حساس بالدولة ..
مامتزوج ..
ماعنده حبيبة ...
اغلب وقته بالدوام ..
وتفاصيل غيرها ...

بيوم من الايام قررت اكتبله شي من مشاعري ...
من اللي احس بي ..
يمكن اكو احد يحس بيه ..
جنت محتاجه احجي بلحظتها ..

دخلت عالخاص كتبتله:
( الوجع .. ماالوجع؟
الوجع هو ان تحس بشيء يعتصر قلبك ولاتعرف ماهو ..
الوجع هو احساسك بأنك وحيد لايوجد من يفهمك ..
الوجع هو ان تكون محبوسا بين اربعة جدران بحكم مؤبد الى حين انتهاء حياتك .. دون ذنب منك ..
الوجع هو احساسك بالغربة في ظل حشد غفير من الاهل والاصدقاء ..
الوجع هو الوجع ..
لا وصف له ولا مرادف ..
ان تحس بشيء تعجز عن وصفه للاخرين وهذا هو قمة الوجع ..
اتمنى ان اجد هناك من يتلاقف صرخاتي ..
من يسمع همسي ..
من يستطيع ان يروي عطشي .. لحياة يملؤها الفرح والنشاط والضحك ..
لحضن يحتويني دون ان افكر بأني ازيد حزنه حزنا ..
لمن يربت على كتفي ويمسح على رأسي برقة ويرسم لي طريقا اخضر مليء بالورود ..
طريقا اهتدي به الى بر الامان ..
الى نفسي ..
الى جزيرة بعيدة خالية من المرض والتفكير والاحزان .. ) ..

كتبتها واتندمت ..
شبيه اني هيج اتسرعت وكتبتله ..
هو يريد يفضفض بكيفه هو حر رجال ماعليه عيب بس انتي افراح شلون هيج تنجرفين وياه ..
شيكول عنج هسه؟
الله يلعنك يالشيطان ..

طلعت وغلقت الفيس ..
اكتئب وضميري أنبني ..

بالليل فتحت الفيس لكيته كاتبلي عالخاص:
الله الله .. مبين انتي تحبين الادب وتقرين كتب ادبيه ؟
ابتسمت ..
كتبتله:
لا .. ويني ووين القراءة ..لو اكدر اقرا جان رجعت كملت دراستي ..

شفته يكتب .. كتبلي:
مساء الاحساس ..
افراح: مساء الخير 
صهيب: اذا هاي كتابتج فلازم تطبعين كتاب لان فعلا نص حلو ..
افراح: ياريت ..
صهيب: ليش حزينه؟
افراح: يعني انت فرحان؟
صهيب: مو فرحان ولا حزين لكن عندي فراغ حاس بالملل وبصراحه صاير المتنفس الوحيد عندي هو الفيس ..
واذا جنت ضايج وحزين فانتي تعرفين ليش من فضفضتي يمج صرتي تعرفين كل شي عني تقريبا ..
بس اني مااعرف شي عنج غير اسمج ..