دعاء مستجاب

8

#دعاء_مستجاب_
ل: #روز_الفياض_
ج٨
بهالفترة جان صايرلي سنة ونص تقريبا اعرف صهيب ..

وره ايام اتحسنت صحتي شوية ..
وبديت ارجع لحياتي ..بس حسيت امي ضايجة وتباوعلي بنظرات مااعرف شنو معناها ..
حسيتها زعلانة مني بس ليش؟
مااتذكر سويت شي او اتلاغيت وياها على شي ..؟
شصاير ياربي؟
ردت اسألها واتردت ..
بقيت منزويه ومنعزلة اريد افتح الفيس بس مااريد اواجه صهيب ..
تندمت لان حجيتله الحقيقة ..
ماجان المفروض اكله مريضة بهالمرض ..
خليت نفسي بموقف محرج ..
دورت على جهازي مالكيته رحت سألت امي باوعتلي صفح وكالت:
ليش؟ شتسوين بي؟ حتى تراسلين هذا مدري شسمه؟

فتحت عيوني كلبي ظل يدك بلعت ريكي واتشجعت وسألتها:
منو؟
امي: صهيب مدري صهيل مدري شسمه .. مو هو تردين تراسليه؟

ظليت متحنطة ..
استحيت من امي .. شمدريها؟
شلون عرفت بموضوع صهيب؟
ماحجيت شي من فشلتي ...
رجعت لغرفتي سديت الباب وكعدت وحدي ..
كعدت الوم نفسي واحاسبها ...
خليت نفسي بموقف مو حلو ..
ياترى امي بس اللي تعرف لو ابوي واخواني هم يعرفون؟
عزاا اذا ابوي واخواني عرفوا ..
شلون اراويهم وجهي بعد ..
واكيد راح اسمع كم حجاية بالعظم ..

اووف ياافراح شورطج ... زين هيج؟
بقيت كاعدة والوم بروحي ...
شوية وانفتح باب الغرفة .. امي ..
دخلت وسدت الباب وراها ..
كلبي ظل يدك ...
اعرف بيها تريد تحجي بموضوع صهيب وتسألني عنه ..
ماعندي اي دفاع ادافع بي عن نفسي ...
كعدت يمي عالجرباية باوعتلي شوية بدون متحجي شي بعدين اخذت ريموت التلفزيون وكعدت تكلبي بالقنوات وهي ساكتة واني اراقبها منتظرة الهجوم ..

امي: شنو بينج وبينه؟
كالت بمنتهى الهدوء ...
ظليت صافنه لثواني مااعرف شجاوبها لحدما التفت علي هزت راسها بأستفسار ...
افراح: مابيني وبينه شي ..
امي:لعد على اي اساس يراسلج ؟
افراح: مابينه شي ماما اصلا مايراسلني هو ..
امي: افراح بدون جذب لتخليني احرمج من النت مو طفله كدامج حتى تنكرين ..

خفت حسيت امي صارت عصبية كتلها:
وين عرفتي؟ منو كلج؟
امي: اني اللي اسألج مو انتي ... وين عرفتيه وشلون ؟
افراح: اتعرفت عليه عالفيس ...بس والله مابينه شي اصدقاء بس ...
امي: مابينكم شي ويكلج حبيتج ؟ اصدقاء ويكلج متأكد انتي هم عندج نفس المشاعر؟

ظليت مصدومه ... هاي شوكت؟
اكيد من جنت مريضة ... بس شلون شافت المسجات .. معقولة اني مخلية الفيس مفتوح؟
اففف شلون ماانتبهت ؟ شلون راح من بالي ؟
انوب انت مو جنت مختفي شرجعك تراسلني من جنت مريضة .. الا بهالوقت طلعت ..؟
شلون حظ فكر ...
افراح: ماما والله مابينه شي بيش تردين احلفلج هو كلي هالحجي كلي اتعلقت بيج وعجبتيني بس اني كتله اني مو مال هالسوالف واصلا وصل الموضوع كتلة بالصدك ..
كتلة مريضة بية سرطان ...
دمعت عيوني بس بلعت ريكي وحاولت اقاوم دموعي وكملت :
كتلة احتمال اموت اليوم .. باجر .. عكبة .. ماادري .. فلا تفتح وياي هيج موضوع لان ماافيدك .. المثلي يمكن تكون ايامه معدوه ...