دعاء مستجاب

16

#دعاء_مستجاب_
ل: #روز_الفياض_
ج١٦
رجعنه للعراق اني وامي علمود اخوي لؤي ..
ومن شفناه انصدمنه حالته حاله زين والله كتبله عمر ..
بقينه بقلق لحدما وعى وحجه لكن المشكلة رجله جان العظم متهشم فكلوله مالها حل الا البتر ..
بيومها جانت صدمة عمري شبعنه بجي عليه لو يصير انطيه رجلي جان انطيته ..
اني مريضه بس هو صاحي ..
اني نفر واحد لازوج ولاعائلة ولا اطفال ولا مسؤولية ..
بس هو اب وزوج وبركبته مسؤوليتهم ومسؤوليتهم جبيره ..
وفعلا بتروا رجله ..
احساس فضيع بالعجز جنه نحسه لعد هو شلون ..
الله يساعده ..

ونفس الفترة جانوا الناس اللي متداين منهم فلوس واكفين على راسنه يردون فلوسهم ..
وطبعا همه ماعدهم فلوس يسدون عنه كافي عليهم مصاريف علاجه وعمليته وغيرها ..
اضطرينه نرجع علمود علاجي ويه دكتور بشار ..
ومن رجعنه لتركيا رادوا امي واخواني ليث وزيد يسدون الدين بمكانه بس اني مقبلت كتلهم:
هو اخوي واني اخته اني لازم اساعده ..
المن رايده هاي الفلوس لا ولد ولاتلد ..
اعتبرهن دفعة بله عني وعن صحتي ..

امي: بكيفج ماما بس اني اكول لو تضمين فلوسج محد دايم لاحد هاي الفلوس تفيدج باجر عكبه واني هم خالته وليوثي وزيودي ولد خالته مو اغراب ..
ليث: عوفيها ماما براحتها ..
هي تريد تسوي خير لتمنعيها الله ينطيها على كد نيتها وان شاءالله متحتاج شي واحنه موجودين كل اللي عدنه الها وجوه رجليها ..
كام باس راسي حضنته وظليت ابجي هذا اخو ولؤي اخو ..
الحمدلله على كل حال ..
وفعلا دفعت عنه الدين وارتاحينه من قصة الدين والديانه والقلق والدوخة ..

من خلصنه وارتاحينه من قصة لؤي قررت احجي ويه صهيب وانطيه فرصة اخيرة ..
شفته اونلاين وسلمت عليه وبدينه نحجي ..
اول ماحجه كلي:
مشتاقلج ياقاسية ..
دمعت عيوني كتله:
منو القاسي بينه اني لو انت؟ مو انت اللي كتلك اترك الشرب لخاطري ومتركته؟ مو انت اللي كتلك لو اني لو الشرب واختاريت الشرب؟ وصبرت وكدرت بدوني .. منو القاسي؟
صهيب: اوووفف ...
افراح: ليش؟
صهيب: عبالج اني مااريد ابطل هالسم؟ بس مو بهالسهولة ..
وجودج جان منطيني حافز حتى احاول اتغير ... تالي عفتيني  مثل كل مره واختفيتي .. تعاقبيني مثل الطفل اللي امه تزعل عليه من يسوي شي غلط .. بس انتي قاسية .. ماكو ام تزعل وتعوف ابنها هلكد ..

ظليت اباوع على كلامه وساكته ماادري اضحك ماادري ابجي كلامه يوجع الكلب ...
افراح: مو قاسية وهالغياب صعب علي اكثر مماهو صعب عليك رغم كل الظروف اللي امر بيها ماكو شي يشغلني عنك بس لازم اكو عقاب حتى تتحرك وتحاول تتغير للاحسن ..
صهيب: فرح مشتاق اسمع صوتج ..

مجاوبته ..
صهيب: منو يمج؟
افراح: محدد ..

ثواني ودك تليفوني صهيب يتصل ...
كلبي ظل يدك فرحانه على خايفة على متوتره ..
جاوبته :
الو ..
صهيب: احبج ...