جارتي الثلاثينيه
همس القوارير
البارت ١
قصه حقيقيه مع بعض الاضافات
مرحبا اني وجدان راح ابدي وياكم قصتي من البدايه من كان عمري ١٠ سنوات توفى والدي بحادث سير وكنت اني الابنه الوسطى للعائله عائلتي متكونه من اربع بنات وولد اثنين اني الثالثه بالتسلسل وطبعا بالاول بنات واخر شي الاولاد عشت طفولتي يتم وحرمان فضيع بحيث اللگمه حسره علينا بطلت من المدرسه بالرابع اعدادي لان مكان عندي ملابس بيها خير اداوم بيها واشوف البنات يلبسون اشكال والوان واني محرومه قررت ابطل احسن وقبل كانت الشهاده مو مهمه مثل هسه عشت عمري كوله حرمان بحرمان والله يا بنات مرة علينا ايام صعب بشر يتحملها ومستحيل ماره على وحده بيكم الفقر والعوز واليتم الي عشت بيه وربي مينحمل
بالبدايه خلي اوصفلكم شكلي اني بيضه حيل وجهي مدور ولا سمينه ولا ضعيفه تارسه شوي وطولي ١٥٥ وعيوني سوده ومدوره وشفايفي صغار ومحدده عبالك مخططه يعني شكلي حلو والحمدلله كنت احلى اخواتي بشهادة اقاربي المهم نرجع لسالفتنا من صار عمري ١٥ سنه والخطابه تجيني من كل مكان بس ماكو شخص عليه العين او يمكن قسمتي بعدها مجايه من صار عمري ١٩ سنه خطبني اقاربي يصير ابن عمة ابويه الله يرحمه كان انسان ملتزم وخلوق كولش وفوك هذا كوله شكله كولش حلو عيونه خضر واشكر وطويل وجسمه رياضي بس كان اكبر مني ٨ سنوات وما همني العمر لان كنت اسمع من امي ان المره تكبر قبل الرجال عكس وكتنا هسه مهما تكبر المره تبقى صغيره المهم بس كانت بخطيبي مشكله انو حالته الماديه ضعيفه يعني مثل حالي امي مقبلت كالت شلون اقبل لازم تاخذين واحد يشيلج شوي انتي محرومه وتبقين محرومه بس اني اصريت عليه وبالي اخذ الفقير والمغني الله والفقر مو عيب بالعكس عجبني اعيش وياه عالحلوه والمره وابدي حياتي وياه من الصفر وفعلا تمت الخطبه وقبلت بمهر بسيط واشتريت بيه شغلات بس الضروريه والي احتاجها وصارت الخطبه وطلعت جميله بشكل مو طبيعي لان كنت اول مره احف وجهي ومكياج وتسريحه وفستان طلعت كولش حلوه والكل نبهر بجمالي المهم بغض النضر عن تفاصيل الخطبه خطبتي طولت سنه ونص لان ما عنده يتزوج وره السنه والنص تزوجنا بعد ما ساعدوه جيرانه واصدقائه واخوانه والله غرفتي عالبنكه حتى تبريد ماكو بعز الصيف والضهر والحر نموت بيها يعني مغيرت شي بحياتي بس صرت مسئوله من رجال اشوف البنان كولها تشتري وتلبس وتعيد واني محرومه دشداشه ما اشتري بالعيد وهوايه نقص بحياتي وكلشي محتاجه بس مكنت احجي اكول من وين يجيبلي وما ازيد همه هم خليها على الله وربي يجازيني خير كنت كولش ملتزمه بصلاتي حتى قيام الليل واصوم خميس واثنين بمناسبه ومن غير مناسبه والحمدلله والشكر افتخر بهالشي لنفسي طبعا كانت بوقتنا الصلاة مو مهمه مثل هسه
