جارتي الثلاثينيه
همس القوارير
البارت ١٠ والاخير
لحد ما فد يوم دكيت على علياء كولت بلكي تجاوب والحمدلله جاوبت
علياء : الووووو
وجدان : هلو علياء شلونج
علياء: انتي خليتي بيها لون الله لا يوفقج شتردين بعد فوك گوات عينج
وجدان : اسفه والله اسفه صدكيني مصار شي من الي ابالج اني خنت العشره والامانه انه وحده حقيره ومعترفه بغلطي بس والله خلاص تبت لوجه الله وطلعت من حياتكم للابد واي عقوبه تفرضينها عليه اني قابله ولا تسامحيني اني استاهل اني وحده انانيه بس اترجاج لا تحجين الموضوع لاحد مو لخاطري لخاطر بناتي ما اريد اكسر بختهم اروحلج فدوه ما عندي غيرج وطلبتج
لاول مره احس بالذله بس ميهم اتساهل اني الجنيت على نفسي
علياء: ثقي بالله لوما بناتج كان شهرتج وماكو شي يشفعلك لان انتي وحده حقيره بس لخاطر بناتج راح اسكت وزوجج المسكين
وجدان : مشكوره ما تقصرين فضلج ما راح انساه
رافد
علياء دمرتني وحطمت حياتي لان متسامحني ضليت شهرين اتوسل وما ترجع تندمت لان مشيت وره هفواتي ونزواتي وحسيت هذا عقاب رب العالمين الي لان ضليت وحيد ومحد بحالي اني الي جرفتها هالطريق واني الي هدمت سعادتي بيدي وضلمت اقرب الناس ألي ورى الشهرين دزيت اقاربي حيل تعزهم وتحب خاطرهم وقررت ترجعلي بس رجعت مو علياء وحده ثانيه تصرفاتها اختلفت واسلوبها تغيير حقها واني الاستاهل كانت عندي جوهره واني الضيعتها بس بقت وياي واني احاول اكسب رضاها وثقتها من جديد
وجدان
اصريت على اسعد نشيل من البيت وفعلا غيرت المنطقه وقفلت بابي وكعدت وعشت لبناتي ولزوجي وكمت اشوف باسعد شغلات مكنت اشوفها وعشت عمري واني حاسه بالذنب وحملت وصار عندي ولد كرار هذا هديه لاسعد من رب العالمين وعشت حياتي ووهبتها لله كضيتها زيارات وعمره وصلاة وصيام عسى ولعل ربي يغفري لان حسيت رب العالمين يحبني وقريب الي هو الي ستر عليه وهو الي انتشلني من الجهاله والشيطان ونجاني واني بشر ممعصومه من الخطأ وخير الخطائين التوابين والحمدلله عشت بما يرضي الله والحمدلله رب العالمين على نعمة الستر وما اتوقع اكو اي مبرر ان المرأه تكون خاينه او اي عذر لان الخيانه هي خيانه يمكن من تسترين على بنت او امرأه راح تنقذينها من الضلاله وراح ترجع لرب العالمين مثل مصار ويه وجدان ورب العالمين امرنا بالستر ومراح تستفادين شي من الفضيحه بس مجرد تهدمين حياة انسانه او تشرفين على موتها ونهايتها وراح يكون ذنبج اكبر
حاولي تكبرين عقلج ومستحيل تلگين شخص يحبج اكثر من زوجج وان هدمتي حياتج وتزوجتيه ترى مجرد ما ياخذ منج الشي الي يريده ويكون اسوء من حياتج الي كنتي عايشتها ارضي بحالج وعيشي حياتج وصوني بيتج وزوجج محد يفيدج غيره ولا تلگين حب وگلب مثل گلبه مو كلشي كلام حلو وغزل كل انسان يبرر عن مشاعره بطريقته الخاصه ترى الحب والغرام الي نشوفه بالافلام والمسلسلات مموجود على ارض الواقع وعسى ولعل ربي يسعدنا دنيا واخره
النهايه
