اكيد جاتك لحظة مقعمزة تتفكري في هذاكا اليوم اللّي كنتِ كويسة مع فلانة وكانت نيتك طيبة معاها وهي فهمت غلط وتعاركت معاك ووجعـاتك !
ولا الموقف اللّي كنتِ قريبة منها هلبا ووقفتي معاها ولما احتجتيها رخت بيك !
وأكيد مش ناسية الموقف اللّي استغلوا فيه طيبتك وضحكوا عليك مش يستفيدوا من اللّي يبوه ولما تمت مصلحتهم دارولك حظر من حياتهم !
تصيـر وهلبـا عندك علم
ولحظتها تبدي تقولي الطيبة ماتمشيش في وقتنا توا، والواحد لازم يحمر عينه ويقسي قلبه، وكلام المسلسلات هذا !
---------------------------
تصدقي أنتِ وقتها في اختبـار!
هل حتولي انسـانة سيئة وتضعفي مع أول صدمة تواجهك في حياتك
أو حتستمري وتكـوني نفس الإنسانة الكويسة اللّي عرفوك بها ❤️
شوفي مرّات ربي خلاك تنصدمي في صاحبتك باش مايعلقش قلبـك بها ويعلمك تتعلقي به وحده سبحانه ❤️غـار على قلبك فكسـره وقربك منه وجبـرك ❤️
مرّات ربي خلا صاحبتك تتخلى عليك في الوقت اللّي أنتِ احتجتيها فيه مش يربيك على أنك تلجأيله وحده وتعرفي أن محد يقدر يساعدك إلَا هو ❤️" والربّ يُربي " ❤️
مرّات ربي خلا فلانة تأخد موقف منك وتفهمك غلط وتحرج منك ومرّات حتى تأذيك وتجرحك بكلامها مش يبـاعدها عليك لأنها كانت شـر كبيـر ليك ❤️
ومرّات خلاك تتوجعي من النّاس اللّي تحبيهم مش يختبـرك ويشوفك هل حبيتهم في الله ولله بدون مصالح دنيوية ؟
مرّات بش يربي فيك حُب التسـامح ويكون قليبك أبيض صافي ما يحملش على حد ❤️
يبي يعلمك حتى وهما ما يستاهلوش كيف تعفي وتصفحي ويكون قدوتك سيدنا أبي بكر لما سامح الشخص الي تكلم في عرض بنته وتحشري معاه يوم القيامة
يبيك تفوزي بالأجر الكبـير وأنه يسـامحك على ذنوبك المكدسات زيّ ما أنتِ سامحتي فلانه وفلانه على غلطهم معاك ❤️
-------------------------
ماتقوليش مايستاهلوش
مافيش حد يستاهل، حتى أنتِ عندك غلطات وجرحتي ناس قبل وظلمتيهم وكنتِ " ولو بدون قصد " سيئة مع حد في حياته
هكي طبيعتنا بشـر ناقص وكلنا نغلطوا .
باهي لو هي دار فنـاء وكلنا طالعين منها
كلنا ماشين، غير كل واحد وموعد رحلته
مدامه هكي علاش نمشي وفي حد شايل في قلبه عليا ؟
علاش نمشي وأني قلبي مش صافي ومش مسامح ؟
علاش نمشي ونتلاقى يوم غدوه مع اللي ظلمني ونكون سبب في أني انقص من حسناته ولا قدر الله يقذف في النـار !
مقسى قلبك ياوخيتي : D
ردي بالك الوقت يغيرك، ردي بالك توصلي لمرحلة نفسي وبس، ردي بالك تقتلي احلى حاجة فيك
القليب الأبيض، وروح السوية، والنفس السليمة، والايد الكريمة اللّي تعطي بدون لا تفكـر، اللّي تؤثر على نفسها ولو كانت بها خصاصة، اللي تنفق مما تحب ❤️اللي تحب لغيرها اللّي تحبه لنفسها
النفس المؤمنة المطمئنة ❤️
ردي بالك تتغيـري وتخسري نفسك، راحتك في دنيتك وأجرك في أخرتك ❤️
أنتِ تجارتك مش مع البشـر ! أنتِ تجارتك مع رب البشـر
لأنك مش أكرم من ربي فزيّ ما اعطيتي حيعطيك وأضعاف مضاعفة
اهني وغادي في الجنـة ❤️في الفردوس الأعلى منها ❤️
ليلتكم سعـيدة ❤️
أنت تقرأ
.انتقااد/.CRITICISM.
ChickLit- كانت تأتيني في احلامي وهذا شيء كافي.🖤- كنت أتقمص دوماً دور المنقذ في حين أنني لا أستطيع إنقاذ نفسي.
