.انتقااد/.CRITICISM.

💗

و بما إنّ المدرسة بـدت ، شن رأيكم في بعض النّصائـح ؟
هي نبدوا 💜

1. مش لازم تخالِف الزِّي ، بش ما يُوصل فيك حدّ و تُوقف في الصّقع ، و تسمع كلام مش حِلو من بداية السّـنة .

2. المقعِـد فكّـر فيه ، و شُوف لو تبّـي المقعِـد الأوّل ” و ننصحـك بيه “ ، حُطّ في بالك إنّ ديما لازم ما تكُون مُستعدّ و قاري ، و إنّ المُوجّهين تقريباً حتكُون عينهم عليك لمّا حيجُوكم .

3. برضُوا و بعد ما تفكّـر في المقعِـد ، فكّـر في الصّفة ، و أفضل صفّة للمقعِـد الأوّل هيّ الوسطيّـة ، طبعاً إللي جنب الرُّوشـن حتخلّيك مش مركّـز و عينك مرّة مرّة حتشبح للباب ، و إللي جنب الحِـيط هذي عيبـها إنّ الضّـي حيعكس عالسّبورة يعني كلمة تشُوفها و عشرة لا ! .

4. قاعدين في دوشة المقعِـد استنّى ، لو حاط في رأسك إنّك تبّـي تشدّ و تقرا كويّس فُوّت المقعِـد الرّابع و الخامس يعني للثالث كويّس ؛ لإنّ الأبلات عندهُم فلسفة إنّ المقاعد الأخيرة فيها إللي مش مُمتازين ، و على فكرة يحبّوا ينوّضوا منها خاصةً في الحِصص الأخيرة لمّا ينزل عاللي مقعمزين فيها النُّوم كلّـه .

5. نعرف سامعها النّصيحة هذي مليُـون مرّة
” أقرا أوّل بأوِّل “ بسّ نعاودوها ، بش نقُولّك علاش ؟ ، مش علي خاطر بش يجيك المنهج ساهل في الإختبارات و الإمتحانات ، لا بشّ لمّا تبدأ تبّي تطلع و تغيّر جوّ أيام القرايا تلقى رُوحك عادي قاري ، و ضميرك مرتاح 💜 .

6. صاحب الفصل كلّه تلقاهم صدّقني ، صاحِب إللي مش مدوَّر القرايا بش يبرّد عليك أيام الضّغط ، و صاحِب إللي هلبا هلبا متع قرايا هذا الفائدة منّـه مش عاديّـة ، يحرقلك دمّـك و يطيّـر النّوم من عيُونك ، و يخلّيك تقرا هلبا و مش مضيّع وقتك ، و صاحِب إللي نُصّ نُصّ هذا يبرّد عليك مرّات ، و مرّات يحفّزك بش تقرا .

7. ساعِد الفصل كلّه ، يعني إللي يبّي منّك تشرحله ما تبخلش عليه و عاونه يجي يُوم و تلقاه ، حدّ غاب و يبّـي منك كرّاستك أعطيه بسّ ردّ بالك تعطيهاله و تكون ثاني يُوم الأبلة بتاخد الكُرّاسات ؛ لإنّ مرّات يغيب و اضِّيع معاه درجة الكُرّاسة و حتسمع كمّ كلمة تهزّ بدنك من الأبلة .

8. لمّـا الأبلة تشرح مش لازم تشاركها في الشَّرح ، لمصلحتك بسّ ؛ لانّ الفصل حيشبحلك شبحة عالجّنب ، و في داخلهم [ مبرده عالأساس ذكيّ + دعوة تفركِس حياتك في ظهر الغيب ] .

9. بعد ما اتّم الأبلة الشّـرح اطرح أسئلتك بش تعرف إنّك منتبه بسّ الأسئلة ذكيّة خلّـيها .

10. فكّر قبل ما تقيم إيدك و ماتفكّرش ، نقولّك كيف ! ، يعني أوّل ما تسئل الأبلة خلّيها تكمّل سؤالها و ترجمه في عقلك بعدين قيم إيدك ، و ماتفكّرش يعني أوّل ما تُخطر علي بالك إجابة ما تُقـعدش متردّد زعما نجاوب و لاّ لا ؟ ، عادي رابح في كلّ الحالات إنتَ ، كان طُلعت صحّ حتُحفظ اسمك الأبلة ، و كان غلط برضُوا حتُحفظ اسمك ، و أهمّ شيء تشارك و تسمّعهم صُوتك ^^ .

11. احترِم كلّ الأبلات ، و حتّى و لو غُلطت فيك أبلة ما ترُدّش عليها ، أولاً عيب أكبر منّك ، ثانياً الطَّالب لمّا يُغلظ في الأبلة نقدروا نقُولوله : الله يرحم درجاتك و سُمعتك في المدرسة '() .

12. الغاليين إللي خاشّين ثالثة [ إعدادي - ثانوي ] ، خلّوا بصمة جميلة ليكم في المدرسة ؛ لإنّها اخر سنة ، استمتعُوا بكلّ لحظة حتّى لحظة التّوتّر إللي قبل الإمتحان ، ما تزعّلوا حدّ منكم سواء طلبة أو مُدرّسين ؛ لإنّ اخر لحظات أو خلّي نقولوا أغلب البشر تُقعد في ذاكرتهم النّهايات مش البدايات 💜.

13. طلبة و طالبات هدفكم من بداية السّنة حطّوه بين عيُونكم ، و الوقت إللي يضيع منكم ما تقدرُوش تعوّضوه ، و حتّى و لو عوّضتوه التّعويض حيكون علي حساب نفسيّتكم 🌸 .

و موفّقين و ربّـي يعاونكم و يعاون كلّ إللي يقروا ❤️