قداش تأثر فيا المواقف المُفاجأة اللي تصير بغتة ، خاصةً لو كان مرض أو موت.
مرة كنت في الكلية راكبة فوق ولما نشوف تحتي يقابلني الممر اللي يرفع للمكتبة الطبية ، المهم بالصدفة واقفة نستنى ، فجأة لاحظت زحمة في الممر والشباب تلقطوا في دائرة ، وأنا حايرة في السبب وكان واضح أن فيه إضطراب على وجوههم ، شوية بانت التفاصيل ، وسعوا وشفت طالب ملوح على الأرض مُغمى عليه ، كان يمشي لا بيه لا عليه طاح من طوله ، ولما طاح تجمعوا قاموه ورفعوه بسرعة ، كنت نسمع في واحد منهم يقول غطوه
يُقصد باش الطلبة ما يقعدوش يشوفوله ، رفعوه وهو مش واعي بالدنيا ولا يندري على شيء ، هيئته أوحتلي أنه توفى! ، ما نعرفش شن صار فيه لحد اليوم - ونتمنى يكون كويس - ولكنه كان موقف مرعب
موقف يذكرك أنك مش ضامنة صحتك حتى لو كانت في أوجها ، حتى لو كنتِ تنقزي في الجامعة من مدرج للثاني ، حتى لو جاية الصبح بكامل نشاطك ، مش ضامنة شن يصيرلك ، ولاك ضامنة عمرك
قوليلي بالله لا ضامنين عمرنا ولا ضامنين أعمالنا الصالحة ” هذا كان أعمالنا الصالحة تكفي نقابلوا بيها ربي! “
أي ثقة اللي عندنا ؟ ، سألتك بالله من اللي تفكر تتوب قبل ما تطلع من الحوش وأول ما تنوض الصبح وقبل ما ترقد خايفة ربي ياخذها وهي هكي حالها - إلا نادراً -؟
مني اللي عددت قداش معصية عندها وانخلعت وقلبها انقبض رهبة من الله؟
مني اللي صارلها موقف ذكرها أنها فانية وما تستاهلش كل اللي مدايرينه على خاطرها ؟
نهايتها قماش أبيض وصلاة جنازة وثلاثة أيام قُرمة وفطيرة وبعدها؟
ينسُوك!
حتى أحب الناس ليك حيعيش حياته طبيعي جداً بعدك ، حيضحكوا بعدك ، حيديروا أعراس بعدك ، حياخذوا مكانك ، وأنتِ شن حالك؟
- أول ليلة بروحك كيف حيكون شكلها؟
من غير مخدتك من غير سريرك.. من غير صوت أمك وبوك.. من غير ضحكات أخواتك.. من غير لامبة دارك
من غير ونسة معاك يحطوك ويمشوا ، لو قتلك عندك طلعة وح تباتي في المكان اللي ماشيتيله كم يوم راك جهزتِ حوايجك وبضاعتك للمبيت خصيصا وتأكدتِ أن اللي ح ترفعيه يسدك ويكفيك ، قوليلي شن حترفعي معاك لقبرك ؟ ، وهو مش مبيت يوم ولا اثنين بل نومة صُبحها يوم القيامة !
بالك بينفعوك صاحباتك ولا عويلتك ، بالك ب يبيتوا الآيفون اكس معاك ، بالك بترفعي مفاتيح السيارة ولا أي حاجة عندك ؟
أكثر من أعمالك مش ح ترفعي حاجة!
تذكريها ، اهمسي بيها قبل ما تردي على مكالمة ، وقبل ما تكتبي رسالة ، وقبل ما تفتحي فيديو ، وقبل ما تسمعي موسيقى ، وقبل ما تفتحي عيونك على حرام وقبل ما تسكري على روحك دار '..()
أنت تقرأ
.انتقااد/.CRITICISM.
ChickLit- كانت تأتيني في احلامي وهذا شيء كافي.🖤- كنت أتقمص دوماً دور المنقذ في حين أنني لا أستطيع إنقاذ نفسي.
