Tataya ako sa lotto
At kung sakaling mananalo ako
Bibilhin ko uli ang mundo.
Mali, masyado na palang mahal ito.
Dahil sa bawat kilos mo,
kailangang may papel at tanso.
O baka naman pwedeng ang kabutihan ng mga tao muna ang bilhin ko
Saka ko isusunod ang mundo
Para magkaroon ng TUNAY NA PAGBABAGO.
Dahil ang pagbabago ay hindi mo magagawa nang basta-basta
At hindi mo rin kayang gawin sa mga tao-- paisa-isa
Dahil walang makakapagbago sa kanila
Tanging sila lang ang may kontrol sa sarili nila.
Tataya ako sa lotto.
At gagamitin ko lahat ng mga magagandang numero
Magbabakasakaling ito na ang swerte ko
At nang makaahon sa hirap na nararanasan ko.
Lahat ng monthsary, anniversary at birthday
Iipunin pati na araw ng pag-ampon sa bagong aso naming si Johnny
Walang dapat aksyahin dahil minsan lng ang swerte.
Kahit na mangutangan sa aking mgq kumpare
Dahil naniniwala akong lahat ng bagay ay posible.
Tataya ako sa lotto
Kahit na ang panalo ay laging hindi garantisado Manalo man o matalo,
Isa lang ang totoo
Gumastos ako.
Na ang perang dapat ibinili ko sana ng bigas
Ay akin nang dagliang winaldas
Na sa aking sarili ay nagmatigas
At nagpumilit, hindi umatras.
Bago ko nalang naalala
Noong kinapa ko ang aking bulsa
Naghahanap sana ako ng barya
Pagkat ang lalamunan ko'y tuyong-tuyo na
Sa haba ba naman ng pila
Ni libreng tubig ay wala.
Maging Tuyong laway ko'y ubos na
Tataya ako sa lotto.
Dahil halos araw-araw ay lalong lumalaki ang halaga
Pero napagtanto ko bigla.
Lumalaki ang halaga dahil marami rin ang tumataya
At kapag lalong tumataas ang mapapanalunang pera
Talaga ngang maaakit nito ang madla.
Hindi kaya isa lamang ito sa mga bitag nila?
O kaya pagpapatunay kung tayo nga ay desperada?
Na handang itaya kung ano ang mayroon tayo ngayon
Nang hindi iniisip kung malulubog na sa utang susunod na hapon?
O di kaya'y biglang swertihin at sa hirap ay makakaahon.
Tataya ako sa lotto.
Pero hindi ko iaasa ang swerte ko dito.
Dahil pagmulat pa lamang sa umaga ng mga mata ko
Batid ko na ang tunay na regalo Mo.
Ang buhay na kailanman ay hindi mapapalitan ng isang bilyon na may milyon at libo.
At kahit walang PCSO o di kaya ay Keno
Laging nakataya ang buhay ko Mula sa pagdedesisyon sa pakikipagkapwa-tao
Hanggang sa pagmamahal ko sa sarili ko.
Laging nakataya ang lahat ng buhay
Kahit pa ito ay regalong walang kapantay
Kamatayan naman ang kanyang kaatibay.
Tataya ako sa lotto.
Pero hindi ko itataya ang kinabukasan ko.
Tama na siguro itong mga barya ko.
Tama na siguro
Ang pagtaya ko sa lotto.
Top of Form
