من أنت يا من ملكت قلبي

الفصل الرابع

روايه حبيبي لغز حيرنى
الحلقة الرابعه
بقلم جنه الاحلام★
★★★★★★
فى ڤيلا محمود الاسكندراني

جهاد:  ماتيجى تباتى معايا يا هاجر بدل ماتيجى الصبح تانى وبعدين نروح يبقي من هنا علي طول
هاجر: تصدقى فكره انا هروح استأذن بابا وماما ولو وافقوا هجيب هدومى واجى ابات معاكى
جهاد: ماشى هستناكى
بعد ساعه رجعت هاجر ومعانا شنطه كبيره
جهاد بدهشة: ايه يابنتى اتأخرتى ليه؟! وايه الشنطه دى كلها !!؟
هاجر: انا يدوب جمعت الحاجات اللي هحتاجها وجيت على طول
جهاد باعتراض: كل دى حاجات هتحتاجيها هو انا هنعيش هناك يابنتى؟!!!
هاجر: ماانا مش عارفه لسه هلبس ايه فجبت الهدوم الجديده اللي اشترتها عشان تقولي رأيك أحلي واحد ايه؟!!
جهاد: ماانتى كل يوم بتختارى هدومك بنفسك اشمعنى بكره مش عارفه تختارى؟!
هاجر: يابنتى بكره يوم مختلف  لازم نهتم بمظهرنا جدا لان ده بيدى الانطباع الاول
جهاد: هو الانطباع الاول بالهدوم؟!
هاجر: لازم نبهرهم بمظهرنا عشان يهتموا الدنيا مظاهر يابنتى
جهاد: انا شايفه اننا نبهرهم بمهارتنا وكفائتنا في الشغل هو احنا راحين نشتغل ولا نشوف عريس
هاجر بخبث: مش يمكن الاتنين!!!
جهاد: يخرب عقلك انتى بتفكرى في ايه؟! انا قاعده قلقانه وعماله افكر هعمل ايه في تدريب بكره وانتى بتفكرى في الجواز؟!!
هاجر: هتفضلي هبله طول حياتك اسمعينى بس انا سمعت ان الدكتورين اصحاب المركز دول كانوا عايشين بره مصر  ولسه راجعين طازه ومش مرتبطين قلت مش يمكن يبقوا من نصيبنا وبكده ابقي ضمنت اكمل معاكى بقيه حياتى خلقتى في خلقتك وكمان هما توأم عشان مفيش واحده تقول للتانيه جوزى احلي من جوزك يبقوا نسخه واحده

جهاد باستغراب: لا داانتى ضربتي خالص ياهاجر وهربت منك
هاجر: مالكيش دعوه خالص بالحوار ده خليكى معايا انا هلبس دلوقتى الهدوم الجديده قدامك وانتى قولي احلي حاجه عليا ايه
وبعد ساعه
جهاد بتعب : خلاص يا هاجر تعبت الاخير ده جميل أوى
هاجر : طيب بصي كده البالطو الابيض حلو عليا
جهاد: انتى بتلبسيه بقالك كام سنه وجايه تشوفي النهارده حلو عليكى ولا لا
يابنتى لو استمريتى علي كده هتلبسى بالطو  أبيض غير ده خالص
هاجر: بالطو ايه
جهاد ضاحكه: اللي بيلبسوه وهما داخلين العباسيه هههههههه
هاجر: بقي كده يارخمه ماشى
جهاد:يلا بقي عشان ننام عشان نوصل بكره في معادنا احنا كده سهرنا كتير
هاجر: ماشي يلا تصبحى على خير

★★★★
فى المركز الطبى
وصل عمرو المركز الساعه عشره الا ربع
عمرو: استاذه نجوى
نجوى: ايوه يادكتور!!!!
عمرو: فيه اتنين دكاتره بنات هيجوا يتدربوا هنا النهارده
نجوى: ايوه الاداره بلغتنى
عمرو بجدية: معادهم الساعه عشره لو وصلوا في معادهم طلعيهم فوق انا في انتظارهم لو اتأخروا يفضلوا عندك لحد مااكلمك  اوك؟
نجوى: حاضر يادكتور زى ماتحب
★★★
فى ڤيلا محمود الاسكندراني
جهاد بعصبيه: قومى يانيله قومى الساعه تسعه راحت علينا نومه اصحى بسرعه
هاجر بفزع: يانهار ألوان  ايه الي حصل؟! شكلى   قومت قفلت منبه الفون ونمت تانى
جهاد بغيظ: فالحه قومى بسرعه  ع الحمام انا سبقتك هصلي والبس بسرعه تكونى خلصتى
هاجر: حاضر ثوانى واجهز
بعد نصف ساعة
هاجر: انا خلصت تعالي يابت ياجهاد اعملك ميكب خفيف
جهاد: لا ياحبيبتى انتى عارفه مابحبوش وبعدين من إمتى الاڤوره دى؟!
هاجر: للضرورة احكام يلا بسرعه اتأخرنا
جهاد: يلا يافالحه خلي الهدوم تنفعنا دلوقتي
هاجر: هتشوفي اما نوصل مفعولها هيكون ايه
وبعد ساعه وصلوا للمركز
جهاد: بعد اذن حضرتك احنا عندنا معاد هنا احنا الدكاتره اللي هنتدرب هنا
نجوى: اهلا بس انتو اتأخرتوا اوى معادكم عشره ودلوقتى ١١ الا ربع
هاجر بعصبية: يعنى ايه يااستاذه مش فاهمه الجرس ضرب يعنى ومالحقناش الطابور
جهاد : اهدى ياهاجر لو سمحتى
نجوى: اتفضلوا اقعدوا وانا هكلم دكتور عمرو واشوف هيقول ايه؟!
جهاد: تمام هنستنى الرد
وفعلا قعدوا وفضلوا منتظرين ساعه كامله
هاجر بصوت عالي: لا كده كتير فين الدكتور اكلمه هو احنا متعاقبين ولا إيه؟!
نجوى: من فضلك اهدى يا دكتوره انا كلمته وقالي هينزل لكم في استراحه الضهر معدش نص ساعه
هاجر بنفاذ صبر: اللهم طولك ياروح ايه البدايه الزباله دى
جهاد بسخريه : بديع الانطباع الاول والله
هاجر بعيظ: اخرسى خالص مش نقصاكى اصبرى بس اما يجى عمرو ده ،وابتسمت بس تصدقى والله اسم جميل ياترى هيبقي ابيضانى وأمور زى مهند و لا اسمرانى وشعره متسبسب زى شروخان
جهاد: تافهه طول عمرك!!
بعد دقائق دخل عمرو
نجوى: اتفضل يادكتور عمرو
همست هاجر: مين عبده موته اللي داخل علينا ده هههههه
ضربتها جهاد بخفه وهمست: اسكتى ياهاجر مايصحش كده
عمرو كان شاب طويل بشرته مايله للسمار وملامحه جامده وفيها جديه
عمرو بحدة: انا مبلغ حضراتكو بالمعاد الساعه عشره مش كده؟!!!
حست جهاد بحرج شديد ووشها احمر
جهاد: احنا أسفين يادكتور معلش حصل عندنا ظروف
عمرو بعصبيه: كان اضعف الايمان تتصلوا وتعتذروا وتبلغوا انكوا هتتأخروا مش كده ولا ايه؟!
هاجر كانت بتغلي من الغيظ ومش طيقاه: معلش  ماحصلش حاجه يعنى بكره ان شاءالله هنيجى في المعاد
عمرو: تمام مفيش تدريب النهارده وأن شاء الله بكره اما تيجوا في المعاد هنبدأ التدريب
هاجر بعصبيه: هو في ايه ؟! هو احنا متعاقبين ولا ايه تحب حضرتك نقف وشنا للحيط ونرفع شنطتنا لفوق
جهاد عاتبه: هاجر مايصحش كده!!
احنا متأسفين اوى يادكتور
عمرو بنبرة صارمة: وانا كمان أسف تدريبكم ملغي وخرج وسابهم
جهاد بغضب : مبسوطه كده بوظتى الدنيا
هاجر: ياشيخة أحسن تدريب ايه وزفت ايه؟المفروض التعامل يكون ارقى من كده احنا دكاتره مش اطفال في كى جى تو
جهاد: طيب هنتصرف ازاى دلوقتي يافالحه؟!
بابا لو عرف اللي حصل هيضايق جدا ده موصينى اشرفه وارفع راسه
هاجر: امال انا اقول ايه بابا لو عرف اللي قلته هيمنع عنى المصروف
بقولك ايه ياجهاد روحى للسكرتيره واطلبى منها تطلعى لدكتور زفت اللي فوق ده واعتذري له