من أنت يا من ملكت قلبي

الفصل السابع

روايه حبيبي لغز حيرنى
بقلم جنه الاحلام
الفصل السابع
★★★

أحمد: اتفضلي يادكتوره هاجر الحاله االي جايه عايزك تشوفيها بنفسك هروح مشوار صغير ربع ساعه وراجع
هاجر: حاضر يادكتور
دخلت هاجر
هاجر: حضرتك بتشتكى من ايه؟!
الحاله: الم شديد في اللثه مع الساقع والسخن
هاجر: اتفضل اشوف اسنانك واللثه
امممم واضح ان اللثه بتاعتك حساسه جدا وكمان فيها شويه التهابات لكن الاسنان كويسه
الورقه دى فيها تعليمات التعامل مع اللثه الحساسه وهكتب لحضرتك علي مضمضه ومعجون خاص باللثه الحساسه
الحاله: حضرتك هاجر حسن النجار؟
هاجر باستغراب: ايوه انا حضرتك عرفتنى منين
الحاله: طيب مش بتشبهى عليا؟!
هاجر: معلش مش واخده بالى
الحاله: انا مالك العدل فاكرانى؟!
هاجر مبتسمه: مالك ايوه افتكرتك ياما لعبنا سوا واحنا صغيرين
مالك: اخبارك ايه يادكتوره هاجر
هاجر: الحمدلله بخير اخبارك انت ايه؟!
مالك: الحمدلله
هاجر: انت اتخرجت من اى كليه؟!
مالك: تجاره وبشتغل محاسب في شركه خاصه
فرصه سعيده انى شوفتك بعد الوقت ده كله من يوم مانقلتوا من العماره لحد دلوقتي مااتقابلناش
هاجر: فعلا الدنيا صغيره

★★★
بقلم جنه الاحلام
بعد صلاة الضهر جهاد كانت مستنيه عمرو عشان تعرف هو عايزااها في ايه؟!
عمرو: دكتوره جهاد
جهاد: ايوه يادكتور عمرو
عمرو: بصراحه ومن غير مقدمات في واحد عايز يتقدم لحضرتك
جهاد باستغراب:واحد مين؟!
عمرو: أنا
جهاد مرتبكه: حضرتك؟! بس انت ماتعرفنيش ولا انا أعرف حضرتك طلب حضرتك مفاجىء جدا
عمرو: أنا أسف كنت فاكر حضرتك عندك قبول من ناحيتى بكرر اعتذارى
جهاد: مش حكايه كده بس شايفه ان حضرتك استعجلت واحنا لسه مانعرفش بعض مجرد زماله بقالها اسبوعين تلاته بس
عمرو: بس المشاعر اللي انا حسيتها ناحيتك محسسانى انى اعرفك من سنين
جهاد: معلش ادينى فرصه اتعرف على حضرتك اكتر عشان مااحسش انى استعجلت وخدت قرارى من غير تفكير
عمرو: زى ماتحبى بس عايزك تعرفى انى مستنى ردك واتمنى تقبلي
جهاد: ربنا يقدم اللي فيه الخير يادكتور عن اذنك
عمرو: اتفضلي
★★★

سلوى: بابا في واحد زميلي عايز يقابل حضرتك
منصور والد سلوى: بخصوص ايه؟!
سلوى بمرح: ايه يابابا بقي كل البنات لما بيقولوا كده لباباهم بيعرفوا انه عريس بتصعبها علينا ليه ياحاج
منصور ممازحا: وعرفتيه فين ده ياهانم؟!
سلوى: لا داانت بتتفرج علي افلام كلاسيك كتير ياعم حسين رياض العريس لسه راجع من السعوديه من شهر وجايلنا الشغل من ٣ اسابيع
منصور: طيب ملينا الاسم والعنوان عشان نسأل علين ونطمن
سلوى : حاضر يابابا بس بسرعه اصل العريس مستعجل
منصور: العريس هو اللي مستعجل برده
ربنا يكتب لك الخير يابنتى ويفرحنا بيكى
سلوى: امين يارب

★★★

مر اسبوعين وجهاد بتفكر في كلام عمرو هى حاسه بانجذاب له ومعجبه بحاجات كتير في شخصيته زى جديته التزامه بالصلاه في معادها و وانضباطه ومهارته كطبيب بس ساعات بتحس تصرفاته ساعات مش مفهومه عصبيته مفاجأة وسريعه واحيانا شديده وبعدها بيهدى بسرعه غريبه
وكمان غيور جدا لو جه اى حد من الدكاتره او طقم التمريض يكلمها بيتعصب وبتحسه بيلف حواليها كأنه بيحميها مش عايز اى حد يقرب منها كأنها بقت حاجه ملكه الحاجات دي كانت بتخوفها منه