عديل الروح

عديل الروح ٣

                  البـارت الثـالث

  وبعد ايام.......    
*في المدرسة :-
ابرار وهي تتوسط سما وصبا : حتجو العزومة الليلة مش! ؟
صبا : احتمااال
ابرار بخيبة : لا ياخ انا مادايرة احتمال انا دايرة تأكيد..... 
سما : المشكلة انكم عاملنو في الصالة. وحيكون  كلو رجال..  وانا أشك انو امي وغلا  يخلونا نمشي معاك ....
ابرار : ببصيص من الامل : اولا نحنا فاصلين النسوان من الرجال يعني حناخد راحتنا....  ولو على امك وغلا  انا بقدر اقنعهم انتو بس وافقوا.....
صبا بتذمر :_  انا ماقادرة افهمكم... اخوكي مما رجع قرّب يعفن...  وانتو يادوووب فكرتو في العزومة...
ابرار :_ هو مما رجع مافضى لينا جاري وراء شغلوا . ... ويادوب قبل علينا ووافق على العزومة....
سما : غايتو نحنا ماعندنا مشكلة .... كلمي امي وغلا ولو وافقو بنجيكي......
احتضنت ابرار.... سما بفرح وهي تقبلها : ياحبيبتي انتي......
سما وهي تبعدها عنها بقوة : ابراااار...  انتي اصلو ماحتبطلي حركاتك دي.....  كسرتي لي عظامي
ضحكت صبا ومعها ابرار قائلة : اه معليش نسيت انك رقيقة وكمان عوود....  ونظرت إلى صبا  : وانتي بلييز غيري ضفايرك  ديل بتسريحة تانية....  بالله في زول عندو شعر زي شعرك ويسرح كدا... حبوبة بس...... 
ضحكت سما وغضبت تلك وقالت وهي تضربها على كتفها.: _ ماااااااابخصك...  ان شاءالله احلقوا وامشي صلعة برضو ماابخصك سااامعة.....  وكلامك دا كلو حيصل ل امي لانها هي البتسرحني وبتقول لي عشان أبقي احلي واحدة  في المدرسة....
جحظت ابرار عينيها ونظرت الي سما ثم عاودت النظر الي صبا وفجاءة غرقت في الضحك من حديث صبا وبراءتها....  وتبعتها سما في ذلك...
وقالت من بين دموعها وهي تضحك :_ والله امك دي فُلة وعسل ياخ....  قالت ليكي عشان تبقي سمحة.... سمحة العافية ياصحبتي..
ضحكت صبا ايضا بعد إستيعاب ما قالته....
ابرار بعد ان هدأت قليلا. :_ المهم انا قررت اني اجي عندكم واتجهز....  الله يشهد بعد كلامك دا اصلي مابضمنك....  تقومي تجيني بالضفيرتين بعدما تقنعك امك بجمالهم  ......
(كانت لدى ابرار غاية في نفسها من حضور صديقاتها.....فما قالته والدتها ذلك اليوم أغضبها وجعلها تفكر في خطه تجمع بها احمد وصبا)

                   *********************
وفي المساء الساعة ٤ :_
في منزل لينا :
في حضنها ينام عزوز بكل براءه وسكينه...  وبجانبها تجلس لينا...  يتسامرون سوياً......
غلا بتساؤل وتعجب :_ مالِك !؟ .... شكلك باكية
لينا وهي تحاول الهروب من هذه السيرة : ابكي شنو يتخيل ليك بس....  مافي حاجة...  انتي قولي ل...
غلا بغضب : لينا أنا  ماعرفتك امبارح عشان اجهلك...  ومما قلتي مافي حاجة يبقي في مليون. حاجة...  عشان كدا أحكي .....
أخذت تلك نفسا عميقا وقالت : عاطف عايز يعرس....  اتصلت أمو  الصباح وكلمتني..
تفاجأت غلا  مما تقوله صديقتها وحزّنت لحالها فما لاقته من عذاب وجروح طوال فترة زواجها من هذا العاطف كفيل لقتلها...  فالحمدالله انها مازالت صامدة والفضل يرجع بعد ألله في صمودها لهذا الذي ينام بين ذراعيها...... 
امسكت غلا بيدي صديقتها وقالت متفاجئة :_ انتي لسة بتحبيهو.!!! ..........  مايعرس كان داير يعرس ... انتي عمرك شفتي معاهو شئ سمح ...  مما إتزوجتيهو وانتي تقول اتزوجتي معاهو المشاكل... طالعة من مشكلة وداخلة في مشكلة جديدة..... ولاتزعلي ولايستاهل منك دمعة  وان شاءالله ربنا ح ياخد ليكي حقك منهم...... 
لينا بكل حزن واسى : _ انا ماعايزة منهم حاجة وبحمد ربي اني بعدت عنهم... بس انا ماعايزة عزوز  يتظلم...  خايفة عليهو يا غلا انا طلعت من البيت داك عشانو...  عشان مايعيش في مشاكل ويتأثر بيها.....  وعمري مافكرت في الطلاق ولا جبت سيرتو لاني خفت بعدما يكبر يجي ويقول لي انو انا السبب في فراقو من ابوه...  صمتت قليلا واخفضت رأسها وهي تضع يديها عليه:  آآآآه يا غلا تعبت خلاااص وماقادرة اتحمل....  نفسي ارتاااااح... بس وين الراحة وانا كل مااقول فُرجت تجي عقبة اكبر من القبليها... والليلة امو ضاربة ما حُباً فيّا.....  لا ..عشان بس تتشمت ....وناسية انها السبب الرئيسي في كل مشاكلنا...
رفعت غلا رأس صديقتها وقالت :_ بتفتشي على حاجة ماموجودة في الدنيا يا لينا الراحة في الجنة بس وادعي ربنا يرزقنا بيها....  اما نسيبتك فلكل ظالم نهاية.... ومهما لف الزمن ودار حقك ح تاخديهو في الدنيا قبل الاخرة ان شاءالله...
انسي ياحبيبتي وعيشي حياتك ليكي ول ولدك وخليكي معاهو خطوة بخطوة  .... لانو دا هو الحينسيكي كل آلامك وجروحك.... (واحتضنت عزوز بقوة) .. انتي عندك بلسم لكل جروحك وتبكي.على عاطف.......  يغور عاطف واللي جابو عاطف في ستييين.....
ابتسمت لينا لصديقتها وهي تقول بكل حب وصدق : ما عزوز  بس اللي بلسم في حياتي حتي انتي يا غلا....  انا منك بستمد قوتي....  كلما أضعف اجي عندك آخد منك جرعات من القوة اللي بتخليني اقدر اواجه الحياة ومطباتها.....
ربنا مايحرمني منك  ولا من وجودك في حياتي..