#حلمي_الأخير/ج1
***
...
أستاذ مصطفى .. أستاذ !!
نعم !!
الگعده كامله ماناقصها غير وجودك شرف أستاذ تفضل ستريح ...
دكتور إحسان جاي بالطريق
بارك الله بيك وليدي غيث روح انته هسه مااحتاجك بعد
في امان الله ..
..
تنهدت تنهيده طويله ..
حسرات ماوراهه حسرات ولابعدها
اني هسه ببغداد بفندق __
بالغرفه فاتح شبابيك البالوكونه بالطابق الأخير والهوه بارد كلش
الوقت شته بشهر كانون الثاني
بس ماحس ببرد
بداخلي نار ماتطفى
نار الشوگ لحبيبتي الراحت وعافتني
وشوگي لأهلي وحنيني لمدينتي اللي كلشي بيها ذكريات حزن وظلم وخساره وغبار الوحده وريحة الموت ...
ابتعدت حتى انسى وارتاح
اكتشفت انو البعد ماينسي
وان الروح تحن لأصلها
ايييي ..
ياريت الزمن يرجع وترجع ايام الشباب ...
..
الجكاره والاركيله عزائي الوحيد
المتنفس الوحيد اللي يصبرني ويهدأني بايامي الاخيره
دخلت جوه بالصاله وسديت الشبابيك
انتظرت دكتور إحسان دقايق ووصل بهالدقايق شربت كم جكاره والألم يحرگ بصدري وره كل جكاره اطفيها أحس بسعير جهنم بصدري
نفتحت باب الغرفه
.. استاذ مصطفى !!
اهلا دكتور استريح
هاي شصاير بالغرفه مدخنه؟؟
فتح الدكتور فتحات التهويه والشبابيك بالغرفه
اني جنت متمدد ع الأرض كومني ع الكرسي
أستاذ مصطفى انته دا تقتل نفسك بهالطريقه
ياريت دكتور بعد ماتحمل وداطلب الموت وصار بعيد مني
وديكلفني ألم قوي ووقت هواي
لا لا موقبول منك هالكلام
انته إنسان واعي ومثقف لاتحجي هالكلام !!
فتح جنطته وقاس ضغطي وبعدين طلع اوراق نتيجه آخر تحاليل سويتها
عاينلي بشفقه وحزن
أستاذ مصطفى الاعمار بيد الله بس انته لازم تكون قوي
ميصير هيج اللي د تسوي إنتحار
صار كم أسبوع من كتلك اترك الدخان والسم اللي يزود عليك الألم ماعدنه وقت
ماكو حل عدنه غير نزرع جهاز يقوي عضله القلب ونحضره لعملية الزرع
والعملية نجاحها 10% للأسف
ضحكت باستهزاء هه وليش للأسف
هاي هيه دكتور
ماقصرت انته الباقي الله يستعجل ويأخذ امانته
كم يوم بعد؟
اذا نبدي بالاسبوع الجاي افضل اسويلك طبله وافتحلك ردهه خاصه بالمستشفى ضروري نستجعل
ممكن نتأخر لكم اسبوع ؟
ليش استاذ؟
اكو عندي رغبه قويه انو أكتب مذكراتي
شنو !!!
لويش تستغرب ؟
ابتسم الدكتور بغرابه وهز برأسه
وگلي مثل مايعجبك سوي اللي تشوفه
اني اروح هسه ومن تكمل اتصل بيه بس حاول ان ما تتأخر
صار دكتور تأمر أمر
...
طلع الدكتور الساعه جانت بال 9 بليل
كم ساعه تكلفني اكتب بيها مسيرة 58 سنه؟؟
ياترى الحگ اكتب كلشي؟
أتمنى اللي عشت وياهم يقرون هالمذكرات ويعيشون وياي المعاناة والعناء اللي عشته
ماوصلت لهالمركز ولهالمكان الا بعد ماعانيت وتحملت جهد كبير وتضحيات
طلعت دفتر وقلم فتحت اول ورقه وصفنت
محتاج ذهن صافي ماتحضرني الذكريات
بعض الأمور نسيتها
والبعض الآخر محفور ببالي كأنما البارحه صارت بقيت محتار
عفت الدفتر غمضت عيوني واسترجعت ذكرياتي
تسارعت دگات گلبي وحسيت بتعب وثگل على صدري مرت ساعات أذن آذان الفجر فتحت عيوني وأخذت نفس قوي وبلشت اكتب واكتب بدون ماحس بالوقت اصلاً انتقلت لعالم خيالي ورجعت بالزمن لسنين وسنين
نعزلت عن العالم الخارجي ماطلعت من غرفتي أيام ..
عشر أيام .. كلفتني كتابه مسيرة أكثر من خمسين سنة عشر أيام .. قدري ومحطات حياتي وذكرياتي الحلوه والمرَة
سديت الدفتر واتصلت بدكتور إحسان واتفقت وياه على موعد العمليه ولو أني متأكد انها متنجح وهالشي مايخوفني
ماخفت من قبل تعرضت لمواقف وواجهت الموت أكثر من مرة وماخفت ولا أخاف
شكد حسيت بثقل جان ع صدري ونزاح
.. هسه مرتاح ومصيري واضح نهايته معروفه
اللي خسرتهم كفايه
واللي راح مني مايرجع
وحبي الوحيد اني قتلته بيدي
انتهيت ومااكدر اتعلق بأي إمل جديد بالحياة بهالوقت بالذات لأن حياتي
.. قربت من النهايه
يتبع ***حلمي الأخير * **الجزء الأول
بقلم الكاتبه #العاشقه
القصه قيد الكتابه حقيقة من الواقع مع تغيير الأسماء والأماكن والشخصيات وبعض الاضافات من وحيي وخيالي متابعة ممتعه وتصويت واضافه متابعين
🌺 🌺 🌺
