#حلمي_الأخير //24 ... بعد معاناة أيام وعدم اتفاق بيننا كمت اتجنب العراك والجدال المستمر وانسحب مرات ابات بالمحل واوصي ام كيان تبات وياهه والصبح اجي اسبح ابدل ملابسي وارجع حتى رغد صارت متبالي ولاتهتم بيه بطلت تحاسبني وتتذمر وتتجادل وياي حمودي ماخذ كل وقتها تاهت عليه سالفه عذراء اللي وصيتهم ماحصلوا على معلومات كل اللي عرفته انو لطيفه وعبدالله انقتلوا اثناء تصفيه الحزبيين ومالهم خبر ولااحد طلب بدمهم عذراء محد يعرف عنها شي يمكن حتى اسمها مغيرته ويجوز بعد مشافتني طلعت خارج المحافظة لو حتى خارج البلد لان اختفت فد مره رغد تعبتني كلش تغيرت عليه وماضغطت عليها ابد لأن أحبها واشوفها تتعب وتسهر وي محمد مجبور اتحملها اعشقها مستحيل ازعل منها بس بقيت مبتعد عنها أكول بلكي فتره وتعدي وترجع مثل قبل صار عمر حمودي شهور وحياتنه بارده ولاكأنما ذاك العشگ والحب اللي جان بيننا الأوضاع كلما جالها تزداد سوء اغتيالات وتصفيه احزاب بكل المحافظات بدايه سنه 2005 اكدر اسميها اتعس سنه مرت عليه بحياتي جانت الدنيا محترگه على الانتخابات والانفجارات بكل مكان رغد تخبلت عليه تريد ترجع يم اهلها حاولت اقنعها مفاد توسلت بيها تبقى علما تستقر الأوضاع رفضت تحججت بحمودي يكبر ماتريده يسجل بمدارس الأكراد وتريد نستقر بمدينتنه واشتاقت لأهلها وتعبت من الغربه مرت عليه أيام سوده بسبب تذمرها ونگها ماعرف شسوي الشغل هنا كلش زين وتعودت عليه الأوضاع الأمنية بالمحافظات خطره انفجارات والسيطرات كلش مزعجه حسب ماأسم بالأخبار ومن الناس ع ودائما ارهابيين ومفخخات أمريكا ماطلعت من العراق وخربطه بالوضع وحكومه مؤقته والحكومه القديمه تحت التصفيه والمحاكمة .. بظل ها لأحداث انجبرت اوديها لأهلها وقنعتها ارجع وحدي اصفي شغلي ماعدي غير هالحل اخذت غراض حمودي وغراضها بالسياره واخذت فلوس وياي ورجعنها بكل سيطرة لاساعه ولاثنين نتأخر تعبنه من الطريق حمودي يلوج لو يبجي لو يتقيء كل شوي ننزل نغسله ونرجع نصعد بسيطره على طريق بغداد متجهين سدوا الخط السريع رغد نيمت حمودي بحضنها اني تضايقت كتلها رايح اشوفلي مكان اقضي حاجتي أخذت دبه المي من جنطة السياره وصيتها لاتتحرك مااتاخر دقايق وارجع الخط يريدله ساعه يالا ينفتح بس عبرت ع طريق صحراوي علمود مكان فارغ الدنيا نهار خفت أحد ينتبه ويشوفني شفت تله تراب نزلت جواهه مسافه عشر دقايق مو اكثر واسمع دوي انفجار قوي كلش بحيث التراب تتطشر عليه ونشمرت گوه فتحت عيوني نملت تراب شصار؟؟؟؟!!!! الناس تصارخ انفجار بالسيطره قريب سيارتي!!! ياالله دخيلك زوجتي وابني صرخت ولطمت وكطعت نفسي لحد مافقدت الوعي الدنيا نگلبت ضحايا وناس جثثهم صارت قطع لحم صغيره اللي صار كلش صعب ماينوصف يارتني جنت موجود بداخل السياره ورحت وياهم ليش طلعت وليش مامتت ليش عفتهم شكد اناني الموت وعافني وخذاهم شكد قست عليه الدنيا من خذتهم ماتت بعدهم كل مشاعري وكل طموحاتي وكلشي حلو بحياتي مات وانتهى بقيت بالمستشفى مثل المجنون ماعدي قابلية اكمل حياتي اصلا انتهت حياتي وماريد اكمل بيها ولايوم ... يتبع ج//24
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
