#حلمي_الأخير ج/3..
..
بدايه عام 1980 كلش صعبه
جان عمري عشرين سنة
بديت اوعى على الدنيا وصارت عدي رغبه ومشاعر كلش قويه
حبيت هالبنيه كلش بحيث شلَت تفكيري وشغلَت بالي
ماحس بالدنيا كلها بس بوجودها أحس
العالم كله بكفه وهيه بكفه
اتخيلها عروستي وام بيتي
بصلاتي ودعائي مالي غيرها ذكر
حتى مادعي لنفسي ولا لاهلي ولا بيبيتي اللي جانت مريضه وتحبني وتتداريني وتنيمني بحضنها يلا تنام
كل دعاءي جان يارب اجعلها من نصيبي واجمعني بيها
بدت الحرب الايرانيه العراقيه ع بدايه العام الدراسي الجديد بشهر التاسع
جنت منتظر طلعة البنيه من بيتهم للمدرسة ع السنه هاي تحلفت اصارحها
خططت وفكرت ليالي وايام أنو متصير لغيري واجمع فلس فلس حتى اخطبها
بس مصار اللي تمنيته وشاء القدر اضطر انتقل من المنطقه لغير مكان لبست عسكري وخذونه جماعات
للتدريب بالتجنيد ومعسكرات اني طلع اسمي بمعسكر الرشيد ببغداد
والدي هم خذوا بالجيش الشعبي بس للبصره واني طلع تجنيدي ببغداد
امي جانت دوم تبجي والخوف والقلق مبين على الكل وحاله رعب وتوتر بكل مكان وبكل بيت
حسيت بغربه وكلشي مااندل ولاعرف ماطلعت من محافظتي من قبل
اول مره اطلع منها
ولاحتى اعرف اتعامل وي الناس
بمرور الايام تعلمت وتعودت
دربونه تدريب قاسي كلش بالمعسكر
اني وكم واحد من المحافظات مجموعة جننه ماعرف أحد هناك بس تعرفت عليهم بمرور الوقت وصار بيننا زاد وملح وسالفه وعشره وكل واحد عده قصه وسالفه
كتبت رسايل لأمي واسألها عن بيبيتي واخواتي وابويه
مرت ست شهور مانزلت بإجازة اشتاقيتلهم هواي
لحد ما بيوم دز عليه الآمر رحت گلي راح تنزل بإجازة لأهلك والبقيه بحياتك انته بطل ابن بطل
استغربت !!
توقعت أنو بيبيتي توفت لأن مرة جبيره ومريضه والأوضاع مو تمام وخافت وانتكست ومرضت بس من گال بطل ابن بطل حسيت بخوف وحمسه بصدري اخذت الورقه منه وقعت وطلعت جمعت غراضي وبدلت ورجفه لازمتني
توجهت للكراج وصعدت والطريق كله حسبات ببالي غفيت شفت محبوبتي الاحبها لابسه ابيض وتمشي سريع وعاينت عليه بخوف واشرتلي وراي التفتت شفت جنازه شايلينها ناس ماعرفهم وامي طايحه بالكاع
فزيت مرعوب وخايف أكثر
علما وصلت أحس حيلي رايح
باب بيتنا مفتوح وصوت نسوان وزلم وجهال شنو الموضوع؟؟!!
تلگوني ازواج خواتي وجهالهم خواتي لابسات اسود دخت راسي فتر
جنت تعبان من الطريق وماكلت شي من ساعات ناسي نفسي حسيت بدوار وطحت وعيت ع رش مي ببوجهي وعطر والكل مدايري يبجي
بعدين عرفت ابويه مستشهد بالجبهه وجايبي بالطريق ودزوا عليه من عرفوا منتظريني حتى يدفنو واسوي الفاتحه باعتبار ابنه الجبير والوحيد
الوضع صعب كلش وماينوصف بكلام ولابتعبير مرت ايام الفاتحة بألم وحزن وخوف بنفس الوقت
نسابتنه ماقصرو قامو بالواجب واقاربنه وازواج عماتي والجيران
جنت ممنتبه هالكد بس لمحت جيراننه اهل البنيه بيت ابو فاضل موجودين ابوها واخوتها
الوقت مو مناسب ومكدرت اسأل ولااستفسر
صرت هسه المسؤول عن امي وبيبيتي ومنا الواجب فكرت اقدم ع نقل لو اجازه جبيره بقيت عشر ايام والتحقت بالجبهه من جديد وودعت أمي وبيبيتي
وخواتي راحن وي ازواجهن لبيوتهن وبقه البيت فارغ
مكانه خالي بالگلب قبل البيت ..
الله يرحمك ياأبويه
جنت مثلي الأعلى ورجل بمعنى الكلمه ..
يتبع ...
..
#حلمي_الأخير / ج3
ارجو التفاعل أكثر والتصويت حتى اكمل بقيه الاحداث 🌹
