#حلمي_الأخير //8
....
صگر !!
شجابك هنا ؟؟
عذراء تبجي وطايحه بالگاع وشعرها منفوش ودم طالع من خشمها
الرجال اللي دخل وي لطيفه كلش متعصب اجه عليه
طلع مسدس من جيبه خلاه براسي
اني مخلي ايدي على سلاحي من دخلت للغرفه بس من شفت الموقف هيج والسلاح براسي رفعت ايديه لفوگ
لطيفه ركضت لزمت ايده وصرخت
عبد الله عوفه هذا الحارس الجديد احتاجه نزلت ايده واشرتلي أنزل جوة
..
عبدالله عيونه نار وشرار ويريد يگطعني
بس عذراء عيونها عليه وبيها حجي حسيتها تريدني اخذها من عدهم واخلصها
بقيت جامد بمكاني
لطيفه صرخت ببوجهي صگر انزل ارجع لمكانك
ءءأعتذر ست بس سمعت صراخ عبالي تحتاجون مساعدتي دفعتني وسدت الباب حيل
نزلت من الدرج وخايف انطرد بعد هالتصرف مني بقيت قلق كلش
سمعت صوت قريب مني وينه وينه!!
اني بالطارمه جنت ثاري هجم عليه هذا الرجال عبدالله وخزرني لك ابن الكلب جرني من ياخه الجاكيت ودفعني للحايط وماحس الا بكعب الزناد على گصتي كل قوته دخت وغوشت عيوني لو ما لطيفه تخلصني جان قتلني هذا المخبل جرتني من أيدي وصاحت للمرية الجبيره اللي شفتها بالمطبخ
أم سميحه حطيله ثلج على راسه
بعد ماحس بشي گعدت على الكرسي وأم سميحه سوتلي كمادات ثلج فتحت دگم الجاكيت والقميص ختنگت
ام سميحه يمكن خرسه كلشي متحجي
دقايق واجت عذراء
خاله روحي اني اهتم بي گعدت گبالي ولزمت الثلج
حجت بهمس أسفه صگر واشكرك على شجاعتك
عذراء ليش هيج ديصير شلون أبوج هيج يضربج؟؟
هه بابا !!
انته شدتحجي هذا مو بابا
لعد منو؟
صديقها لماما فد واحد شرَاني كلش لاتندگ بي مرة لخ
زين انتي شلونج هسه
بتسمت وحسيت ها فخوره بيه
انته شلونك؟
أني !! اصلا دايخ واشوفج اثنين
ضحكت وشبگتني
ولج عذراء هسه يجينه صديق ماما يسوينه تشريب
بقينه نضحك ونتشاقه ماحسيت بالوقت جابتلي عصير وفواكه اكلنه سوه بالمطبخ ام سميحه مدري وين راحت ولطيفه الظاهر طلعت وي هذا المخبل صديقها
شكد حسيتها محرومه هالبنيه ومظلومه نقهرت عليها
الوقت سرقنه
صار وقت رجعتي عذراء لازم اروح
صگر ابقى بعد شوي اذا رحت ابقى وحدي بغرفتي وماعرف شحيصير بعد هسه
لاتخافين اول وتالي امج مستحيل تأذيج ارضي انتي بنصيبج وبعدين الله يحلها
صگر ..
نعم ..
ليش ممتزوج لحد الآن؟
سالفه طويله مو وكتها فد يوم احجيها الج
احجيلي هسه
جنت تحب وحده وتزوجت اكيد؟؟
أخذت نفس وتحسرت ومعرفت شجاوبها
عذراء خل اروح هسه واذا ماطردتني امج باجر نكمل حجي
خلت ايدها على گصتي
آخ .. يمعوده
توجعك؟
اي والله بس هينه المهم سلامتج
شكراً صگر دير بالك على نفسك
طلعت وگلبي مقبوض ع البنيه خايف يأذوها
حسيت بعجز كلي شسوي
لا أگدر اتحمل مسؤوليتها ولاأگدر اساعدها
رجعت للبيت عمتي شافتني شهگت شبيك عمه شبيها گصتك؟
ماشفت نفسي بالمرايه ولاحاس بشي بس دايخ انتبهت اي والله هاي گصتي منفوخه وصايره زرگه بسبب الضربه
ماكو شي عمه نرگع راسي بالعمود
دخلت لغرفتي نمت ثاني يوم ترددت اروح بس گلت لازم اروح البارحه ماخذت يومتي لطيفه طالعه وتاهت عليه
بدلت ملابسي وطلعت رجعت لبيت لطيفه صنطه ماكو صوت بلشت بشغلي مثل كل يوم ساعة وسمعت صوت لطيفه من داخل البيت تصيحني دخلت
استريح صگر
عفواً ست اطيني يوميتي واللي شفته وسمعته مايطلع لبرة متشوفيني بعد
عاينتلي صفح
هيج بسرعه تريد تعوفني؟
گامت تقربت مني توترت
...
لطيفه كلش مغريه شخصيتها مكياج وعطر وملابس غاليه وعدها قابليه على السيطره شخصيتها جداً قويه
صگر انته شاب قوي وشجاع واني محتاجه واحد مثلك هنا مثل مادتشوف بيت جبير واني وبنتي وحدنه ماعدي أحد ووصيتك ماتتدخل بشي تمارس عملك حمايه ومراقبه من بعيد
آسف بس البارحه ردت احميج انتي وبنتج بعد ماسمعت صراخكم
ماشي البارحه اول وآخر مره سامحتك وعبدالله مالك شغل بي لاتندگ بي مره ثانيه من تشوفه اشغل نفسك بشغلك بعيد عنه
طلعت فلوس مادري شكثر انطتني
اخذ السايق مالتي وروح للمستشفى افحص راسك وأخذ علاج وارجع للشغل والباقي الك
صار ست تأمرين بشي بعد؟
لا روح هسه
شكراً ست
طلعت وبالي يم عذراء مالها صوت وين راحت !!
اخذني السايق دخلنه للمستشفى الطبيب فحصني وسألني كتله نرگع راسي بالعمود كتبلي علاج اشتريته من الصيدليه ورجعت لبيت لطيفه تفاجأت سيارات واگفه بالباب وشباب صاعدين على درج عالي ديركبون نشرات زينه وأضويه بالحديقة وبكل مكان بالبيت !!!
.... يتبع
...
//ج 8
...
