لعنة العشق

الفصل الواحد والعشرون

قال صديق بعينين تلمعان بالنصر:
آدى أيهم وجورى وحكايتهم خلصت خلاص..طلقها وأهى مرمية فى المستشفى..ومهيب كمان هتروحله رسالة بكرة تعرفه حقيقة مراته وإزاى طلع أكبر مغفل لما ضحكت عليه ..ما فاضلش غير أدهم ودى حكايته حكاية والحل الوحيد عشان أوجع راجى فيه انى أموته ياعلية

قالت علية بخوف:
لأ ياصديق..كله إلا الموت..أنا صحيح عايزة أنتقم من أخويا فى عياله وافرقهم عن اللى بيحبوهم زى ما هو فرقنى عنك..صحيح نفسى أكسر قلوبهم زى ما كسر قلبى..لكن توصل للقتل..لأ طبعا..مستحيل

اقترب منها صديق يمسك يدها قائلا:
اسمعينى وافهمينى كويس..أدهم مبيحبش مراته زى ما قلتيلى واجوزها عشان ولاده..لو فرقته عنها مش هينكسر..موته بقى هيكسر ضهر راجى..ده غير ان ثروته هتتقسم عل اتنين مش تلاتة وانتى بقى ساعتها تخلى بنتك تشد حيلها وتتجوز مهيب ..والفلوس كلها تبقى فى ايدك

قالت علية بتردد:
بس.....

وضع اصبعه على شفتيها قائلا:
من غير بس..انتى عمرك مشيتى ورايا ومكسبتيش؟

نظرت اليه تهز رأسها نفيا كالمغيبة..ليبتسم مستطردا وهو يقول:
يبقى تمشى ورايا المرة دى كمان وأوعدك انى هحققلك انتقامك

اومأت برأسها ايجابا ليقول:
جهزى نفسك عشان نظبط المسائل..وننفذ الخطة

نظرت اليه بحيرة ليسحب اصبعه من على فمها وهو يفرك اصبعيه السبابة والإبهام وهو يقول:
الفلوس ياحبيبتى.ظبطينى عشان اظبط الدنيا

ابتسمت وهى تتجه لحقيبتها وتفتحها لتخرج منها مبلغا من المال الذى يحتاجه لتنفيذ خطته الجهنمية
*********
قال عادل بصدمة:
لأ اهدى كدة وفهمينى بالراحة

قالت سوسن من وسط دموعها:
زى ما قلتلك..واحد اتصل بجورى وقالها ان أيهم وعاصم بيتخانقوا خناقة كبيرة فى مكتبه..جريت هى  على المكتب فملقتش غير الدكتور عاصم اللى نفى الكلام ده..ولما قامت تروح لأيهم البيت لأنها مش عارفة توصله بالفون..داخت وكانت هتقع..دكتور عاصم لحقها وسندها..ودخل أيهم ساعتها وافتكره حاضنها..طبعا اتهمها بالخيانة وبكل غباء طلقها
نظر لها بعتاب لتقول متلعثمة:
قصدى يعنى..المهم..هو خرج من هنا وهى أغمى عليها..و
فجبناها المستشفى علطول..الدكتور حمدى قال ان دمها كان فيه نسبة مخدر كبيرة..وانها كان ممكن تروح فيها..بس الحمد لله ربنا ستر..بعد ما فاقت افتكرت أيهم وطلاقها منه وكلامه ليها..جالها انهيار عصبى والدكتور ادالها حقنة مهدئة ومن ساعتها وهى نايمة

ثم صمتت لثانية لتتمالك نفسها وتأخذ نفسا عميقا ثم تقول بمرارة:
أنا معرفتش أعمل ايه..لو اتصلت بطنط نوال..ممكن يجرالها حاجة لما تعرف باللى عمله أيهم..ومش هعرف آخدها عندى لأنى ساكنة فى بيت مغتربات زى ما انت عارف..مكنش أدامى غير انى اكلمك تيجى تقولى اعمل ايه ياعادل