طفولة ضائعة بقلم #ام_مصطفى

البارت الأول

#طفولة_ضائعة
البارت الأول
#ام_مصطفى
(  فَأَمَّا الْيَتِيمَ فَلا تَقْهَرْ (9)  ) الضحى )
هلله هلله بالايتام الي عنده يتيم خلي يخاف الله بيه .

...................
يمه يمه
وج ها شبيج
يمه شوكت نوصل لبغداد
هسه شويه ونوصل
جا كل ساع دكولين شويه ونوصل شني السالفه
وج اسكتي منا الوادم فضحتينا
راح اطلعلج نستلة اشتريتها الج
من أم فاطمة  اكليها ونامي
شويه ومن تكعدين تلكينه واصلين
لبيت جدج
صدك يمه
اي صدك
جا خوش اطيني النستله
اكلتها رجعت نمت بحضن بيبيتي
بيبي غطيني بعباتج
اي بيبي موش تدللين
دنامي وهسه شواي ونوصل
تغطيت بعبايت بيبي ونمت
وكعدت ع صوت امي أميره خيبه
أميرة اكعدي وصلنة
عمه كعديها هاي نومها ثكيل
وانت مابيج حيل تشيليها
وأنه هاي زينب شلت حالي
كوه لفيت كماطها
ورضعتيها يا لا
اي عمه رضعتها شبعتها
تغشيت بعباتي ورضعتها
خوش
دخلي أكعد هاي
ولج اميييره كومي بيبي
موش خبصتينه تريدين توصلين
اي بيبي وصلنه
اي هل وصلنه
بي كادتني من أيدي
ونزلت كالت لمي جيبي علاكتك لاتنسيها
جانت امي عدها علاكة هي مخيطتها هي عباره عن كونيه مال تمن وامي خيطتها بيدها بخيط
كطن امي تسميه مال حفافه جانت
تسلتهن من كواني التمن والشكر والطحين
وتلفهن امي انت كلش شاطره رغم احنه جنه 6 جهال بس هي شاطره كلش
وعلمت اختي سوسن تساعدها اختي عمرها بذاك الوكت 10 سنوات بس شني جانت كلش شاطره اختي حتى امي من اجت لبغداد ما جابتها وياها
عافتها إداري خواني الكبار
احنه جنه 3 ولد الاكبار محمد عمره 14 سنه وعلاوي 13 سنه
وحسين 12 سنه واحد فوك رأس الثاني حتى من يتعاركون امي دكول رويسيه انتم موتوني
وسوسن جان عمرها 10 سنوات وإني ست سنوات
وزينب اختي الكعده عمرها 5اشهر
...
امي بيد جرت علاكتها وبيد لازمه
زينب
وإني عبرتني بيبيتي الشارع
ونتاني امي تنزل وتعبر النه
انه عيني ضلت تباوع ع شوارع بغداد
شكد حلوه والسيارات شلون تمشي
فجأ بيبيتي صرخت حسنه خيبه حسنه ديري بالج
تلفتت ع امي
واشوف امي بالشارع مدمايه
وأختي زينب بصفها
بيبتي كامت تصرخ
وتلطم وتخرمش بخدودها
وأنه كمت ابجي ركضت
شلت اختي زينب
شفتها تصرخ
امي جانت حيل حاضنتها
وحتى من انسحكت امي بالسياره
ماعافتها
التموا الناس علينه من باني وبني
وشالوا امي اخذوها
وبيبي أخذت زينب مني وصعدتني
وراحت لبيت جدي خبرتهم
وعافتني يم مرت خالي
وخوالي فزعوا كلهم يتراكضون
وي بيبي للمستشفى
وره ساعه اجت بيبي اخذتنه
وصعدنا بسياره بيها نسوان وزلم كلها تصرخ
بس امي ماكو مو وياهم
كل ضني امي بالمستشفى بعدها
مشت السياره هواي بينا
لحد ماوصلنه مكان اول مره اشوفه
ونزلوا تابوت شيايفته هذا
من يموت واحد من جيرانه لو كرابتنا يشيلونه ع رأسهم ويصيحون لا اله الا الله
حتى احنه دورات نشيل سعفة ونلعب بيها ونصيح لا اله الا الله
بس امي تضربنا دكول برد شركم
بيش مفوالين علينه
نزلوا التابوت وخلوه
اشوف خالاتي يتصارخن وبيبي
وشوية شفت ابوي وعمامي تعجبت شجابهم
هنا
ركضت ع ابوي بويه بويه
امي سحكتها سياره وطلع دم منها
وهسه بالمستشفى
ابوي حضني وضل يبجي
جان لابسه دشداشه
ولاف ع وجها غتره
خلاني بيد مرت خالي وكالها
رجعوا كعدو بالكوستر ع ما انخلص وراها صعدوا كلهم ورجعنه لبيتنه
لكيت ناصبين جادر ابابنه مال فواتح كيفت اي هسه يجن كل
صاحباتي يلتمن عدنه بنات عمي وعمتي وخالتي
نزلت أركض من السياره
واباوع ماهتميت للصريخ الصار من وصلنه
وركضت شفت بت عمي وفاء ورحت كيفت
رحت سلمت عليها
كالت صدك امج ماتت
كتلها لا امي اندعمت بالسياره وخذوها للمستشفى
مابيها شي
كالت خايبه شمالج
جا غير ماتت ودفنوها
ضربتها كتلها شبيج امي ما ماتت
ليش دكولين هيج
عافتني وراحت
كمت العب واركض
لليل كلت لبيبي وين امي شبكتني
وكامت تبجي
ونومتني يمها
منا لحد 3ايام يله لموا الجادر
كلش ضجت لأن طشت الوادم
رجعنا بالبيت وحدنا
وامي ماكو كل مااسئل بيبي تضل تبجي
جزت منها بعد ماسئلتها بقت الناس تروح وتجي علينا
تجي نسوان تبجي يم بيبي وتروح
ومنو تشوفني دكول خطيه هالبنيات ضل يتامة
اختي سوسن اشوفها تبجي دووم
بس مع ذالك ماعافتنة بقت ادارينة
وتشتغل واتنظف وإخواني يأمرون
عليها هواي تغسل هدومهم وتفرش الهم فوكاها اختي زينب الصغيره
دوم هي شايلتها 
طبعا اختي من وكعت من ايد امي انظربت بكصتها وبقه الجرح يطك كل ساعه دم
محد جان منتبه الها بس هي من تشوفه يطك دم تركض
تخلي خركه عليه
بيبيتي تمرضت وره السبعه من كد البجي والنواعي ع امي
جانت هواي تحب امي
لأن امي فقيره وشاطره وخادمتهم
جنت اروح باليل انام بحضن بيبي
وتضل تمسد ع راسي وتنعى لحد ماانام
بيبي كلش حنينه علينه
أما ابوي جان كلش عصبي وطبعا نحس
أبد ماحسينه بحنان منه
جان كل همه الشغل وبس ابوي جان فلاح وعدنه كاع زارعيها طماطة وباجلة وبيها نخل هواي وسدر
ابوي يطلع من الصبح ويرد ع الغده يتغده ويرد للكاع
وانوب يرد النه الغروب
من يجي يضل بس يصيح ع امي
حتى علم اخواني طبعه هذا
هم نحسين وابد ماعدهم محنه اتجاهنه
بس يأمرون ويصيحون .
بيبي ضلت تنوح وتبجي ليل نهار ع امي
جانت تنومني بحضنها الليل كله شويه احسها تعوضني عن حنان امي
وره موتت امي أسبوعين
كعدت الصبح جنت نايمه بصف بيبي
من غير عادتها بيبي تضل نايمه
وأكعد قبلها
كمت غسلت وجهي
لكيت سوسن هستوها كاعده
كالت كعدتي
كتلها أي تنوي كعدت
اكلج جا بيبي شعجب لهسه ضاله نايمه
ها ماادري
يجوز تعبانه النواعي والبواجي اثرن عليها
جا اروح اكعدها اني حتى نتريك سوه
خوش روحي وأنه راح اخليك الكيتلي ع النار وسوي جاي
ابوي طالع من الصبح
يجوز شاف بيبي نايمه وماكعدها
هسه شويه ويرد يريد ريوك
لو يدز عليوي
ويضل يزمخ علينه
اذا لكه ماكو ريوك
دروحي كعدي بيبي
وهاج اخذيلها زينب وياج

شلت زينب وخليتها بصف بيبي
وكمت أكعد بيها بيبي بيبي
اكعدي نتريك سوه بيبي
بيبي
يا شبيها بيبي اليوم بس نايمه
كل مره بس احاجيها تكعد
رحت لسوسن
خاب سوسن هاي بيبي ماتكعد
دتعاي كعديها انت
سوسن اجت بيبي بيبي
راح يأذن الضهر جا مادكعدين بيبي
طب ابوي يصيح وينجننننن
كعدتن يو بعدجن مسعدات
ها بويه ركضت عليه
ها ميييره كاعده اي بويه
كاعدين بس بيبي ماتكعد
ننده بيها وماتكعد
شلون امي لهسه نايمه
شني سالفتها
شو ميلي اشوف
يمه يمه جا شني سالفتج
نايمه لهسه تقرب منها
مد ايده عليها يمه حجيه اكعدي
كلبها وكام يصرخ بوياي امي ماتت
وللحكايه بقيه #ام_مصطفى
كتبتها بلهجة أهل الجنوب  يستاهلون اتعب وياهم
وعلى  راسي كلهم
تفاعلكم وياي  وسوا تايكات لصديقاتكم