لن أحبك

الفصل الرابع عشر :- ( حقائق )

• جميعنا نبحث عن الحقائق ولكن من منا قادر على تحمُلها...

▪▪▪▪▪▪▪▪▪▪▪▪▪▪▪▪▪▪▪▪▪▪▪

مضى أسبوع منذ يوم الخطبة لم يحدث به الكثير؛ فقط عادت لمياء ومنة لعملهما مرة أخرى وقد كان كل شيء بالنسبة إليهم رائع وفي أفضل حال، سعادتهن لا توصف عند عودتهن لعملهن مجددًا، فالعمل هو كيانهم الذي تحاولن بناؤه بكل قوتهن، سار كل شيء بطريقته الروتينية الإعتيادية، عدا أن مقالاتهما أصبحت محظورة من أن يأتي اسم "ياسر السباعي" بها وأيضًا يجب أن تمر أولًا على مدحت الوكيل ليراجعها بعدما كان قديمًا لهن الصلاحية في نشر ما يكتبونه دون نقد أو تمحيص... كان هذا هو أكثر ما يؤرق لمياء ويغضبها، مازالت مقتنعة بوجهة نظرها فهي متمسكة بمقولتها "من سار في طريق ما، عليه ألا يلتفت للصعاب حتى يصل لنهاية الطريق" وهي تدرك بإن طريقها مليء بالصعاب والمشقة... ومشقتها تكمن في أن تُدافع عن الحق حتى ولو أُمر السياف بقطع عنقها ستظل على مذهبها....

دلف فؤاد حجرة المكتب وهو يهتف بسعادة :- يا أهلا يا أهلا الجرنال نور يا لمياء.

تركت لمياء الحاسوب الخاص بها ونزعت النظارة الطبية التي ترتديها في العمل وفركت عيناها بإرهاق...

هتفت لمياء بإجهاد :- أهلا يا فؤش .. أزيك يابني ؟.

هتف فؤاد بتعجب :- ايه يا بنتي جاية حامية كدا ليه هو أول لما ترجعي ترهقي نفسك كدا !.

قاطعتهما منة وهي تدلف الحجرة وتضع حقيبتها على المكتب :- معرفش يا فؤاد بتفكر في ايه ، مش تريح الأول وبعدين تبقى تبدع ف مقالاتها !.

نظرت لها لمياء بأنزعاج صائحة :- والله ... على أساس إننا مكناش أجازة شهرين.

تدارك فؤاد الموقف وهتف مسرعًا كيلا ينشب خلاف بينهن :- طيب بتكتبي عن ايه يا لمياء !!.

رددت لمياء بتفكير :- في تجار سلاح أتمسكوا من حوالي أسبوعين كدا وكان فيهم اتنين من رجال الأعمال اللي لسه ظاهرين من قريب ، هكتب عنهم لحد ما أوصل للراس الكبيرة ، لأن مش معقولة بدون أي مقدمات بقوا من أكبر تجار السلاح ، أكيد في حد بيحركهم لأن ظهورهم غريب...

هتفت منة بإعتراض :- بس ده سبق صحفي قديم ! وبعدين مش أي حد بقى رجل أعمال يبقى بيشتغل في الممنوع...

هزت لمياء رأسها رفضًا وهتفت بابتسامة انتصار :-أولًا محدش أتكلم عنهم علشان هما مفتحوش بوقهم هما بس كتبوا عناوين ، ثانيًا بقى مالك وأدهم هما اللي ماسكين القضية وكدا أنا هطلع بالجديد كله..

ثم أكملت موضحة :- صح مش أي رجل أعمال جديد يبقى شغال ف الممنوع ، بس لما ف خلال سنتين أو أقل يظهر رجل أعمال معاه ملايين بعد مكان الماضي بتاعه بيقول إنه كان بيكح تراب يبقى في حاجة غلط..