البارت الثالث
عشر ابن الهور
#طائربلاتغريد#
عليوي صليت وطلعت للهور لميت الطير وخذتهن ورحت للسوك
بعده رديت للبيت ابوي بعده ماله خلك
طببت المسواك وخذت سليتي وحدرت للهور
كلما اكرب من مجانهه كلبي يفز
وجسمي يختض
شمعه الليل كله ما غمضت عيني افكر شلون اشوفه وشكله
للصبح غفيت
سمعت وحده تندهني
شمعه ولج شمعه
فتحت عيوني صفيه
ها ولج شجابج بليل
يا وج يا ليل غير صار الضحى
يا ولا حسيت
ديلله كومي امشينه للهور
أي أي كايمه
جلعت بدلت دشداشتي ولبست شيله ولفيت لثامي مشيت للباب ورديت
ها شمعه شعدج رديتي
ولج نسيت اتكحل
هههه هسه وكتهه الكحله
جا شلون عيوني بلك
ههههه يلله جا بسرعه موش تتأخرين
رجعت خليت كحله وكرصت خديداتي حته يوردن وطلعت لعد صفيه
كدنه الهوايش واني شلت المصخنه ومشينه للهور
كلبي يدك ويه كل خطوه
لحد ما وصلت
تفرقن البنات كلمن راحت الشريعه واني وصفيه رحنه للشريعه الشفته بيهه
بقيت واجفه ومنتظره ومنكبه بس عيوني طالعات
عليوي طلعت من الحوش ركبت المشحوف ورحت صوب ديرت المحبوب
لمحت بنيات يمشن ويتهدن بمشيتهن ماخليتهن يشوفني
تفرقن كل وحده مشت بصوب
وشفت ثنين بنيات وكفن يم الشريعه
حركت مشحوفي ومشيت من يمهن
صارت عيني بعينهه هيه جانت منكبه
واني هم متنكب
بس العيون تحاضنن
وحجن كل الحجي البكلوبنه
هنه ثواني مرن علينه بس سولفن هواي سوالف تأكدت من عيونه جن تكلي أنا هم احبك ومشتاكلتلك بكد رحمت الله
مشه المشحوف وعبرهن وعيونه بعدهه متحاظنه
رديت للحوش واني اشوف الحوش جنه يركصلي
للعصر رحت نصبت الشبج واني اغني والدنيه جن زاهيتلي
شمعه جنت واجفه صوب الشريعه واشوف مشحوفه كرب عليه
بطوله الحلو ملثم بس عيونه مبين بيهه الفرحه
تكابلت عيونه بفرحه
بعدهه مشه المشحوف وانا بقيت واجفه وعيني عل هور
صفيه شمعه شمعه خايبه شمعه
ها ها ولج شمالج فززتيني
يا ولج اني شمالي لو انتي صارلي ساعه انده بيج ونتي مامش
ها ماسمعتج
أي شلون تسمعين ونتي بالج موش يمي هههه بالج ويه المشحوف
