البارت السادس عشر
عشك ابن الهور
#طائربلا تغريد#
مساء الخير عليكم أحبتي
البارت قليل بس الي كدرت اكتبه نزلتهه حته ما اتأخر عليكم
اختكم
طائر بلا تغريد
💎💎💎💎💎💎💎💎💎💎💎💎💎
رجعت للبيت لكيت ابوي واجف بنص الشقه ويصيح
انا محبوس هنا بهاذا الصندوج وامك طالعه عل حل شعرهه مدري وين ولت اليوم بس خل اكظه اله ادوس بيهه العافيه شنهي شافتني كبرت وبعد ما تحترمني
تكربت يمه كتله
بويه كول يا الله هيه امي شعدهه غيرك
لا عده صار عده من ساعة الطبينه بهل مهجومه بغداد هاي وانا ابد موش مرتاحهه احسنهه عينهه فارغه
ادري يابويه هيه وينهه هسه
وشافت من بغداد
شمدريني وينه ظهرت بره وبعد ما ردت
التفتت اج حميد والولد الظاهر طالعين يدورون عليهه
ها مارجعت
لا مارجعت هاي عصفور ونكطع خيطه
بويه كول يالله وين تروح خاف طلعت بره العماره وتيهت
وتيهتهم أي والله
سالنه ابو حسن حارس العماره يكول ما طلعت
حجه حميد
بويه شجاك ماتكلي عفته وطلعت ادور بلله هسه وين ادورهه
وصلت يم المصعد واسمع باب شقة ورده انفتح
مادرت وجهي بس سمعت صوت امي تظحك
واسمع ورده تكلهه خاله الله عليج يوميه تعالي يمنه
مو تدللين يبعد خالتج جا شعدي انا مجابله هلحجي هذا بس كاظ الراديون وجاعد
هههه الله شكد حلو حجيج
رحت عليهه
دخيل ربج يمه وين جنتي
ودهر الدهرك شمالك جاي ترعد علي جنك جيله تايهه
يمه وين جنتي ماخليته مجان مادورنه عليج
ولك شمالك انا جنت جاعده بلحوش خلصت غده وطفيت النار وابوك حاظن هلرايدون وجاعد
فتحت باب الحوش وجعدت شويه اتونس بلباب
طلعت هلورده هاي أي والله ورده واسمهه عليهه
تناشدت انا وياهه كالت دخلي يم حبوبتي دخلت والجعده وياهن ترد الروح هههه
لا والله خاله الكعده وياج هيه الترد الروح هههه
ولاول مره انتبه الورده تظحك العيون يلمعن والخدود يصيرن مثل التفاح الاحمر وعليه لمعه
والشفايف تكول مصاصه حمره تريد الي يمصهه
بقيت صافن عليهه ماحسيت عل امي جرتني
ها عليوي يلله امشنه ابوك كاب
ها أي كاب للستار
يلله امشنه خلني اسكتنه لا يفظحنه
طبت للشقه وانا طبيت وراهه
وتلكانا ابوي
هلا والله هلا بمريتي الحبابه الاصيله وين جنتي ولج وين وليتي ها احجي انا شنهي هنا لا عبالج كبرت وبعد ما كدرلج وحك العباس اطكج بلعوجيه عل يافوخج اطرج طر
