#من_حقي_نعيش

الحلقة الخامسة

#من_حقي_نعيش

لي #ابتسام_حمزة_المصراتي

الحلقة الخامسة (5)

مريم بعد ما روحوا ضيوفها اللي جايين يباركولها واللي سايرتهم وهي تضحك بالسيف وفي داخلها تبكي وما يعلم بيها الا ربي ..

خشت توضت وصلت ركعتين وقعدت تبكي وتدعي لربي انه يفرج علاها ويجبر بخاطرها ويعوض معاناتها مع الإعاقة ومع المجتمع خير ..
ويجمعها بالحلال مع احمد ويحنن قلب امه علاها وتوافق وترضي .. ودعت ان ربي يحفظلها احمد ويهون عليه الضغط .. لانها حست انه متضايق ولأن الكيد في هذا كله جاي عليه اكثر .. عالق بين نارين نار الام والبر بيها .. ونار الحب والوفاء بالوعد ليه .. !!

احمد عقاب الليل روح لحوشهم خش لداره طول لا كلم حد ولا شاف حد .. متضايق وحاله متلخبط من رفض امه و كسرة خاطر مريم ..
صلي صلاته و رقد ودمعته علي خده ..

وفي الصبح طلع للعيلة صبح عليهم وفطر لكن لا هدرز ولا ضحك زي عوايده .. متضايق ومتغشش ..

ممشاش لعمله هداك اليوم وقعد بالذمة باش يزيد يكلم امه ويحاول يقنعها بالعقل بالك تقتنع ..

وفي العشية استغل الفرصة لقاها مقعمزة في الجنان كالعادة تشرب في قهوتها جي طول قرب منها باس علي راسها و ايدها و قعمز جنبها ..

امه تأثرت من تصرف احمد هي قاسية معاه وهو قاعد مرضي والدين ..تأثرت لأنها تحبه و عارفاته يحبها و يموت فيها وميرضاش فيها شي .. قعدت تبكي .. وتقوله :-

يا وليدي شن بيقولو علينا الناس معقوله هكي تبي تاخدلي معاقة ؟؟ علاش يا وليدي معاش لقيت من تاخد !! كملوا البنات ؟؟
يا وليدي شن ناقصك انت زي الوردة ؟؟
اني نبي ناخدلك احسن وحدة وانت تبي تاخد معاقة علاش هكي يا وليدي علاش ترعش فيا ؟؟

احمد وهو يشوفلها متأثر..:-
يمة والله والله لو هي متستاهلش انها تكون كنتك او بتضحك عليك الناس والله والله ما ناخدها .. يمة والله البنت طيبة وبنت ناس وعيلة ومتعلمة وتخاف ربي .. يمة متعدليش علي كلام الناس يمة وشوفي لراحتي ..

وكمل قلها :-
يمة تعرفي مريم لما عرفت انك مش موافقة علاها تعرفي شن قتلي ؟ قتلي رد بالك ادير شي يغضب بوك وامك يا احمد .. ومسامحاتك لو سيبتني  !!

ام احمد كان رأسها لوطه قاماته وشافتله عجبتها لقطة مريم لكن مبتش تعترف وتقولها .. وقعدت ساكتة ..

احمد :- يمة قوليلي بالله عليك هي شن ذنبها انها معاقة قوليلي هي شن ذنبها بس !! مش حتي هي انسانة ومن حقها تعيش وتتزوج وتكون أم يمة !!

ام احمد :- هي معاقة مفروض تتزوج حد عنده إعاقة زيها !

احمد :- يمة ضامنة ان ميصيرش معاي شي ونبدي زيها ؟؟؟ راهو مش بعيدة عليا ولا علي اي حد يمة ..و لو انتي مرحمتيهاش مش حنلقوا من يرحمنا يمة  .. وبعدين مش قلتيلي مرة لو انت معاق ناخدلك صحيحة تخدمك !! علاش هي تبيها تاخد معاق زيها ؟؟ وبعدين هذا نصيب مش حني اللي بنفرضوا علاها هي من تتزوج كل حد بياخد نصيبه وهي تستاهل اني نتزوجها يمة .. و متاكد لو تعرفيها وتعاشريها متاكد حتحبيها اني متاكد ..!!