رواية عاهرة العباسية كاملة

الحلقة الثالثة

#عاهرة_العباسية

#noosa

الحلقة الثالثة

رفعت الكدوس وأنا مدنقرة الفضول خلاني أوديه علي خشمي ، وقبل ما يصل طرفه خشمي فجأة أحس لي بي يد في كتفي !

التفت بي خلعة كده لقيتو عمي ! .. أظنو كان دخل جوه يفتشني ..

- مالك اتأخرتي يا بتي ؟

- لالل لا (بقايا خلعة) بس نسيت لي حاجة ..

- خلاص أنا بشيل ليك الشنطة دي تقيلة عليك .

- لالل لا (بقايا خلعة) خلاص كويس!

..

قفلنا البابين (الصالون والبيوت) وربطناهم بي حبل عشان احتمال ناس أبوي يجوا ، ومرقنا الشارع ..

الساعة كانت عاملة ٩ مساء ، الشارع فاااضي لكن كان وااضح شديد لأنو القمرة كانت فوق راسنا طوالي .

أثناء ما ماشين عمي كان ساكت ما نطق ولا كلمة .

مسافة نصل بيت عمي حا أحكي ليكم عن عمي محمد ..

محمد عمي أكبر من أبوي بي سنتين تقريبا أو أكتر شوية ، رجع السودان قبل سنتين من بلد مهجره (أمريكا) كان شغال هناك طبيب، عندو ولدين (كمال و شادي) وبت واحدة (هدى) .

زوجتو اسمها سوسن من شندي مراه جميلة وبتهتم بي نفسها شديد .

عمي كان زول هادي شديد ما مجنون كورة زي ناس جيلو ، كان انسان كتوم وممكن في اليوم كله ما يتكلم ليه أكتر من ١٠ كلمات وكان متدين شوية ..

المهم ! .. وصلنا البيت والباب كان مفتوح ، دخلنا حوشهم الكبير ، كان كمال ود عمي قاعد ليه في كرسي في نص الحوش .. لمن شافنا قام علي حيلو وأظنه كان مخلوع شوية لأنو فضل واقف مساااافة في محله ما اتحرك ..

- تعال يا ولدي شيل الحاجات دي دخلهن غرفة أختك .

كمال اتحرك ومشى علينا سلم علي ورحب بي ، ونفذ كلام أبوه .

- أتفضلي يا بتي

دخلنا الصالون

- اتفضلي أقعدي

قعدت في الكنبة الكبيرة وعمي قعد جمبي طوالي ..

- طيب يا بتي عايزك تحكي لي كل البتعرفيه عشان أقدر أساعدك ..

ما عارفة كنت مطمئنة كيف وأنا جمب عمي ! لي درجة حكيت ليه كل شي .

أثناء ما بحكي عمي كان ساكت وبسمع بس وما قاطعني لحدي ما كملت كلامي كله ، بعد انتهيت من كلامي قال لي ..

- الكان مع أمك شفتيه وعرفتيه ؟!

- لالل لا (ارتباك) أنا ما شفتهم لكن سمعت صوتهم من بره .