رواية عاهرة العباسية كاملة

الحلقة الرابعة

#عاهرة_العباسية

#noosa

الحلقة الرابعة

دخلت المكتب واتقدمت على تربيزة الأستاذ ، وفجأة أسمع ليك الباب وراي قفل ، التفت بي سرعة لقيت ليكم الهوا عمل هجمة مرتدة على الباب وقفلو ، مشيت علي الباب كالونو كان قديم شوية ، لالا كان قديم شديد لأنو أبى يتفتح لي ، احتمال لأني ضعيفة ما بقدر الاويه واحتمال لأنو قديم عاصي ما بتلاوى ، لمن زهجت رجعت لي ورا عشان أشوف الباب من بعيد واديه نظرة عامة عشان ألقى طريقة أفتحو بيها ، وفجأة الباب ينفتح ..

يخش شيخ عبدالصمد !

- (بارتباك) استاذ كيفك ؟

- منو ؟! مهيرة ! (بي نظرة استغراب)

- آي كنت جاياك المكتب والباب قفل الهوا و ... (قاطعني)

- قصدك الهوا قفل الباب !

- (بي خجل) آي ده الحصل (بحاول أتماسك) .

- خلاص أتفضلي اقعدي .

قعدت في الكرسي الجانبي وهو قعد في كرسيو ..

في زمنا داك مكتب الأساتذة كان حاجة ما ساهلة دواليب كبيرة ، وترابيز مستوى فاخر ..

المهم بديت أتكلم ..

- كنت عاوزة أقول ليك انو أمس كنت ... (قاطعني)

- انتي جاية تعتذري من حصة أمس يا مهيرة !

- لل لا مم م م (ارتباك) بس كنت عاوزة اقول ليك انو أمس بيتنا كان فاضي ومفروض ... (قاطعني)

- ومفروض كان ترجعي بدري عشان تجهزي الغدا ؟!

- أأأ (ارتباك) آاي ممكن تقول كده ..

- ما عندك مشكلة يا مهيرة ممكن أشرح ليك الفاتك هسي أنا فاضي ، انتي فاضية ؟

- آااي فاضية ..

شيخ عبدالصمد شرح لي الفاتني في حصة أمس ..

أنا كنت مختلفة عن البنات التانيات كنت مغرورة شوية بي نفسي ، بالمناسبة أنا كنت الأولى في الفصل في كل شي تقريبا الا الأكاديميات كل البنات بحبني وبحترمني .

كنت ماسكة اشراف حصة الموسيقى ، طبعا نظام النشاط عندنا اشرافو بكون ذاتي يعني من الطلاب وفيهم (بربونا على المسؤولية وكده) ..

طبعا مرات بدك الحصة عادي لأني المشرفة أعمل العاوزاه ، لمن طلعت من مكتب شيخ عبدالصمد مشيت عليهن في فصل الموسيقى لقيت تلميذاتي أقصد زميلاتي بيتمرنن على العزف المنفرد ، أصلا ده العزف الوحيد البيقدرن يتمرنن عليه .

- حرااام عليك يا مهيرة نسيتي انو بكره عندنا عرض عزف منفرد ؟!

- واااي يا هبة نسيتو والله !