رواية عاهرة العباسية كاملة

الحلقة السادسة

#عاهرة_العباسية

#noosa

الحلقة السادسة

دخلت البيت الصالون كان فاتح مشيت علي الصالون عشان أسلم علي تاج الدين ، لمن دخلت الصالون وسلمت عليه ، كان عليه أثر الحزن ..

- البركة فيكم يا عمو ربنا يشفعو ليكم يوم القيامة ..

- البركة في أمة محمد يا بتي قدر الله وما شاء فعل .

- كيف هسع خالتو تماضر ان شاء الله كويسة ؟

- والله كويسة الحمد لله بس متأثرة شوية .

- ربنا يصبركم ويرزقكم الذرية الصالحة ان شاء الله .

- آمين يارب .. أبوك وين ؟ لسه ما جا ؟

- يعني انت ما عارفو مشى وين ؟!

طبعا أبوي أي حاجة بيعملها بوري بيها تاج الدين صاحبو ..

- والله يا بتي أبوك ليه يومين ما عندي منو خبر .. كدي انتي أمشي غيري ملابسك واغشي أمك قولي ليها انا ماشي ما تعملي حاجة ..

..

مشيت لقيت أمي بتعمل في الغداء كلمتها ، هي مشت على الصالون وانا مشيت غرفتي ..

استحميت وغيرت ملابسي ونمت لي ساعتين كده .. لمن صحيت مشيت علي غرفة أخوي لقيتو بيلعب ..

- اتغديتو ؟

- أااي ، أكلنا أنا وامي ، قالت لي قول ليها امشي المطبخ ختي ليك غدا واكلي ، قالت ماشة مشوار ..

- احححي أنا (ضجر) .

مشيت المطبخ وانا بفكر في أبوي ، ختيت الغدا وقعدت آكل ..

أبوي كتير بيطلع سفريات بي حكم عملو في التجارة ، في سفريات بتجيو فجأة كده بيمشيها لكن لو ما كلمنا نحن بكلم صاحبو الوزير بي كل شي ، المرة دي ما كلم زول .. وكمان خلا معانا مصاريف بتكفي ٣ يوم لو اتغشفنا يعني لو ما جا الليلة معناها عندو مشكلة .

بعد اتغديت مشيت وديت العدة و غسلتها ومشيت غرفتي أذاكر ..

..

مر اليوم داك والبعدو وأبوي ما ف خبر عنو لحدي تمت ٥ يوم وابوي ما جا والدكان بتاعو مقفل ..

.. في اليوم الخامس من اختفاء أبوي عمي كان عندنا في البيت هو وولدو شادي ..

عمي قال لي أمي تمش معاه عشان يفتحو بلاغ في القسم عشان يعملو اجراءاتهم ، أمي مشت جهزت وقالت لي خلي بالك من أخوك ووصايا الامهات المعروفة دي ، سوي كده واعملي كده ... الخ .

عدينا اليوم داك بي الصبر بس أخوي كان غلباوي ..

كنت مستنية ناس أمي يرجعوا والزمن كنت بحسب فيهه ثانية ثانية ، لمن أمي جات أخيرا بعد المغرب ناس عمي نزلوها وفاتوا طوالي ما قعدوا كتير ..