#معذبتي
🙈❤ نتمنا تعجبكم❤
❤البارت3❤
قعدت بجنب جدي ومتضايقه... بس لحظه شوي... علاش نشغل روحي بشن فكر فيا... مشكلته
انتبهت لصوت جدي:.. تبي اليوم تشري الاثاث أو لا
شربت من كوبي شوي:.. عادي... أصلا ماورايا شي انديره
ضحك وقالي:.. هههه أول يوم ليك... بس قوليلي... إنتي شن تشتغلي
كنت بنرد بس خش واحد من اعمامي وقال:.. معقوله بنت محمد تشتغل
ماعجبتني نبرت صوته... تقريبا هذا عمي خالد
رد عليه جدي:.. وشن فيها لو اشتغلت
قعد عمي خالد وحط رجل على رجل:.. يعني بتفهمني محمد صاحب الاراضي والمصانع بيخلي بنته المدللة تتعب
شفت في عمي وقلتله بنظرت تكبر:.. وشن ناقصني يعمي عن الشغل... عندي شهاده وعندي يدين وعندي عقل قبل كل شي
نزل رجله وتكا بيديه علي ركبته وابتسم على جنب:.. ما شاء لله وحته عندك لسان طويل... شكله دلعك واجد
ضغطت على الكوب وحسيت حرارته بس مش كيف حرارة الغضب من كلام عمي على أبوي
قال جدي:.. وشروق تستاهل الدلع والدلال... وأنا بنزيدها طول ما فيا نفس
تلفتت لجدي:.. إن شاء لله بطولت عمرك يجدي
قال عمي خالد:.. ماقليتي وين أوراق الخاصة بالممتلكات.... تعرفي بما أنه اخوك الله يرحمه... ماكان على تواصل معانا ماقدرناش نقسمو الورث تبع ابوك... وتوا دامك ماعنا فلازم كل حد ياخذ حصته
تضايقت من عمي.... هذا واخويا ماكمل نص سنه وجاي يتكلم عن الورث
قاله جدي:.. خالد مش عندك عمل
عمي خالد:.. عندي بس جيت نشوف الوضع عندك بس
وقفت وكنت بنخش للدار بس قلت ونا عاطيا ظهري ليهم:.. باتي قبل كم سنه كتب كل شي باسامينا... وأشرف أخوي نفس الشي بعد ما خش بالجهاز الأمني... شجل كل شي باسمي... يعني لو تبي حاجه من املاكي بيكون بعد موتي
قلت اخر جملة ومشيت خشيت للدار وصكرتها عليا من خوفي أنه يلحقني ويقتلني قفلتها مرتين.... ههههه مش عارفه منين جتني القوة هذي
♡
♡♡♡♡♡♡♡♡
كنت معصب وقلت لابوي:.. شفت ولد ولدك شن دار... مشجلها كل شي باسمها... هذي نهايت الخير بيد وحده صغيرة وطايشه وفوقها قليلت الأدب
رد عليا ابوي:.. شروق مش قليلة الأدب إلا مع من مايحترمها... وبعدين هذا حلال ابوها... وهوا كان حر بأنه يشجلهم باسامي اولاده
وقفت متنرفز من برود ابوي:.. بس يحاج إحنا لينا نصيب فيهم
قالي:.. خالد تعوذ من الشيطان وخلي بنت اخوك في حالها... هجرت محمد من سنين بسبت الفلوس وتوا تبي ادير نفس الشي في بنته
مشيت بنطلع بس قالي:.. انا حذرتك يخالد... إن تعرضتلها ماتلوم إلا روحك
طلعت وأنا بننفجر من عصبيتي... معقوله بعد هذا كله ونطلع ببلاش... حته وانت ميت يمحمد مابتهنيني
ركبت بالسيارة وطلعت من حوش أبوي
♡
♡♡♡♡♡♡♡♡
رفعت تلفوني وشفت جدي متصل عليا فرديت:.. ايوه جدي
جدي:.. السلام عليكم... وينك يولد
ضحكت وقلته:... ههه معقوله يحاج تقولي يولد... إن شاء لله بس مش جنبك حد... طيحت هيبتي هيكي
ضحك جدي وقال:.. هههه ولد بتقعد ولد... قول وينك
قلتله:.. شوي وراجع للحوش... توصي على حاجه
جدي:.. نبيك ترفعني أنا وشروق... نبي نأتتلها دارها... ويريت بدري
مش عارف علاش عصبت لما سمعت اسمها:.. لازم نا يجدي... شوف غيري
جدي:.. امبه... توا نشوف أنس
قلته بسرعه:.. لالا... أو انقولك... عشر دقايق ونكون عندكم... جهزو روحكم
جدي:.. إن شاء لله... مع السلامه
قلتله:.. مع السلامه
وقفلت الخط وغيرت طريقي للحوش
وبعد وقت وصلت وجا جدي وشروق ومشيت للمحلات
♡
♡♡♡♡♡♡♡♡
لبست بسرعه لما قالي جدي عن المشوار... كملت وطلعت ركبنا بسيارة بدر ومشينا
بعد وقت نزلنا وكانن المحلات بجنب بعض... وقعدنا من مكان لمكان... مافي شي حلو
خشينا محل وشفت جدي قعد وقال:.. خشو انتم شوفو ونا قاعد هنا
ضحكت ومشيتله:.. ههه تعبت صح... خلنا نرجعو للحوش
رد عليا:.. لالا... انتي تفرجي وأنا نراجي هنا... ومعاك بدر
لمحت في راسي فكرت إني نوضحله يلي صار اليوم
ومشيت لداخل وهوا ورايا كان... وبعد ما بعدنا عن جدي لفيت ليه وقلته:.. بدر أنت فهمت غلط... ترا انا مانعرفه أنس... وهوا يلي قدم لعندي وأنا كنت بنطلع بس مع خشتك أنت
كان يشوف فيا بلا أي تعبير... لف وجها يشوف في الاثاث... وانا قدمت لعنده:.. بدر رد عليا... والله مادرت شي... وانا
لف وجها ليا وقال:.. ليش قربتي بجنبي... مش أمس بديري فضيحه لأني خشيت للدار عليك... وتوا شن... تستخدمي في طريقت الاغراء نفسها يلي استخدمتها مع أنس
كنت مصدومه منه وتلقائيا ضربته كف وأنا معصبه منه:.. احترم نفسك... مش انا يلي نستخذم في طرق رخيصه عشان نجدب حد ليا... وواضح إنك سمعت منه بدون ما تسمع مني... بس تعرف ... كويس لأنك وريتني تفكيرك كيف... أنت وولد عمك الحقير
ومشيت وخليته واقف مصدوم مني
وصلت لجدي وقلته:.. خلاص يجدي... أنا تعبت ونبي نمشي للحوش
وقف جدي ومسك يدي:.. توكلنا على الله
مشينا للسيارة وعلى طول للحوش
♡
♡
♡♡♡♡♡♡♡♡
بعد يومين من اخر مرا صار حديث بينا... أو بالأصح من سمعتني كلامها بعد الكف يلي جاني... صحاني كويس وانتبهت شن قلتها... من حقها تصفعني
وأنا المفروض ركزت في الموضوع كويس... لانه فعلا أنس المفروض مانصدق كلامه
نزلت مستعجل من فوق بنمشي لشغلي... بس سمعت صوت بالمطبخ ومشيت خشيت
لقيتها واقفه بالمطبخ وعاطيتني ظهرها فقلتها:.. صباح الخير
طاحت الطاسه من يدها من خلعتها بيا
مشيت عشان نساعدها بس وقفتني مكاني:.. حدك... ماتقربش مني
قلتها:.. خليني نلمها... أنا خلعتك والمفروض نلمهم
بس هي نزلت وبدت تلم في القطع المتكسره
فقلتها:.. عجبك الاثاث تبع دارك... جدي قالي نختار بدوقي لأنك ماتبي تطلعي
رجيتها ترد بس ما قالت شي
فقلتها:.. معليش لأني فكرت فيك بطريقه خطا
ولا تعليق
ناديتها:.. شروق تسمعيني
لفت بعصبيه وقالت:.. كل واحد يمشي بحاله... لا نتعرضلك ولا نحاسبك على شي... ولا انت تتعرضلي ولا تحاسبني على شي... يريت تمشي وتخليني
قدمت لعندها وهمست:.. للدرجه هذي كرهتيني يعني
سكتت وكانت مصدومه... وانا نفس الشي... مش عارف شن صار
نزلت راسها ولفت عني
قلتها:.. أنا اسف... بس أنا... قصدي
سكتت لأني ماعرفت شن نقوللها
قالت:.. شربت حاجه او نحسبك معايا
ابتسمت وارتحت أنها مشت الموضوع... قعدت على الكرسي وقلتها:.. شن فيه... لأني طلعت مستعجل وماشربت شي
قالتلي:.. أنا درت نسكافي... تبيه بحليب أو لا
قلتلها:.. حطيلي بالحليب
وشوي وجابتلي الكوب واعطاته ليا:.. شكرا
واشرتلها بالكرسي على نفس الطاولة:.... تفضلي
قعدت وارتحت أنها ماردتني:.. الحق نبي نتاسف على الكلام تبع يومها
قالتلي:.. بدر صكر عليه... خلاص
ابتسمت وشربت من كوبي:.. امممم حلو النسكافي
ابتسمت وقالت:.. أخويا اشرف الله يرحمه علمني... كان يحبها واجد
قلتلها:.. الله يرحمه
قالتلي:.. الدار حلوا... وذوقك حلو... شكرا تعبتك
ابتسمتلها:.. لا عادي ولا يهمك
حبيت نكسر الحواجز بينا فقلتها:.. شن تعرفي تصلحي غير النسكافي
فنصت فيا وقالت:.. شن قصدك
ضحكت على نضرتها:.. هههه لو اخوك معلمك يعني ماتعرفي تطبخي... لأنه اضن أشرف مايعرف
ضحكت... وأنا سحرتني بضحتكها وقعدت نتامل فيها
لما انتبهتلي تحشمت... وتورد وجها... زادت من حلاتها
قالتلي:.. ماتاخرت عن شغل
هههه حلوا التصريفه هذي
وقفت ورفعت الكوب معايا:.. نستاذن معناها
وقفت وقالتلي:.. ربي يحفظك
ابتسمتلها وطلعت
♡
♡♡♡♡♡♡♡♡
طلعت للصالة بجنب جدي:.. جدي مليت من الحوش نا
ابتسملي وقال:.. شن رايك اليوم نمشو لاحياش اعمامك... تشوفيهن وين... وبعدها نمشو للمزرعه
فكرت شوي وقلتله:.. عادي
وقعدنا نهدرزو في مواضيع واجده.... ويضرب تلفوني وكانت مروة ورديت:.. أهلا... عاش من سمع صوتك
مروة:.. إيه اضحكي عليا... لوتبي تسمعيه كان اتصلتي
ضحكت وقلتها:.. هههه والله انشغلت... شن جوك
مروة:.. الحمد لله... بس اشتقتلك
رديت عليها:.. حته أنا والله اشتقتلك واجد
مروة:.. ماتفكري تجي تزورينا
شفت في جدي وقلتها:.. لو جدي سمحلي نجيكم فأكيد
شفته هز راسه بمعنا عادي
فقلتها:.. هههه هوا اعطاني الاذن توا... بمجرد ما نحصل فرصه نكون عندك
فرحت مروة:.. ونا نراجي على احر من الجمر
قفلت بعد فتره منها
قالي جدي:.. هذي جارتك صح... يلي كنتي عندهم
تنهدت وقلته:.. ايه هيا... وكانت خطيبة أشرف
جدي:.. الله يرحمه
سمعت صوت من جيهت الباب ولفيت عليه... وكان أنس
أنس:.. السلام عليكم
رد عليه جدي:.. وعليك السلام
اما أنا وقفت بنخش للدار بس قال أنس:.. وين يبنتي عمي... وهذا احنا جيناكم ضيوف
كنت بنرد عليه بس خشت ثوريا من وراه:.. السلام عليكم
استغربت ليش كانت معاه
خشت لجدي وسلمت وبعدها جت لعندي:.. وين ماشيه ونا جايتك
قلتها:.. وين مدرستك
قالتلي:.. اليوم عطله قالو
فنصت فيها:.. أكيد أو هربتي
قالتلي:..خلينا نخشو لدارك
وخشينا للدار
♡
♡♡♡♡♡♡♡♡
بعد ما خشت شروق وثوريا نا مشيت لجدي وقعدت بجنبه
فقال جدي:.. أنس شن اخبار الحقل في المزرعه الجنوبية
قلتله:.. الحمد لله... كل شي تمام
جدي:.. الحمد لله... والاهلك كيفهم
رديت:.. كلهم تمام ويسلمو عليك
سكتت شوي نستعد لترتيب الكلام وقلتله:.. يجدي نا نبي نطلب منك طلب
جدي:.. قول... نسمع فيك
اخذت نفس:.. نبي نطلب منك شروق تكون زوجتي
سكت جدي ولا قال شي
فقلتله:.. سكوتك علامت القبول يعني
فقالي:.. انت متزوج هذا شي... وبعدين كانك كبير عليها
حسيت بخيبه الامل:.. لا مش كبير.. فرق 10 سنين تقريبا... عادي
قال جدي:.. مانبي نضلمها معاك... انت متزوج... اهتم بنسوانك وصغارك وبس
قلتله:.. يجدي منين تضمن يجيها واحد كويس... على الأقل أنا قريب... ونخليها عايشه معاك... نصلح دار لينا هنا... ويوم مانكون عندها... قعده معاك.... أو تبي حد من برا ياخذها... وبعدين يجدي بترضا تبعد عنك وانت توا لقيتها
شفت جدي ساكت ويفكر... شكلي بديت نقنعه:.. وولد عمها اولا بيها من الغريب
قال جدي:.. اعطين فتره نفكر... ونقوللها ونشوف رايها
قلتله:.. يجدي هي ماتعرف مصلحتها... لو انت قبلت اعطيها خبر
وقفت عشان ما يعترض وقلتله:.. بعدين بنمر نرفع اختي
قال جدي:.. مافي داعي... لأنه إحنا بنمرو عليكم
قلتله:.. وشروق معاك
جدي:.. إيه
قلتله:.. تمام معناها
وطلعت مشيت للسيارة
رفعت تلفوني واتصل:.. سلام يبوي
رد عليا ابوي:.. وعليك السلام... شن صار
ضحكت وقلته:.. أنا ولد خالد شن بيصير... أكيد بندير يلي نبيه... ولو مش بالساهل... بنستخدم الصعب
ضحك ابوي وقال:.. هههه ماتشغلني الطريقه... المهم تكون انت متزوجها... والأملاك تجيبهم ليا
ابتسمت وقلته:.. والله ماتخايلت النتفه هذي عندها كل الخير هذا... بس حناخذهم يعني حناخذهم
♡
♡♡♡♡♡♡♡
طلعت من شغلي العصر... المشكله كانت اليوم في تفكيري وخلاص
وصلت للحوش ونتمنى إني نلمحها بس
لاكن مافي صوت بالحوش غريبه:.. يجدي... يأهل الحوش
طلعت تلفوني واتصلت على جدي:.. السلام عليكم... جدي وينكم
رد عليا صوت بنت:.. حوش عمي خالد
استغربت:. من معايا
قالت:.. نا شروق
ابتسمت... يعني ماشفتها بس سمعت صوتها:.. من بيجي يروح بيكم
ردت عليا:.. أكيد عمي ناصر... لأنه هوا جابنا
طلعت من الحوش وقلتها:.. توا نجي أنا.... سلام
قفلت منها وركبت بسيارتي مسافة الطريق ووصلت لعندهم
نزلت وحاس روحي فرحان مش عارف علاش... بس المهم نشوفها
كنت بنخش داخل بس لمحت أنس من جنب الحوش... فكرت نمشي نواجها بالكلام يلي قاله ليا عن شروق
فلحقته لجنب الحوش... ووقفت مصدوم من يلي شفته
كانت شروق بين يديه... في حضنه... معقوله
اعطيتهم ظهري ومشيت وأنا نحس في روحي نغلي من داخلي
ركبت السيارة وقعد نفكر في يلي شفته وشغلتها ومشيت بدون ما نقول شي ولا ندير شي... بس حسيت بوجع في نفسي
ليش يبدر في شن كنت تفكر... ضحكت على روحي كيف إني غبي... يعني قدرة تضحك عليا بتمثيلها عليا... وأنا بنيت لاحلام بعيده... مجرد اعجاب عابر... وحننسا مع الوقت أكيد... أكيد حننسا
♡
♡♡♡♡♡♡♡♡
قفلت الخط من بدر وكنت قعده برا عشان جدي قالي اطلعي كلميه برا... التغطية كانت ضعيفه شوي لأنه حوش عمي بمنطقه فيها خلل بالشبكة
شفت ولد صغير يجري لجنب الحوش ولحقته
ناديته:.. وقف يبابا
وقف العيل ومد بوزه ليا:.. ماتقوليلي بابا... انا سالم
ضحكت ونزلت ليه:. اسفه يسالم... من هوا ابوك به
قالي:.. بابا أنس
انصدمت أنه أنس عنده ولد بعمر 6 سنين تقريبا
شفتها حافي:.. ليش حافي الرجلين... وين كندرتك
اشرلي من خلف الحوش:.. قعده ورا... توا نجيبها.. بس مانعرف نلبسها
قلته:.. جيبها وأنا نلبسها ليك
ومشى سالم ووقفت نراجي فيه... انسجمت بتلفوني ونسيت أنه تاخر عليا
وفجأة حسيت بحد يلفني ليه ويحضني
وقفت مصدمومه وانربط لساني... حاولت نبعده عني بس شدني اكثر
ولحظتها تذكرت كل الحركات يلي تعلمتهم من اخويا
ضربته بين رجليه وفي بطنه ولما بعد من الوجع وطاح على ركبته شفته أنس زاد غضبي وضربته بوجها لدرجة كسرتله خشمه:... يحقير يتافه... شن تحاسبني
كان يتوعج ولا قال شي... ضربته برجلي على ومشيت لقدام الحوش
كنت متنرفزه منه ومن حركته... بس شفت سيارة بدر طالعا من الحوش... ليش مشا... مش معقوله جدي يمشي ويخليني
وفجاة خطر ببالي يكون شافنا... حسيت بخوف من فكرت أنه يكون شافني... بس أنا مالمحته
طلعت تلفون جدي وبدا قلبي يخبط بسرعه وضربت عليه
مرا... اثنين... ورد اخيرا:.. الو
حاولت نهدي روحي:.. قالك جدي وينك تاخرت
رد عليا:.. قوليله مش جاي... طلعلي شغل
وقفل عليا
دمعت عيوني... أكيد شافنا... بس أكيد ماشافني نبعد فيه عني أكيد
سمعته أنس ورايا:.. هههه صار مشا وخلاك... المفروض ماتحلميه بيه... وأنا يلي بناخذ في الاخر
وقفت مصدومه منه... يعني هوا خطط لشي هذا
يتبع....
