#معذبتي
🙈❤ أسفه على التاخير❤
❤البارت 5❤
بدر...
فتحت عيوني بصعوبة من قوة الضي... كنت نسمع في صوت:... بدر... بدر... تسمعني يبدر
هممت بس لأنه حلقي جاف:.. اممم
حسيته مسك يدي وقال:.. الحمد لله على سلامتك يبدر... خلني نكلم أمك ونطمنها... كل شوي تتصل عليا تسأل
واختفا الصوت.... حاولت تاني نفتح عيوني وبدت الصوره توضح ليا... خذيت نفس نجدد الهواء برئتي
شوي وشفت أبوي عندي وابتسملي:.. كيفك توا
هزيت راسي بس... وفجأة تذكرت شن صار... وبديت نتلفت يمين ويسار بس بشوي... ماشفت حد غير ابوي معايا... فحاولت نتكلم:.. شش شرو ششروق
طبطب على كتفي وابتسم:.. كويسه والحمد الله... الرصاصة ما جتها في مكان خطير
انصدمت من يلي سمعته... كيف تصاوبت هي
حاولت نقوم بس حسيت بوجع
وحاول ابوي يمنعني:.. وين ماشي... لازم تقعد يوم كامل على الأقل متسطح
اشرتله على حلقي يوجع وفهم عليا... جابلي شوي مية وقال:.. مايصير تشرب واجد... شوي بس بل بيه حلقك
اخذت نفس وحاولت نتكلم ثاني:.. نببي... ننشوفها
قالي:.. يولدي والله أنها كويسه... وتوا راقده
هزت راسي برفض:.. ببنشوفها
رجعني على السرير وقالي:.. توا نجيبلك كرسي وواحد يساعدك... خليك بس
وطلع ابوي وانا نفكر اني سبب في يلي صار معاها... لو إني منعتها ولا خليتها تجي معايا... ماكان صارلها شي
لحظات وخش ابوي مع ممرض بكرسي متحرك
ساعدني نقوم وحطني على الكرسي
وابوي بدا يدفع فيا وقال:.. الرصاصه جاتك بكتفك... والثانيا مرت من فخذك والحمد لله ماضربت في العظم... بس بتكون حركتك صعبه شوي
قلتله:.. ووشروق
قالي:.. علاش مهتم بيها واجد
مارديت عليه مش لأنه ما عندي جواب... بس الاجابة تبي طاقه كبيرة مني ونا حاس بتعب
كمل وقال:.. جتها رصاصه ببطنها بس ما دارت ضرر واجد... لأنها كانت خفيفه... ويلي فهمته أنه الرصاص عدت من جسم يلي قطعو عليكم الطريق وخشت فيها
انا هن تذكرت لما خلاته درع ليها
وصلنا لحجرتها وفتح الباب ودخلني لغاية ما وقف بجنب سريرها
حسيت براحه مش طبيعية لما شفتها... مديت يدي السليمه ومسكت يدها وكانت بارده
ماقدرت نتكلم وابوي بجنبي
♡
♡♡♡♡♡♡♡♡
شروق...
حسيت بلمست يد وحاولت نفتح عيوني... رجعت غمضتهم وفتحت ثاني... شفت بدر قدامي وكان وراه عمي ناصر
ابتسمت براحه أنه بدر كويس وضغطت على يده يلي كانت متمسكه بيا ورجعت رقدت
بعد فتره سمعت دوشه بجنبي... فتحت عيوني بس مالمحت حد فحاولت نتكلم بس ماقدرت وطلع أنين بس:... اممم
وقفت على راسي حلا:.. اخيرا يالاميرة النائمة... تعرفي أنه ليك يوم كامل راقده
حاولت نتكلم بس ماقدرت واشرتلها نبي نشرب
جابلتي ميه وشربت
حلا:.. يحركات انتي... ماصدقنا لما حكالنا بدر إنك تعرفي تصوبي كويس... لازم تعلمينا
ابتسمت وهزيت راسي بتأيد:.. كككيفه... جججدي
قالتلي:.. الحمد لله... بس ماخبرناه... قال عمي لما تتحسنو وقتها يقوله
ابتسمت ورجعت غمضت عيوني
♡
♡
♡♡♡♡♡♡♡♡
بدر...
بعد يومين طلعنا إحنا الثلاث من المستشفى... أنا وجدي وشروق
عاتبنا جدي ليش طلعنى بالليل... وقال المفروض قعدنا للصبح بجنبه
وانمسك يلي هجمو علينا... واحد مات طبعا يلي كان قريب منا والزوز كانو مضروبين وانمسكو لما مشو للمستشفى يتعالجو
نزلت من السرير ونحس في روحي احسن... لبستلي بدلة رياضية لأنها اخف بالحركه معايا
طلعت من داري ومشيت للدروج ونزلت شوي شوي لين وصلت للصاله تحت عند جدي
شافني جدي وابتسملي:.. السلام عليكم... ها كيف تحس توا
رديتله الابتسامه:.. أحسن والحمد لله
قدمت وقعد على صالو وتنفست براحه إني وصلت
قالي جدي:.. بما انك وصلتلي... فخليني نقولك عن الشي يلي قررته
قلته:.. نسمع فيك
كان يحرك في السبحه بين يديه... حطها وشاف فيا وقال:.. نبي نطمن على شروق قبل لا نموت
قلتله:.. بعد عمر طويل إن شاء لله
ضحك وقالي:.. هههه كم تبيني نوصل يعني... ما انا عشت واجد
قلته:.. لغاية ما تشوف صغاري وصغار صغاري
ضحك جدي قال بعدها:.. أنس تقدم لشروق... والحق أنا فكرت فيها... يبقا القريب أحسن من البعيد... على الأقل هيا قاعده بين ناسها
أنا حسيت بالغيرة الصراحه... مانعرف امته حبيتها أصلا عشان نغار عليه... بس تفكيري حاليا إني مانبي نشوفها مع راجل غيري
قال جدي:.. شن رايك به
قلتله:.. يجدي هي صغيره... وتبي تخليها الضرة الثالثه ليش
قالي:.. أنس بيخليها عايشه معايا... بيصلح دار ليهم هنا... ووقت مايكون مع نسواه ... هي قاعده عندي
وقفت وقلتله:.. انت فكرت وقبلت بالموضوع... لأنه من كلامك واضح الاقتناع... ليش تاخذ في رأي
قالي:.. وانا نبي نسمع رايك ونشوف من المنطقي أكثر
هزيت راسه وطلعت بلا أي كلمه زيادة
♡
♡♡♡♡♡♡♡♡
شروق...
كنت بداري ومعايا حلا وثوريا
حلا:.. قال الدكتور الرصاصه شوي وسببتلك عقم
ابتسمت وقلتها:.. الحمد لله عدت على خير
ثوريا:.. اششش... جاني اتصال مهم
وردت على تلفونها بدلع:.. الوو... لالا... حوش جدي... بأي وقت.... أوكي
وقفلت التلفون وكانت فرحانه
رفعت حاجبي وقلتها:.. مع من الكلام الهادي والناعم هذا
ضحكت ثوريا وقالت:.. واحد
كشرت حلا وقالتها:.. من هوا... خطيبك أو زوجك وإحنا مانعرفو
ضحكت ثوريا:.. هههه لا هذا ولا هذا... عبارة عن تمضيت وقت وبس
قلتها:.. إنتي في أول مراحل الثانوي... يعني صغيرة
وقفت ثوريا وتوجهت للباب بتطلع وقالت:.. لما نندم ونجي نبكي ماتردن عليا... وقولن إني نستاهل الشي هذا... أوكي
وطلعت ثوريا وأنا مستغربه فيها
سألت حلا:.. من قبل هي هكي
حلا:.. لا... بس من خشت الثانوي وتعرفت على بنات تغيرت
تنهدت من تعبي وحاولت نرجع نرقد
بس قالت حلا:.. قصدك بترقدي
قلتها:.. ايه نعسانه شوي
حلا:.. بهي اعمامي وامي بعدين بيجو... جدي عازمهم... وقال يبيهم في شي ضروري
قلتها:.. بعد يوصلو تعالي قوليلي
وسكتت بنرقد وهي طلعت تخليني نرتاح
♡
♡♡♡♡♡♡♡♡
أنس
كنت بسيارتي وبجنبي أبوي:.. تعتقد بيوافق عليا
قال أبوي:.. وليش يرفض
رديت عليه:.. اول سبب إني متزوج
قالي:.. طلع الافكار السلبيه ونخلي المكتوب يصير
بعد دقائق وصلنا... وجا عمي ناصر وعمتي وردة
اخر واحد خش بدر وكان مع جدي
قعد جدي وقال:.. كيف صحتكم
ردو عليه باصوات متفاوته:.. الحمد لله
وقال جدي:.. طبعا نبي ناخذ رايكم في موضوع... ماحبيت ندير شي بدون ما نعطيكم العلم
قال عمي ناصر:.. أن شاء الله خير بس
كمل جدي قال:.. بنزوج شروق لأنس... فيه حد عنده اعتراض
قعدت نراجي نشوف ردات الفعل... وبالاخص بدر شن بتكون
كمل جدي:. بنخلي الفرح بعد شهر... كويس
ردو عليه أنه عادي
بصراحه فرحت... أول شي لانها حلو البنت... وثاني شي فلوسها أحلا
كمل جدي قال:.. بس مابيكون كبير... أنا بنعزم ناس محدوده... اخوها متوفي قريب وأكيد بترفض الحفله
قلتله:.. مش ضرورية الحفله
وقف بدر وطلع... انا شاك يكون بينهم شي... حكم عايشين بنفس الحوش... بس الأكيد بتكون ليا
♡
♡♡♡♡♡♡♡
بدر....
طلعت من المربوعه بشوي نمشي بسبب وجع رجلي... في نهاية الممر لمحت شروق.. معقوله سمعت
لحقتها وأنا ننادي عليها:. شروق.. يشروق وقفي شوي... عارفه رجلي تعبانه
وصلت لباب دارها ووقفت
قربت لعندها وناديتها بهمس:.. شروق
شفت اهتزاز كتوفها دليل أنها تبكي بس بصمت
قلتها:.. شن يبكي فيك... قوليلي
قالت من بين شهقاتها:.. ليش جدي بيزوجني هذا... أنا مستحيل نرضا بيه... ولا حته باحلامه... قوله جدي نقعد بلا زواج احسن من يكون هذا زوج ليا
حزنت بحزنها وفعلا الموضوع صعب... وشخص زي أنس... انا ولد عمه وأحيانا نتمنى نضربه
قلتها:.. ماتعرفي شن الخير بالموضوع هذا... يمكن يتغير بمساعدتك
هزت راسها برفض:.. مانبيه... مانبيه... مش غصب هوا... نكره ولا نتحمل حته اسمه
وجعني قلبي عليها ولا عرفت نرد عليها
فتحت باب دارها وخشت وصكرتها
لفيت بنمشي... بس سمعت صوت الباب انفتح ثاني... لفيت على بالي تكون هيا. بس طلعن بنات عمي
قربت ثوريا وقالت:.. خيرها شروق تبكي... حته أنها طردتنا من دارها
ابتسمت وقلتها:.. اخوك بيتزوجها وهي رافضه
استغربت وقالت:.. قصدك عادل
هزيت راسه بنفي وقلتها:.. أنس
شفت الصدمه بوجها أكبر وتحولت لغضب:.. ليش يبي يتزوجها... حيظلمها وبس... هذا مش قد مسؤولية بكل... يتزوج ويطلق بكيفه... على باله بنات الناس واجدات
استغربت كيف شاطت غضب من اخوها:.. يعني إنتي رافضه زواجهم
قالت:.. طبعا رافضه وغلط كبير
قلتها:.. هذيك المربوعه... امشي اقنعيهم
ولفيت عنها مشيت للدروج بنمشي للحوش
♡
♡♡♡♡♡♡♡
شروق...
لما عرفت اعمامي وصلو فكرت نسلم عليهم
بس وقفت قدام المربوعه لما سمعت((بنزوج شروق لأنس ))
بعدت عن باب المربوعه وقعد نمشي بشوي ونفكر ليش جدي قرر... ليش ما سألني
وسمعت بدر ينادي بإسمي زاد وجعي... انا نعترف إني معجبه ببدر
كملت كلامي وخشيت للدار نكمل البكي... بس استلمني حلا وثوريا:.. خيرك... من يضايقك... شن يوجعك
فقلت:.. ممكن تخليني بروحي... نبي نقعد بروحي
وفعلا طلعن وقعدت نبكي على يلي صار... ليش حكم عليا جدي هكي
♡
♡
♡♡♡♡♡♡♡♡
بدر...
مر أسبوع وأنا مالمحتها حته شوي... نبي نشوفها ونطمن عليها... حاس بوجع بقلبي... نبي نشرحلها الموضوع ووجهت نظر جدي يمكن تروق شوي بس هي ما عطتني مجال نهائيا
خذيت دفاتر المبيعات والديون تبع المشروع الزراعي حق جدي ونزلت لتحت
مريت من جنب الصالة وشفت جدي فخشيت لعنده:.. صباح الخير يجدي
شاف فيا:. صباح الخير
قلتله:.. شفتها شروق
هز راسه بنفي:.. لا... تطلع للمطمخ وترجع تحبس روحها بالدار... نصادفها نبي نكلمها ماتعطيني فرصه... خايف تزعل مني على طول
تنهدت وقلتله:.. شن الحل توا وانت اعطيت خبر عن الفرح للناس... يعني مش منطقي تقول أنكم لغيتوه وهوا ولد عمها
رفعلي راسه وشفته تعبان ومتضايق:.. ماتوقعتها بترفض
لفيت بنمشي وقلته:.. يمكن شافت عليه شي عشان ترفضه... حاول تفهم منها
قال:.. لو أنها رضت تفتحلي
طلعت من الحوش ويكون هذا اليوم تكملت الأسبوع بدون ما نشوفها
♡
♡♡♡♡♡♡♡♡
شروق...
وقفت بجنب نافذة داري... من حظي أنها على الساحه الخارجية
شفته وهوا يركب سيارته... ابتسمت وارتحت
من يوم عزلت روحي عنهم نوقف نشوفه يرجع ويطلع... لو أنه هوا المتقدملي كنت رضيت وفرحت زياده حته لو جدي ماخذا رأي... بس أنس هذا
رجعت لسريري وأنا حاسه بملل... أسبوع قعده بالدار... كانت حلا وثوريا يونسني في بعض الأحيان
سمعت جدي على الباب بعد ما دق عليه:.. شروق يبنتي
والله إني اشتقتله ونبي نقعد معاه... بس لازم يعرف إني رافضاته رفض تام
قالي جدي:.. يبنتي أنا كبير في العمر وعندي السكر... زعلك عليا هذا يتعب فيا
دمعن عيوني وماقدرت نتحمل اكثر ومشيت بسرعه فتحتله وحضنته
ضمني ليه ومسح على رأسي وقال بحنيه:... كيف هنت عليك تخليني أسبوع بدون ما نشوفك
ماقلت شي... قعدت نسمع في عتابه ليا وبس
قالي:.. أنا مانبي إلا تكوني بجنبي... وأنس بيخليك عندي... يعني بيكون ليكم دار هنا
قلتله:.. يعني انت رضيت عشان نكون بجنبك وبس
قالي:.. عارف إني اناني... بس أنا لقيتك بعد العمر هذا... مانبي حد غريب ياخذك
تقبلت الموضوع شوي لأني بنكون بجنب جدي
فقلته:.. موافقه معناها
قالي:.. إنتي شفتي عليه شي لين رافضه ارتباطك بيه... أو عشان متزوج
قلتله:.. زواجاته مادخلني فيهم... بس هوا ماكنت نبيه لأني مانبيه... مانحبه
ضحك جدي وقال:.. هههه اكيد ماتحبيه توا... بس مع الوقت تحبه
سكتت ولا قلت شي... لأنه نحس قلبي بدا يحب بدر... و مش أنا يلي نمشي لعنده ونقوله إني نبيه... بما أنه ماعنده مشاعر ليا... مش حنحشم روحي... ونرضا بأنس... صح أنه حقير معايا... بس يمكن يتغير زي ما قال بدر
♡
♡♡♡♡♡♡♡♡
أنس...
مرن اسبوعين وخاش في الأسبوع الثالث... نهايت الأسبوع هذا بيكون العقد... الأسبوع الثاني الفرح
ماكنت متوقع أنه بيكون بالسهوله هذي
كنت واقف على درج بداري نطلع في بعض اوراقي لأنه اليوم بنمشي ندير التحليل... وسمعت من ورايا:.. كم بيدوم زواجك هذا
لفيت وشفت نوره... زوجتي الاولة:.. ليش بيكون فيه مدة يعني
ابتسمت وقالت:.. لأنه الزوجه الثالثه عندك متغيره... أو بتغير المرا هذي عشان أنها بنت عمك
رجعت نطلع باقي الاوراق وابتسمت وقلتها:.. لما نوصل لطلبي وقتها نخليها
قالت:.. حتندم في يوم من يلي ادير فيه... خاف على بناتك لو مش خايف على بنات الناس... يمكن يجيها واحد نفسك
قلتلها:.. ترجع لحوش أبوها... وأنا نستقبل بنتي
وطلعت من جنبها... بس رجعت طبعت بوسه على خذها سريعه وطلعت وأنا نفكر في يلي بنربحه
ركبت سيارتي وطلعت تلفوني واتصلت على بدر... هههه نحب نذكره إني بنتزوجها... نحس فيها يضايق... بصراحه هوا الغلطان لأني متأكد لو قال يبيها بيوافق جدي عليه
رد عليا:.. ايوه نعم
قلتله:.. نبي نتاكد أنكم بالمستشفى
قالي:.. إيه توا جبتها مع جدي وشوي بيجي دورها
ابتسمت وقلتله:.. بدر ليش ما باركتلي... أو مش عاجبك أنا نكون زوجها
قالي:.. وقت يكون العقد قدامي واسمك جنب أسمها وقتها نباركلك
ابتسمت وقلته:.. اوكي... موعدنا بعد يومين
بدر:.. تبي شي تاني أو خلاص
قلتله:.. لا سلامتك
صكر الخط بوجهي... ههههه
♡
♡♡♡♡♡♡♡♡
بدر...
قفلت بوجها وأنا معصب منه... قاعد يحرق في دمي
شفتها طلعت من الحجرة يلي انسحب فيها عينه من دمها
قعدت بكرسي بعيد عني بكرسيين وقالت:.. وين جدي
قلتها:.. رفعته يدير فحوصات... قلت فرصه بما أنه إحنا بالمستشفى
قعدت ساكته فسالتها:.. إنتي موافقه على أنس
كنت راجي في اجابتها وخايف منها
قالت:.. بما إني بنكون مع جدي في نفس الحوش ليش لا
ماعطتني جواب واضح:.. سؤالي إنتي لنفسك موافقه عليه
سكتت وكانت تفرك في يديها على بعض من توترها... قعدت نشوف في يديها ولمحت دمعه طاحت علي يدها
رفعت عيوني بسرعه ليها وشفت وجها أحمر وتحاول تمسك روحها لا تبكي
وقفت وقعدت بالكرسي جنبها وقلتها بهمس:.. قولي إنك رافضته وأنا نوقف بوجهم كلهم... بس إنتي قوليها
وقفت وقالت وهي تبكي:.. أنا نراجي فيكم بالسيارة
ومشت وخلتني... نبي منها بس كلمه... ونقلب الدنيا كلها... بس كلمه يشروق
يتبع....
وأي وحده تدور جزء ضاع منها موجود على صفحتي الشخصية
