#معذبتي
❤❤البارت 11❤❤
شروق....
رجعلي خالي وقال:... انا ماكنت نبي ندخل في حياتك ولا شي... ومن الاخر وبكل صراحه أمس جا لعندي واحد وحكالي إنك تزوجتي غصب بسبت بياخذو أملاك ومن الكلام هذا... كنت بنطنشه بس قالي أنه عندي حصه فيهم... أنا فهمت أنه يبي يخرب حياتك... في الأول بنعترض على مساعدتك بس تذكرت أختي مرا قالتلي لو صارلها شي تبيني نكون سند لأولادها... وكان الكلام هذا قبل أسبوع من وفاتها... فقلت نمشي على تخطيط الشخص يلي جاني... ونساعدك... وقلتله إني بناخذ حصتي وغصب عنهم... بس أنا يبنت أختي مانبي شي منك... نبي راحتك وبس
كنت نسمع فيه وفرحانه بكلامه... كتبلي أخويا أنه عائلة أمي ماتبينا... بس خالي توا يقول في شي ثاني
قلتله:.. بهي يخالي علاش قبل ماشفناكم... علاش قطعتو فينا
قالي:.. تبي الحق... ماكنت نبي اختي تتزوج أبوك... حته السبب مش عارفه... بس هكي مانبيه
نزلت دمعتي لأنه توا بدا الاعتراف:.. وشن فرقت توا... يعني حق ماتبي مني شي
قالي:.. والله أنه حالي كويس والحمد لله... ومانبي منك إلا تقعدي عندي عشان أنا نبي نعوضك... ونبي نكفر عن ذنبي في قطيعتي قبل عنكم
مسحت دمعتي وقلت:.. بس أنا نبي نرجع لبدر... هوا راجلي
رد عليا:.. هوا يبيك يعني
قلتله:.. إيه يبيني
ابتسم على جنب وقال:.. حنرجعك ليه بس مش توا... لازم يتبت أنه فعلا يبيك ومتمسك بيك... وقتها نكون مرتاح ونرفعك بروحي ليه
خفت من ابتسامته هذي وقلتله:.. لشن تفكر يعني
وقف وقالي:.. بعدين نقولك
وطلع وخلاني... خفت من الابتسامه هذي يكون وراها شي كبير... يعني لشن يفكر خالي
شفت حسن ماشي ورافع بيده شنطته ناديته:.. حسن
لف لعندي وقالي:.. أنا حسين مش حسن
ههههه نسيت هم توأم ومانقد نميز بينهم
قلتله:.. به يحسين... وين ماشي بالشطنه هذي
قالي:.. عندي واجب ماعرفتله... بنمشي أحمد
قلتله:.. تعال أنا بنشوفه ليك... وكلم حسن أكيد عنده واجب
جا حطلي الشنطه ومشى ينادي حسن
♡
♡♡♡♡♡♡♡♡
عادل...
رجعت بالليل للحوش... طبعا العصر مشيت مع جدي وخطبها ليا... تحشمت لأنه أبوي ماكان معانا وخفت يردنا... بس هوا تقبل جيت جدي واعتبرها حاجه كبيره إني جبته هوا
وأنا خاش شفت أنس طالع مستعجل من حوشه... حته مانتبهلي... جاني فضول نعرف وين ماشي مستعجل
رجعت على طول للسيارة بعد ما طلع هوا بنلحقه
باللحظه هذي ضرب تلفوني وكان بدر... ماعرفت نرد عليه توا أو لا... مانبيه يعرف إني نلحق في أنس
رجع ضرب ثاني فرديت:.. الوو
بدر:.. توينك ماترد... عارفني في مصيبه المفروض ترد عليا طول
عرفت أنه معصب لما صده خال شروق:.. معليش انشغلت... قولي شن عندك
علا صوته فيا وقال:.. ماتكلمني وكأنك تكلم في عيل
كنت بنضحك على عصبيته هذي... متاكد انه مش منتبه لكلامه
قلتله:.. رجعت للحوش
هدا شوي وقالي:.. غدوا الصبح بنطلع
قلتله:.. حاولت تكلمه مرا ثانيا
رد عليا:.. الحق لا... على أي أساس نرجع نكلمه... هوا انكر أنها عنده... ومانضمن يكون كلام الولد حق... ولا نبي نفكر أنها مخطوفه
قلتله:.. لو مخطوفه حيبان الموضوع... أنا وصلت للحوش نحاكيك وقت ثاني
قالي:.. تمام... سلام
قفلت منه وأنا وصلت وين ما أنس وقف... ولقيته حوش وحده من نسوانه
لفيت طريقي ورجعت للحوش
♡
♡♡♡♡♡♡♡♡
أنس....
ابتسمت لما شفت عادل رجع بطريقه... مايحسابني انتبهتله... أو لنقول تقصدت نطلع مستعجل عشان يشك فيا ويلحقني
طلعلي أخو مراتي الثانيا وقلتله يناديها
طلعت مريم:.. عاش من شافك
قلتلها:.. جبيلي الفلوس يلي مديتهم ليك الصبح
استغرب مريم وقالت:.. مش جاي ترفعنا قصدك
عصبت وصرخت فيها:.. عجلي جيبيهم
خافت وخشت تجيبهم... من جد ندمت إني تزوجت
طلعت مدتهم ليها ومشيت على طول لسيارتي وركبت
توا بدر مشغول فكره بمراته ومش عارف لو لقاها أو لا
مشيت القهوة يلي متفق فيها مع واحد
وصلت وخشيت... حصلته قاعد يراجي فيا
قعدت ومديتله ظرف الفلوس وقلتله:.. زي ما اتفقت معاك... هذي الفلوس وزاد إنك تنفد
قالي:.. كيف نضمن أنه مايصيرلي شي
عصبني هذا زياده:.. شن سؤالك الغبي هذا... من الطبيعي أنه بيصير عليك شي... حاجه زي هكي بيسكت عليها يعني... لو مش قدها خلني نشوف غيرك من توا
قالي:.. لالا خلاص... امرنا لله يعني شن بيصير غير كم بوكس وكف
ابتسمت على جنب وقلتله:.. وكم كسر لا تنسى
قالي:.. أنت يلي بتدفع علاجي
طلعت باكو الدخان من جيبي وحطيت واحد في فمي:.. بدون ماتوصي... المهم انت دير يلي وصيتك عليه
♡
♡
♡♡♡♡♡♡♡♡
بعد كم يوم
بدر...
حالي حاله من بعد شروق... ماكنت ندري أنها الهواء يلي نتنفسه... اشغالي كلها خشت في بعض... وفوقها كل ما نكلم خالها يقولي مش عندي... بس أنا تاكدت أنها قاعده عنده... لأنه قبل لا نرجع مريت من جنب حوش خالها وقعدة قرابة الساعه تقريبا
شفتها طلعت من الحوش وكانت رافعه كيس يمكن ومداته لخالها في السيارة... كنت بننزل نجيبها... بس يلي منعني استغراب.... يعني ليش ما كلمتني أو حاولت تطلع تشوفني... لو أنها مغصوبه تقعد عنده مستحيل مايكون فيه طريقه تتواصل فيها معايا
فخليتها على راحتها مع اني مانقدر على بعدها
قلت لجدي أنها قعدت عند صاحبتها عشان مانخوفه وقلتله تلفونها ضايع وماطلعتلها ثاني
وصلت للحوش على العصر واستغربت من السيارات الغريبه يلي برا
سمعت صوت دوشه من المربوعه ومشيتلها
شبحلي جدي وكان معصب... قالي:.. وين شروق يبدر
شبحت خالها قاعد وعرفت أنه جاي عشانها
مشيت قعدت وقلت:.. قعده عند خالها
قالي:.. وامته كنت تبي تقولي... لين تطلقها
لفيت بسرعه لجدي وأنا مصدوم:.. شن نطلقها... من قال
تكلم خالها وقال:.. هي ماتبيك... وأنا جيت بطلب منها
وقفت معصب وقلت:.. الكلام هذا كذب... مستحيل شروق تقوله... أكيد أنت يلي تبي الشي هذا
كان فيه واحد معاهم مانعرفه قال:.. احترم روحك ونقص صوتك... وهذا إحنا ضيوف عندكم
قال جدي:.. بدر اقعد مكانك واسكت
قعدت على اعصابي وخوفي... مستحيل شروق تقول تبي الطلاق... مستحيل
قال خالها منصور:.. أنا جيت مع اخويا قاسم كيف نحلو القصه بدون مشاكل... زوجتوها غصب وتوا تبي حريتها... ودام هيا بمسؤوليتي توا فبنحققلها طلبها
قلتله:.. خليها تجي بروحها وتقول أنها ماتبيني
قال خالها قاسم:.. البنت عاشت بضغط عندكم... وأكيد بتخاف منكم وتقول ماقالت شي
ابتسمت وقلتله:.. معناها هي ماقالت شي ولا تبي تطلق
قال خالها منصور:.. توا نتصل واسمعها بروحك
طلع تلفونه واتصل
شوي وسمعته قال:.. السلام عليكم... اعطيني شروق... أهلين... إحنا وصلنا بس هوا مش مصدق إنك تبيه يطلقك... اها... توا نحطه على السبيكر
وشغل السبيكر وسمعت صوتها:.. كيف حالك يجدي
رد جدي:.. كيف هنت عليك وخليتيني... لو حالي يهمك كنتي شكيتيلي... مش مشيتي لغيري
صوته تغير وواضح حزت في خاطرها وقالت:.. والله ماتهون عليا يجدي... بس ظروف غصبتني
قاللها:.. تبي تخلينا يعني
أنا كنت الطرف المستمع بس وقالت:.. يجدي مصيري نكون بين ناسي... وأنا اخترت نقعد عند خالي... ونبي
سكتت شوي واختنق صوتها:.. نبي بدر يطلقني
كنت مصدوم من كلامها... إحنا امته تزوجنا عشان تبي تطلق... ليش
وقفت وسحبت تلفون منه ورجعته الصوت الداخلي وحطيته على اذني وقلتها وأنا مصدوم ومخنوق:.. من غاصبك على الشي هذا... قوليلي وأنا ناخذ حقك منه
قالت بعد ما بكت:.. بدر سامحني بس عشانك لازم تطلقني
عقدت حواجبي وقلتها:.. كيف يعني... سؤالي إنتي ماتبيني يعني
سكتت وقعدت تبكي
ابتسمت لأنه سكوتها يعني العكس بس في شي يمنعها
تذكرت يوم كنت نسأل فيها تبي أنس أو لا... وتقعد تبكي وتسكت
تنهدت وقلتها:.. طلبك وصل... وأنتي طالق... تبي شي ثاني
شهقت وزادت تبكي قالت:.. بدر
قلتلها:.. مش أنا يلي نشد في وحده ماتبيني
وقفلت الخط عليها ورجعت التلفون لخالها وطلعت بدون مانقوللهم شي
♡
♡♡♡♡♡♡♡♡
شروق...
طلقني
قعدت نبكي بوجع.... كيف طلقني بالسرعه هذي... أنا حبيبته وطلقني
بس خالي قال أنها لعبه عشان أنس يبعد عني... قالي الشخص يلي جاه هوا أنس... فحكيتله كل شي داره فيا وقالي اتفق مع بدر... وبيجمع العائله كلها عشان يسمع إني بننفصل عنه... بس مش يطلقني بالسرعه هذي
جت مرت خالي وخذت تلفونها وقالتلي:.. صدقيني هذا الاحسن ليك
شبحتلها وأنا مصدومه... فقلتلها:.. بدر طلقني.... كيف الاحسن ليا كيف
قالت:.. معناها ماكان يبيك
وقفت وأنا نرعش:... ببس خالي قالي قولي الكلمه هذي عشان يسمعها أنس وبس
قالت مرت خالي:.. هوا كذب عليك... عشان اديري يلي يبيه
نبضات قلبي سريعه وخوف مش عادي يجري في دمي لقلبي... كيف صدقته
جيت بناخذ تلفونها
قالتلي بعد ما سحبت يدها:.. ماتحاولي تكلميه... واصلا تلفوني فيه قفل
بكيت اكثر:.. حرام عليك... ليش بتفرقونا ليش
قالتلي:.. لمصلحتك
وطلعت والمرا هذي قفلت عليا الباب
مشيت لباب نطق عليها ونبكي:.. خالتي افتحيلي... افتحيلي الباب
طحت على ركبيا وأنا نحس أنه خلاص... كل شي اختفا... خسرة كل شي لما سمعت لخالي.... خسرت بدر بسبب غبائي
♡
♡♡♡♡♡♡♡♡
عادل....
اتصلت على بدر بس مايرد عليا... كلمني جدي وقالي أنه طلق شروق... كيف يفكر هذا... معقوله الحب يختفى هكي وبسهوله
رجعت للحوش بسرعه بنرفع كم حاجه وطالع
صادفني أنس بالطريق وقالي:.. سمعت أنه جدي عنده ضيوف
فهمت هوا لشن يلمح فقلتله:.. انا مانعرف شي
ابتسم وقال:.. لما تعرف خبرني
ومشى لجيهت حوشه
غريب الصراحه... يعني تصرفاته تخلي الواحد يشك فيه غصب
ركبت سيارتي ورجعت نتصل على بدر ولا شي
وصلت لحوش جدي وخشيتله
كان قاعد هادي جدا:.. السلام عليكم
انتبهلي ورد عليا:.. وعليك السلام... أن شاء الله لقيته
قعدت بجنبه:.. لا والله... بس أكيد بيرجع
تنهد وقال:.. طلع وهوا متضايق... هوا يبيها بس انجبر يطلقها... حسها كبيره في حقه تقول ماتبيه... بس هوا يبيها وواضح عليه
قلتله:.. يجدي لو هيا نصيبه حترجعله
قال جدي:.. أن شاء الله
♡
♡♡♡♡♡♡♡♡
بدر...
قعدت نلف من مكان لمكان... ازعجني تلفوني وحطيته صامت... لو شروق مش حتتصل ليش نرد على الناس الثانيه
وصلت لاستراحة جدي وخشيتلها
ضحكت على الموقف هذا... يعني في المرا الاوله لما شفتها مع أنس جيت هنا وتوا تضايقت جيت هنا... شكلها الاستراحه بتشهد على احزاني وعذابي
♡
♡♡♡♡♡♡♡♡
شروق...
قعدت نبكي وخلاص... أنا ضيعت حياتي بروحي
بعد العشاء خشلي خالي وقالي:.. قصدك مازال ماسكتي.. يعني ماجفن دموعك
حسيت بكره مش طبيعي ليه وقفت وقلتله:.. يريتي ماعرفتك... يريت لو أمي وحيده وماعندها خوت
قالي:.. وليش أن شاء الله... عشان واحد مايبيك
صرخت فيه:.... هوا يبيني... بس أنت كذبت عليا... مش قلتلي إنك مخطط معاه
قرب وقعد على السرير وقال بهدوء:.. سبحان الله... زي بعضكم تعلو في اصواتكم على ناس اكبر منكم
هديت شوي... بس دموعي ينزلن ولا هدن
قالي:.. أنا صح كذبت عليك... بس ماغصبته أنه يطلقك... وشوفيه... أول ماقلتيها ليه طلقك... يعني هوا مايبيك بس كان مجبور بيك
نسمع فيه ومش قادره نقتنع.... قلتله:.. يمكن أنت جبرته او قلت شي خلاه يطلقني
هزلي راسه بيأس:.. إنتي كلمتيه وبعدها طلقك... ماتقوليش انا السبب
وقف وقالي:.. قلتلك لو أنه اثتب أنه فعلا يبيك نرفعك أنا لعنده... بس باول الطريق تخلا... طلع مش قد المسؤولية
وطلع وخلاني نفكر... هوا فعلا تخلا عني من كلمه قلتها... ليش ما قالي لا... ليش ماجبرني نرجع... ليش ماسألني
♡
♡
♡♡♡♡♡♡♡♡
بعد شهر...
شروق...
مرن عليا اوقات صعبه بكل... نفسيتي تعبت ومخنوقه وكل حياتي سوده
طلعت من الدار بنمشي للمطبخ بس فجأة حسيت بدوخه
حاولت نتوازن بس شفت الأرضية اقرب
بس لحظه شوي... حاسه روحي مرفوعه
غضمت عيوني ورجعت فتحت... شفت قدامي خالي منصور وكنت على الصالون
قالي:.. شروق... يبنتي ليش هكي تعبي في روحك... ليش ماتاكلي
تقعدت وحولته عني:.. أنا حره في روحي... ناكل أو ماناكل
قالي:.. شبحتي روحك كيف موليا جلده على عظم... شكله أنا بنوكلك غصب
لفيت وجهي عنه وأنا ومتضايقه... مشتاقه لبدر بشكل كبير
طاحت دمعتي وشبحها خالي ومسحها وقال:.. معقوله لحقتي تحبيه للدرجه هذي
كانت الكلمه هذي هيا بداية أنهار دموعي
بكيت بصوت وأنا نحس في قلبي بيتقطع... شهر ماندر عنه ولا نعرف خبر عنه
حسيت بخالي يسحبني ليه... وأنا تلقائيا مشيت لحضنه نبكي
قالي:.. سامحيني يبنتي... بس كنت نبي نتاكد أنه الراجل المناسب ليك... بس هوا تخلا عنك بسهوله... شن بيدي ندير
وانا نبكي وبس
بعدها قالي:.. أكيد عندك صاحبه هنا مقربه ليك... شن رايك تكلميها
بعدت عنه وقلتله:.. إيه عندي
مدلي تلفونه وقالي كلميها
خذيته وخشيت للدار كانت تبع التوأم... وتوا قعدين مع اخوهم أحمد وأنا خذيتها
كتبت رقم مروة واتصلت عليها
رد عليا:.. الو
كان واضح صوتي فيه البكية:.. الو مروة
شهقت وقالت:.. شروق... وينك
قلتلها:.. تقدري تجيني... حوش خالي مش بعيد... وتوا نوصفه ليك... بس يالاول نبيك تجيبيلي معاك حاجه
مروة:.. شن هيا
بلعت ريقي وأنا خايفه:.. اختبار حمل
يتبع....
